Deuteronomio 1
1
Pakauna
1Nailanad iti daytoy a libro dagiti imbaga ni Moises kadagiti Israelita idi addada iti let-ang iti daya ti Karayan Jordan. Addada idi iti Tanap ti Jordan iti asideg ti Suf, iti nagbaetan ti ili ti Paran ken dagiti ili ti Tofel, Laban, Haserot ken Dizahab. (2No magna ti maysa a tao iti katurturodan ti Edom, sangapulo ket maysa nga aldaw a pagnaenna manipud Bantay Sinai agingga iti Kades Barnea.) 3Iti umuna nga aldaw, iti maika-11 a bulan, iti maika-40 a tawen kalpasan ti ipapanawda idiay Egipto, impakaammo ni Moises kadagiti Israelita ti amin nga imbilin ni Yahweh. 4Naaramid#Num. 21:21-35. daytoy kalpasan ti panangparmek ni Yahweh ken ni Sihon nga ari dagiti Amorreo a nagturay iti ili ti Hesbon, ken ni Og nga ari ti Basan a nagturay iti Astarot, iti gubat idiay Edrei. 5Idi adda dagiti tattao idiay Moab, iti ballasiw ti Jordan, inkeddeng ni Moises nga ilawlawag daytoy a linteg.
Kinunana, 6“Idi addatayo idiay Bantay Sinai, imbaga kadatayo ti Apo a Diostayo, ‘Nabayagkayon a nagnaed iti daytoy a bantay. 7Agrubbuatkayon ket pumanawkayo iti daytoy a lugar. Inkayo iti katurturodan a daga dagiti Amorreo ken kadagiti amin a kabangibang a lugar—iti Araba, iti kabambantayan ken kadagiti tanap, iti Negeb ken iti igid ti Taaw Mediterranean. Inkayo iti daga ti Canaan ken iti labes ti Bantay Libano agingga iti dakkel a Karayan Eufrates. 8Dumngegkayo. Itedko kadakayo ti amin a daga iti masangoananyo. Inkayo sakupen ti daga nga inkari ti Apo nga ited kadagidi kapuonanyo, da Abraham, Isaac ken Jacob, ken kadagiti kaputotanda.’”
Isaad ni Moises dagiti Ukom
(Ex. 18:13-27)
9Kinuna ni Moises, “Iti daydi a tiempo, imbagak kadakayo: ‘Diak kabaelan ti pagrebbengan a mangidalan kadakayo no sisiak laeng. 10Pinaadunakayo ti Apo a Diosyo a kas kadagiti bituen. 11Sapay koma ta maminribu pay a paaduennakayo ti Apo a Dios dagiti kapuonanyo. Parang-ayennakayo koma a kas inkarina! 12Ngem kasano nga ibaklayko ti pagrebbengak kadakayo ken ti panangrisutko kadagiti parikutyo? 13Mangpilikayo kadagiti masirib, lallaki a mannakaawat ken adun ti kapadasanda iti tunggal tribu ket isaadko ida a mangipangulo kadakayo.’ 14Immanamongkayo iti insingasingko nga aramidenyo. 15Ngarud, inawatko dagiti panguloyo iti tunggal tribu ket insaadko ida a mangipangulo kadakayo. Adda dagiti mangidalan iti sangaribu a tattao; adda dagiti makaammo iti sangagasut, adda dagiti makaammo iti limapulo ket adda met kadagiti sangapulo. Nangdutokak met kadagiti dadduma nga ofisial nga agturay iti tunggal tribu.
16“Iti daydi a tiempo, imbilinko kadagiti ukomyo nga usigenda dagiti kaso nga idatag dagiti kailianyo. Imbilinko kadakuada: ‘Masapul a nainkalintegan ti panangusigyo ket awan ti kankanunonganyo, dagiti man kailianyo wenno dagiti ganggannaet nga agnaed iti iliyo. 17Dikay mangidumduma kadagiti pangngeddengyo. Pagpapadaenyo ti pagbatayanyo iti panangukomyo uray siasino ti maseknan. Dikay agbuteng iti siasinoman ta agtaud iti Dios dagiti pangngeddengyo. No adda kaso a narigatyo a risuten, yegyo kaniak.’ 18Imbagak met idi kadakayo dagiti dadduma a rebbengyo nga aramiden.
Maibaon dagiti Espia manipud Kades Barnea
(Num. 13:1-33)
19“Tinungpaltayo ti bilin ti Apo a Diostayo. Pimmanawtayo iti Bantay Sinai ket dinaliasattayo ti nalawa ken nakabutbuteng a let-ang iti panagturongtayo iti katurturodan a pagilian dagiti Amorreo. Idi dumtengtay idiay Kades Barnea, 20kinunak kadakayo, ‘Nadanonyon ti katurturodan a pagilian dagiti Amorreo nga ited kadakayo ti Apo a Diostayo. 21Adtoy ti daga nga ited kadakayo ti Apo a Dios dagiti kapuonanyo. Inkayo tagikuaen a kas imbilinna. Dikay agbuteng wenno maupay.’
22“Ngem kiniddawyo kaniak a mangibaontayo pay nga umuna kadagiti lallaki a mapan agwanawan tapno ammoenda no kasano a mastrektayo ti daga ken no ania ti kita dagiti siudad sadiay.
23“Nasayaat ti insingasingyo, isu a nangpiliak iti sangapulo ket dua a tattao—maysa iti tunggal tribu. 24Simmang-atda iti katurturodan agingga a nakadanonda iti Tanap ti Escol ket winanawananda. 25Idi agsublida, adda sumagmamano a bunga nga inyawidda a naggapu sadiay. Impadamagda a nakadamdam-eg ti daga nga ited kadatayo ti Apo a Diostayo.
26“Ngem#Deut. 9:23; Heb. 3:16. sinukiryo ti bilin ti Apo a Diosyo ket diyo kinayat ti mapan iti daga. 27Nagtatanabutobkayo iti uneg dagiti toldayo ket kinunayo, ‘Kaguranatayo ti Apo, isu nga inruarnatayo idiay Egipto tapno papatayendatayo dagitoy nga Amorreo. 28Apay a mapantayo sadiay? Mabutengkami. Imbaga dagiti imbaontayo a napigpigsa ken nataytayag ngem datayo dagiti tattao nga agnaed sadiay. Kunada nga agnaedda kadagiti siudad nga adda bakudna a dumanon sadi langit. Nakakitada kadagiti higante sadiay!’
29“Ngem imbagak idi kadakayo, ‘Dikay agbuteng kadakuada. 30Idalannakayto ti Apo a Diosyo. Isunto ti makigubat kas iti nakitayo nga inaramidna idiay Egipto. 31Uray#Ara. 13:18. idiay let-ang, nasaksianyo ti panangisangpetna kadakayo iti daytoy a lugar. Inawitnatayo a kas iti panangubba ti ama iti anakna agingga a dimmanonkayo ditoy. 32Ngem#Heb. 3:19. uray ania ti imbagak, dikay latta nagtalek iti Apo, 33isu a kanayon nga immun-una ngem dakayo tapno isapulannakayo iti lugar a pagkampoanyo.’ Tapno iturongnakayo iti dalan a pagnaanyo, nagna iti sangoananyo babaen iti monmon nga apuy iti rabii ken ulep iti aldaw.
Dusaen ti Dios ti Israel
(Num. 14:20-45)
34“Nangngeg#Heb. 3:18. ti Apo ti saoyo ket nakapungtot. Insapatana: 35‘Awanto ti uray maysa kadakayo iti daytoy managdakdakes a kaputotan ti makastrek iti nadam-eg a daga nga inkarik nga ited kadagiti kapuonanyo. 36Ninto la Caleb nga anak ni Jefone ti makastrek. Nagtalinaed a napudno kaniak ket itedkonto kenkuana ken kadagiti kaputotanna ti daga a winanawananna.’ 37Nakapungtot met kaniak ti Apo gapu kadakayo ket kinunana, ‘Uray sika, Moises, dikanto met makastrek iti daga. 38Ngem ni Josue nga anak ni Nun a katulongam ti makastrekto. Isaganam ni Josue a sumukat kenka ta isunto ti mangipangulo kadagiti Israelita a mangsakup iti daga.’
39“Kinuna pay ti Apo kadatayo, ‘Dagiti babassit nga annakyo a kunayo nga agbalin a balud ti gubat, isuda nga ubbing unay a di makailasin iti naimbag ken iti dakes—sumrekdanto iti daga. Itedkonto kadakuada ti daga ket isudanto ti mangsakup. 40Ngem no maipapan kadakayo, agsublikayo idiay let-ang iti dalan nga agturong iti Baybay a Karunoan.’
Maparmek dagiti Israelita idiay Horma
(Num. 14:39-45)
41“Kastoy ti insungbatyo, ‘Moises, nagbasolkami iti Apo, ngem dumarupkami a kas imbilin ti Apo a Diostayo.’ Insagana ngarud ti tunggal maysa dagiti armasna a makigubat gapu ta impagarupyo a nalaka a sakupen ti katurturodan a paset ti pagilian.
42“Ngem kinuna ti Apo kaniak, ‘Pakdaaram ida a dida dumarup ta diakto kumuyog kadakuada; parmekento ida dagiti kabusorda.’ 43Imbagak kadakayo ti sao ti Apo ngem dikayo nangikaskaso. Nagsukirkayo ket iti kinatangsityo, napankayo iti katurturodan a paset ti pagilian. 44Ngem kasla pangen ti alumpipinig dagiti Amorreo nga agnaed kadagita a katurturodan a nangdarup kadakayo. Sinunsondakayo agingga a naparmekkayo idiay Horma iti katurturodan a paset ti pagilian ti Edom. 45Gapu iti daytoy, nagpatulongkayo iti Apo ngem dinakay impangag wenno inkaskaso.
Dagiti Tawen a Kaadda dagiti Israelita iti Let-ang
46“Kalpasan ti nabayag a panagnaedtayo idiay Kades,
Currently Selected:
Deuteronomio 1: RIPV
Highlight
Share
Copy
Want to have your highlights saved across all your devices? Sign up or sign in
© 1996 Philippine Bible Society