I Atannit 14
14
Ahiab nellautaininga Jerobeame pivlugo. Jerobeamib toᴋunga. Rehabeamib atanniotininga, idluitulliningit, pitlartauningalo tamakkoa pivlugit.
1Nelliutome taipsomane Abia Jerobeamib erninga ᴋanimalaukpok.
2Jerobeamelo nulliaminut oᴋarpok: Parngnailerit, pissertorlutillo, kinalonêt mallugosulerkonago Jerobeamib nulliaringmatit, ailutillo Silomut. Ahâk nellautaijok Ahia tagvanepok, oᴋautjigilauktara, atanniojuksaugama inugasaksoarnut tapᴋonunga;
3Neksarlutillo niaᴋojanik tallimaujortunik, sâtuniglo, Illulerᴋomiglo tattatomik igupsaujartut orksunginik, aivigilugolo, oᴋarᴋovlugo illingnut, ᴋanok nukapiab illinganiarianganik.
4Jerobeamiblo nullianga taimailiorpok, parngnailerlunelo ailarmelo Silomut, tikkiporlo Ahiab iglunganut. Ahiale tautugungnarlaungilak, ijîgik inutuᴋaunermut aulasuêrmannik.
5Nâlekable Ahia oᴋautiva: Ahâk Jerobeamib nullianga ᴋaivok, suna apperᴋutigijomavlugo illingnit, ernine pivlugo, tamna ᴋanimangmat. Tagva mânna oᴋautiniarpet imâk imâglo. Itteramelo mânna takkorngartausertorpok.
6Ahiable itigangita ᴋikkergallijarningat tusarmago ittertillugo upkoakut, oᴋarpok: ᴋailerit kamunga, igvit Jerobeamib nullianga, sôg takkorngartausertorᴋit? Tillijaumavunga illingnut, taigotaksamut oᴋumaitomut.
7Ailerit Jerobeamelo oᴋautiuk: Imâk Nâlegak Israelib Gûdingat oᴋarpok: Angijorortilaukpagit inugasaksoarnit, atanningortilutillo inuᴋotimnut Israelitinut;
8Atannioviglo Davidib iglunganit aksarnigarilaukpara, tunnilaukparalo illingnut. Igville kivgaptut Davidetut îlaungilatit, perᴋojamnik mallilauktotut, agvertarlauktotullo malliklunga omamut tamânut, pinniarlune ijingma idluarijanginik kisiane;
9Sugaluluartomiglo pinniarlaukpotit tamainit sivunernelauktunit, ailaukpotit Gûdiblo asinginik, Gûdingoanik kovimajunik sanalutit illingnut, ningaksaromavlunga, tunnungnullo egimavarma,
10Taimaimat, ahâk, ᴋanoêtomik pititsijomavunga Jerobeamib iglunganut, pêjaijomavungalo Jerobeamemit, inungniglo omajuniglo tamainik, kivgaujomik kivgaungitomiglo Israeleme; Jerobeamiblo iglungata kinguvângit pêjaromavakka, sorlo aktarnerlukut pêjartauvangmatta, nungumariᴋârtinago.
11Kina Jerobeamekunit toᴋoniartok iglugasaksoarne kingminut nerrijaujuksauvok, kinalo natername toᴋolertok tamna tingmitjet silamêtut nerrijaksarivât; Nâlekab tamânna oᴋauserilaungmago.
12Igvillo parngnailerit angerarlutillo. Ittikkatillo ablorniarpatta iglugasaksoarnut, sorrusek toᴋoniarpok.
13Israelitillo illuêngarlutik oguriniarpât, illijartorniarlâllo. Tamna kisime Jerobeamekunit illuvermut pinniarmat, tapsomane sunamik Nâlekab Israelib Gûdingata ᴋuviagijanganut illingajomik nachvârtaungmat, Jerobeamib iglungane.
14Nâlegarle atanneᴋartitsijomârpok Israelitinut, pêjaijomârtomik Jerobeamib iglunganik uvlorme taipsomane. Sunalo pilerêrka mânna?
15Nâlekablo Israelitit annauleromârpait, aulaᴋovlugit, sorlo ivik suvlolik imâne aulataungmat, Israelitillo nutsugomârpait nunamit ajungitomit mattomangat tunnilauktaminit atâtanginut, siamârtitsomârpaillo kôksub ungâtânut, tamânna pivlugo napârtoᴋotimingnik (Gûdingoalingnik) sanalaungmatta, Nâlegak ningaksaromavlugo.
16Israelitillo tunnijomârpait, Jerobeamib idluitullilauktub, Israelitiniglo idluitullititsilauktub ajorningit pivlugit.
17Tagva Jerobeamib nullianga parngnailerpok, ailunelo, tikkilarmelo Tirzamut. Iglublo manoanganut tikkitillugo nukapiak toᴋovok.
18Illijartorpâllo, Israelitillo illuêngarlutik ogurivât, Nâlekab oᴋausingit malliklugit oᴋauserilauktangit kivgamigut Ahiakut nellautaijoᴋut.
19Unipᴋautsillo tamakkoa asingit sulle Jerobeame pivlugo, ᴋanok unatadlalaungmat, atanniotilaungmallo, ahâk, tamânna aglaksimavok Israelitit atanningita aglangine.
20Jerobeamible atannioningata nelliuninga jâreôvut 22 it. Sinnisilerporlo atâtagijaminut ailune, erningalo Nadabe atanningorpok innangêrlugo.
21Taimâk Rehabeame Salomob erninga atanniolaukpok Judame. Rehabeame jâreᴋalaukpok 41 ginik atanningorame, atanniotilaukporlo jârit 17 it nâlugit Jerusaleme iglugasaksoarne Nâlekab annerilauktangine Israelib kinguvarênginit tamainit, aterminik pititsiᴋovlugo tagvunga. Anânanga ateᴋalaukpok Naemamik Amonitereôjok.
22Judakullo pinniarlaukput Nâlekab idluigijanginik, ningaksarnersarivâllo tamainit atâtagijangita pinniarlauktanginit, idluinermingnut pinniarlauktamingnut.
23Sanalaukpullotauk ingmingnut poktôjunik, nappajuniglo, napârtuniglo, ᴋakᴋarulangne pôktojune ilûnnaine, napârtullo tungojortut ilûnnatik atâne.
24Ajortullijoᴋalaukpoktauk nuname; nellojullo Nâlekab pêjarlauktangita Israelib ᴋitorngangita sivorngane makkojungnartulliningit attorpait.
25Atanniuble Rehabeamib jâringita tallimangane Sisak Egiptenemiut ataningat takpaungarpok, Jerusaleme sorsugvigilugit.
26Tiguvaillo perᴋutit pivianartut Nâlekab iglunganit, atanniublo iglunganit, tamaitalo tigujaujungnartut, tiguvaillo sappulutaksat Goldeôjut Salomob sanajauᴋolauktangit.
27Tapᴋoalo inninginut ataniub Rehabeamib sappulutaksat kannujarmit sanajauᴋovait, tunnivaillo sorsuktuksat angajoᴋangita, atanniub iglungata upkuanganik udsertortut agganginut.
28Atannerlo Nâlekab iglunganut itterlaurangat, sorsuktuksat akjarᴋattarpait, uttertiᴋattarlaitalo kingorngane sorsuktuksat iglunganut.
29Unipᴋautsille tamakkoa asingit sulle Rehabeame pivlugo, pinniarlauktangillo tamaita, ahâk, tamânna aglaksimavok Judakut atanningita aglangine.
30Unatadlarneᴋatsainarlaukporle Rehabeamib Jerobeamiblo akkorngangne inôsitik nâlugik.
31Rehabeamelo sinnisilerpok, atâtagijaminut ailune, illijartortaulunelo atâtagijaminut Davidib iglugasaksoangine. Anânangalo ateᴋalaukpok Naemamik Amonitereôjok. Erningalo Abiame atanningorpok innangêrlugo.
Currently Selected:
I Atannit 14: LIHB08
Highlight
Share
Copy
Want to have your highlights saved across all your devices? Sign up or sign in
Labrador Inuttitut Heritage Bible © Canadian Bible Society, 2008.