I Atannit 6
6
Tempelib sanajauninga jârine 7 ne.
1Israelib ᴋitorngangita aularningata Egiptenemit kingorngangata jâringita 480 ingane, Salomob atanioningata jâringita sitamangane, takᴋerme Sifemik atelingme, tagva takkib aipanga, Nâlegak igloliolerpa iglomik.
2Iglole Salomob igloliortanga Nâlekamut, tallitut 60 gitut takᴋitigijolaukpok, tallitullo 20 gitut sanimutotigijolaukpok, tallitullo 30 gitut poktotigijolaukpok.
3Tempeliblo sângane torksumik sanavok, tallitut 20 gitut takᴋitigijomik, iglub sanimutuninga malliklugo, tallitullo tallimaujortutitut sanimututigijomik, iglub sivurâne.
4Igalângniglo sanavok iglome; illuane nerrotôjunik, sillatanelo nerroᴋitunik.
5Iglublo sanirangata sillatâne aiparusermik agvertarvingnik kallerêktunik sanavok, avatâne ilûnnane, Tempelib avatâne, aiparusingatalo avatâne; inniniglo sanavok sanirâne avatâne ilûnnane.
6Agvertarviglo allerpâk tallitut tallimatut sanimututigijôlaukpok, tuglialo tallitut pingasojortotut sanimututigijôlaukpok, pingajoello tallitut 7 itut sanimututigijôlaukpok. Iglernangnik sanaᴋojilaungmat iglub sanirangata sillatane avatâne, egangaᴋonnagit iglub saniranganut.
7Iglolo igloliortautillugo, ujarkanit, ullimarsimajarêrtunit igloliortauvok, taimâk igloliornerme ujaratsiat katjungningit, ullimautillo ullimarningit, sakkullonêt kikkiangojut pergvallungningit tusartaulaungimatta.
8Upkoaᴋalaukporle iglub ᴋerᴋane tallerpiane, majutitigut siuteroktut îtutigut majorarviᴋarᴋovlugo agvertarviub allerpânganit akkulermut, agvertarvingmillo akkulermit pingajuanut.
9Taimâk iglo igloliorpa pijarêrtilâlo; ᴋâᴋartipâlo iglo sâtujanik, ikᴋângniglo Cedereôjunik.
10Sanavorlo agvertarvingnik ᴋallerêktunik iglub avatâne ilûnnane, tallitut tallimatut pôktutigijunik, tungavullo iglome ikᴋângnut Cedereôjunut.
11Nâlekablo oᴋausingit Salomomut pivut, oᴋarporlo:
12Iglo igloliortat pivlugo, perᴋojakka malliklugit agvertarniaruvit, nâmagijakka malliklugit pinniarniaruvit, perᴋojakkalo ilûnnaita mallingniarungne; tagva oᴋautsikka nellautsitiniarpakka illingne, sorlo atâtait Davide oᴋarvigilaurapᴋo;
13Ineᴋaromavungalo Israelib ᴋitorngangita akkorngane, Inuᴋotikkalo Israelitit ᴋemagomangilakka.
14Taimâk Salomob iglo igloliorpa, pijarêrtilâlo.
15Iglublo sanirangita ilûnngit illupiarutserpait sâtujanik Cederiôjunik; iglub nettinganit ᴋollâ tikkidlugo illupiarutserpa satujanik; iglublo nettinga netsisertorpa satujanik Cipressiojunik.
16Iglublo kinguane sanavok upkomik sâtujanit Cedereôjunit, tallitut 20 itut takᴋitigijomik, nettermit ᴋollâ tikkidlugo; sanavorlo tamattominga, illuane ivsornaitopângoᴋovlugo;
17Igluble, tagva Tempelib sivua tallitut 40 gitut takᴋitigijolaukpok.
18Illuane iglo ilûnnane Cedereotuinaulaukpok sanangoaraktaggit, kuglungajungoanik, nuvugalangoaniglo siggimajungoanik; ujaraglo atauserlonêt takkuksaulaungilak.
19Igluble kinguata illua âᴋkiksorpa, Nâlekab angersimaningata iklervinga âtauᴋovlugo takkamunga.
20Innelo kinguane tallitut 20 gitut takᴋitigijolaukpok, tallitullo 20 gitut sanimututigijovlune, tallitullo 20 gitut poktotigijolaukpok, illupiarutserpâlo Goldemik pivianadlartomik; Altarelo sillaparpa sâtujanik Cederiojunik.
21Salomoblo iglo illuane illupiarutserpa Goldemik pivianartomik; ᴋellaumgujallo Goldeôjut siakitipait upkûb, Goldemik illupiarusimajub sânganut.
22Iglolo ilûnnât, ilûnnanemarik illupiarutserpa Goldemik; Altarelo ilûnnât upkûb sanganelauktok sillaparpa Goldemik.
23Kamanelo inneme kinguanetome, Kerubingoaᴋartitsivok Maggûngnik. Kerubingoaglo sanavak, kamanetuksak inneme kinguanetome, tallitut tallimaujortutitut poktutigijuk, napârtub orksuliuk ᴋejunganit.
24Kerubingoaglo esarungit attunît tallitut tallimatut takᴋitigijolaukput, taimâk tallitut tallimaujortutitut îlaungmat tapsoma esarungata nuvuanit igluata nuvunganut.
25Taimaglo Kerubingoak aipanga, tallitut tallimaujortutitut îlaurivok, anginigiglo taimaikoarêlaukpuk, adsigêktomiglo illuseᴋarpuk.
26Kerubingoaglo aipa tallitut tallimaujortutitut poktotigijolaukpok, aipangalo taimailaurivok.
27Kerubingoaglo pitipak kamunga iglub illuanut. Kerubingoaglo esarungit isivijauvut Kerubingoak aipangata esarunga aktualermat iglub saniranganut, aipatalo êsarunga aktuavok iglub saniranganut akkianêtomut; igluble ᴋerᴋane esarkuk aktuatigêkpuk.
28Kerubingoaglo sillaparpâk Goldemik.
29Iglublo sanirangit illûnane illuane sillatânelo Sanangoaraᴋarᴋovait Kerubingoanik, Palmingoanik, nuvugolangoaniglo siggimajunik.
30Iglublo nettinga sillaparpa Goldemik illuane sillatânelo.
31Ittervingmullo innemut kinguanêtomut sanavok upkoangnik maggûngnik, napârtub orksuliub ᴋejuanit, nappajungillo kattablo ᴋollâ ᴋatilugit sanirᴋab tallimauningatut angitigijolaukput.
32Sanangoarkaniglo Kerubingoanik, Palmingoanik, nuvugolangoaniglo siggimajunik ivertitsikojivok tapᴋonunga; sillaparpaglo Goldemik.
33Taimaglotauk Tempelib itterviane nappajunik sanavok, napârtub orksoliub ᴋejuanit, sanirᴋab sitamauningatut silliktigijunik.
34Upkoangniglo maggûngnik, ᴋejungmit Cipressemik atelingmit; upkoaglo attunît maggolimalaukpuk iglugêngnik attatigêngnik ᴋevertautimingnut.
35Sanangoarkaniglo kipperoksimajunik, Kerubingoanik, Palmingoaniglo, nuvugolangoaniglo siggimajunik, pitetservigivait, sillaparpaillo Goldemik, taimamarik sorlo perᴋojaulaungmat.
36Illulo kamanênersak avaluliorsimajok sanagiva, ujarkanit ullimarsimajunit, pingasunik ᴋallerêktitsivlune, ᴋânganelo ᴋejuᴋarlune ᴋejungnik Cedereôjunik saviksimajunik atautsemik.
37Jârit sitamangane takᴋerme Sifemik atelingme tungavik Nâlekab iglunganut illijaulaukpok,
38Jârillo 11 ingane takᴋerme Bulemik atelingme, (tagva takᴋit 8 ingat) iglo pijarêrtaumalaukpok, sorlo illingajuksaulaungmat, jârillo 7 it nâlugit igluliorasuarpât.
Currently Selected:
I Atannit 6: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.