Habakûb 1
1
1Takotitjut Habakûb nelautaijûb takojanga.
2Nâlegaᴋ, ᴋanoᴋ sivitutigijomik ᴋaigarsuktuksauvêk tusaromangilatillô? Idluitulinerit pivlugit nipliavigivagit, piulikleromângilatillo.
3Sôᴋ piungitulinermik takotipingâ, takonârtilungalo nâmangitulinermîk? Asserorsaineᴋ idluitulinerlo sâmnêngmanik; aivaneᴋarporlo, akkerartornerlo perorpoᴋ.
4Tamanna pivlugo perᴋojat sulijungnaiput, idluarsainerlo ᴋerdlâᴋaidlune sâlaᴋangilaᴋ; idluitûb idluartoᴋ ilumangmago; tamanna pivlugo idluarsaineᴋ mumiktauᴋattarpoᴋ.
5Ulernaituileritse inôᴋatigêksuit akorngane, kamatsiaritselo, tataminiaritselo angijomik; uvlupsingne suliaᴋ suliarijomârapko okperiniangitase, unipkautaugaloarpat ilipsingnut.
6Tagva, âhâk, Kaldêamiut, inôᴋatigêksuit erᴋsinartut kajusidlartullo, makititsomârpakka; nunaᴋsûb silingningagut ingeraromârtut, nunat pigilungitatik pijomavlugit.
7Kapianadlartoᴋsôvut erᴋsinadlartoᴋsôvlutiglo; idluarsainingit angutauserningillo anivut nangminermingnit.
8Horsingit sukaliluarput pûsevâlungnit, kêsuktoᴋsônersauvlutiglo amarᴋunit unuksiortunit; horsilijartungillo pangaliᴋatârput; ilâ, horsilijartungit ungasiktomit tikiput; sukalidlarput nektoraliktitut nerrisâdlaromajutitut.
9Ilûnnatik tikiput asserorsaijomavlutik; kênangit kajusimadlarput unangâᴋtut; sorᴋsungnermelo tigujat katersorpait siorᴋatitut.
10Ilâ, atanernik mitauteᴋadlarput, angajoᴋâksoaniglo naggonauteᴋadlarput; ungalujijoᴋsuit ilûnnaita allêᴋutigivait; ibjunik kalerêktitsigamik tigulugillo.
11Anoretulle tikiaᴋijotut ᴋângiutilârpoᴋ, pidlaraksautilunelo: ilâ, tâmna pitsartunerminik Gûdelik.
12Igville, Nâlegaᴋ Gûdiga, ivsornaitoᴋotiga, isoᴋangitoᴋsoarmit tâmnautsainalungilatît? Toᴋoniatsangilagut. Tâmna pidlaraksautilauᴋpat, Nâlegaᴋ; igvit ᴋairtôjotit, tâmna sugiartiksautilauᴋpat.
13Igvit ijeᴋartotit ivsornaitoᴋsôjûngnik idluitulinermik takonârungnangitûngnik, nelangainermiglo nâmaksarungnangitûngnik, suna pivlugo nelâgôngitulijut tâpkoa takonârᴋigît, nipangerlutillo idluitulijûb idluarᴋejane êngmago,
14Inuillo îtiligit mingeriatitut imarbingmêtutitut, pâmgortutitullo ataneᴋangitutitût?
15Ilûnnaita amuarpait aulasaujautiminut, anguvait nuluaminut, katersorpait naperniutiminut; tamanna pivlugo ᴋuviasudlarpoᴋ seridlarlunelo.
16Tamanna pivlugo tunergutinik tunerguserpoᴋ nuluaminut, isserluanititsilunelo tipigiksautinik naperniutiminut; tâpkutigûna piksarsigame amigangitomik, nerᴋiksarsilunelo nâmamariktomik.
17Taimaimat nuluane pêjaiviginiarpagît nungulugit, sorairniarluganelo inôᴋatigêksuit toᴋorarlugît?
Currently Selected:
Habakûb 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.