I Samuel 1
1
Samuelib innulerninganik.
1Anguteᴋalaukpok Ramataim Zofimemit Efraimib ᴋakᴋanginêtomit, Elkanamik attelingmik, Jerohamib erninganik, Elihub erningata, Thohub erningata, Zufib erningata Efratemit pijub.
2Nulliaᴋalaukporlo maggungnik, aipanga Hannamik attelik, aipanga Penninamik. Penninale ᴋittorngaᴋalaukpok, Hannalo ᴋittorngaᴋalaungilak.
3Angullo tamna iglugasaksoarnit iglokarviminit majorarlaukpok nalliunermine, tuksiaromavlune tunnergutiksaniglo tunnijilune Nalekamut Silome. Tagvanelaukpugle Nalekab ajochertuijokotigik Hofni, Pinehaselo, Elib ernigik.
4Uvlullo illangane pijoᴋalaungmat Elkana tunnergutiksaminik tunnijilaurame, nulliaminut Penninamut tapsomalo erninginut paninginullo illunainut, tunnijivok abvakunik.
5Hannamulle kiksarlune tunnijivok abvakomik attautsemik; Hanna nagligigamiuk; Nalekable ᴋittorngisuitilaukpâ.
6Akkerartortingatalo kiksartidlarpa, pingijaivigidlarlâlo, Nalekab ᴋittorngisuitilaungmago.
7Taimailaukpok Jarine tamaine majoralaurangat Nalekab iglunganut, kiksartipalo taimak; tamnalo ᴋugviorpok tagva, nerrinanelo sunamik.
8Elkanable uingata oᴋautiva: Hanna, sôg ᴋêavît, sôglo nerringilatit? Sôglo omattit sannikteriva? Namanersaungilangale illingnut ernernit tallimaujortunit?
9Tagva Hanna nerrilauᴋârdlune, immerlauᴋârdlunelo Silome nikkovipok. (Elile ajochertuijok iksivautame iksivavok Nalekab Tempelingata nappajungata saniane.)
10Tamnalo omamut kiksadlalaukpok, tuksiarporlo Nalekamut, ᴋugviorlunelo.
11Pinniaromajaminiglo angerpok, oᴋarlunelo: Nalegak Zebaot, kivgavit ᴋannoêninga taikkunârniarungne, issumaginiarumga, kivgallo puigorniangikungne, kivgallo ernermik tunnitsiviginiarungne, tagva Nalekamut tunnijomavara innôsinga nâlugo, pijoᴋartuksaungilarlo kipsautingnik niaᴋunganut.
12Akkunîllo tuksiarmat Nalekab sângane, Elib tapsoma ᴋanninga kamagiva.
13Hanna omattimigut oᴋarame kangasinâgik kissimik aulavuk, nippingalo tussartaulaungilak. Tagva Elib tallanganasugiva;
14Oᴋautivalo: Kannok akkunêrtigijomik tallangajomavît? Weine illungnêtok annikoleruk illungnit.
15Hannale kiovok, oᴋarlunelo: Aukak, nalegâk, arnauvunga kiksartok. Weinemik immiksamiglo pitsartujomik immerlaungilanga, omattigale navilaukpara Nalekab sângane.
16Kivgait înasuginiarnago arnatut illuserluktotut; issumajadlarnimnut, kiksadlarnimnullo oᴋarᴋattarlaukpunga manna tikkilugo.
17Eli kiovok oᴋarlunelo: Ullapirsauteᴋarlutit aularit; Israelib Gudingata tuksiarᴋiniarpâtit tuksiararilauktarnik tapsomangat.
18Tamna oᴋarpok: Kivgait saimaneksile ijikpit sângangne. Taimak arnak aularpok apᴋosinermine, nerrilunelo, tautorlugungnailunelo.
19Uvlâkullo parngnailerput, tuksiarlauᴋârdlutik Nalekab sângane, utterivut tikkilutiglo iglomingnut Ramatemut. Elkanablo nulliane uvineᴋattigilerpa, Nalekablo issumagiva.
20Uvlullo illangit ᴋângermatta singailerpok, ernermiglo ernivok, Samuelemiglo atserarpa; oᴋarlunelo: Nalekamit ᴋenuarilaurapko.
21Angullo Elkana majorarmat paunga iglomioᴋattine illagaillugit tunnergutiksamik tunnijauvaktomik, angerutigilauktaminiglo tunnijijomavlune Nalekamut,
22Hanna majorarᴋattaulaungilak, oᴋarporle uiminut: Majorarᴋattaujomalungilanga nukapiak amâmagungnaiᴋârtinnago, tagva âtsomavara, Nalekab sângane sakᴋijarᴋovlugo, tagvanêtsainarᴋovlugolo sorairane.
23Elkanab, uingata oᴋautiva: Taimailiorit sorlo namagijaungmat illingnut, nokᴋangarit amâmaktitsijungnaiᴋârtinnak tâpsominga; Nalekable oᴋauserilauktane nallautsitilerligit. Taimak arnak paivok, erninelo amâmaktipa, amâmaktitsijungnaiᴋârtinago tapsominga.
24Amâmaktitsungnairamiuk, âlugo majorarᴋattigiva, tuktuvait pingasut, Efalo tattalugo sanaukamik, publaujarlo Weinetalik illaliudlugo; âpâlo Nalekab iglunganut Silomêtomut. Nukapiarle innusulaukpok sulle.
25Tuktuvaillo illangat toᴋᴋopât, nukapiarlo âpât Elimut.
26Arnarlo oᴋarpok: Illa nalegâk, sorlo mikseᴋârtomik tarnît inôngmat, nalegâk, uvanga arnauvunga taimna, mâne nangerᴋattigilauktat, tuksiarlauktorlo Nalekamut,
27Nukapiak una tuksiarutigilaurapko. Manna Nalekab tuksiaramnik tunnitsivigilaukpânga, tuksiaragilauktamnik tapsomangat.
28Tamanna pivlugo tunnivara Nalekamut innôsinga nâlugo, Nalekamit tuksiarijaulaungmat. Tuksiarpullo tagvane Nalekamut.
Currently Selected:
I Samuel 1: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.