SAN JUAN 20
20
Ndyu'ú Jesús chaca quiya'
1Ndyu'u scua cuacha li', tsa̱ clyo ji'i̱ semana; jua'a̱ tya lyiji quixee tso'o ti, lo'o ngutu'u María Magdalena ndyaa to' cuaá. Na'a̱ cha' cua laca ngutu'u tsu' quee tlyu nu ndyacu̱' to' cuaá bi', 2bi' cha' ngusna María ndyaa ca su nga'a̱ Simón Pedro lo'o chaca nu qui'yu nu ndyaca tsa'a̱ nu tyaca'a tsa ji'i̱ Jesús. Ndacha' María ji'i̱ ngu' bi':
―Cua ngulo ngu' ji'i̱ jyo'o Xu'na na su nguxatsi' ngu' ji'i̱ ne' tyuquee ―nacui̱ María ji'i̱ ngu'―. Ná jlo ti' ya mala ndyaa lo'o ngu' ji'i̱.
3Li' ngutu'u Pedro lo'o nu chaca yu, ngusna ngu' ndyaa ngu' nde to' cuaá. 4Tyucuaa ngu' ngusna ngu', pana lye la ngusna nu chaca yu, yala la ngulaa bi' to' cuaá. 5Li' nguxña'a̱ yu ne' tyuquee bi', na'a̱ yu cha' tya ntsiya late' lati loo nu ngüixi̱i̱ ngu' chu̱' jyo'o, pana ná ndyaa yu ca ne' tyuquee bi'. 6Li' ngulaa Simón Pedro to' cuaá lijya̱ lca'a̱ ji'i̱ nu chaca yu bi'. Hora ti ndyatí̱ Pedro ndyaa ne' tyuquee, na'a̱ cha' ndi'i̱ late' lati loo bi' tyuquee bi'. 7Lo'o jua'a̱ na'a̱ Pedro late' nu ndyacu̱' loo jyo'o, nguxcu̱' ti late' bi', ntsiya chaca se'i̱; nga'aa ntsiya lo'o late' lati loo nu ngüixi̱i̱ chu̱' jyo'o, ycui' ti late' bi' ntsiya. 8Li' lo'o nu chaca yu nu ngulaa yala la, lo'o yu bi' ndyatí̱ yu ne' tyuquee, ndyaa na'a̱ yu ñi'ya̱ ña'a̱ ne' cuaá. Ca li' jlya tso'o ti' yu; 9li' ngua cuayá' ti' ngu' cha' ñi'ya̱ nu nscua lo quityi cusu' cha' ntsu'u cha' tyu'ú Jesús chaca quiya' lo'o nguatsi', jua'a̱ ngua cha' bi'. 10Li' nguxtyu̱u̱ ngu', tyucuaa ngu' nu ngua tsa'a̱ ji'i̱ Jesús bi', ndyaa ngu' su ndi'i̱ ngu' tya'a ngua tsa'a̱ ngu'.
Ngutu'u tu̱ Jesús su ndu̱ María Magdalena
11Pana nu María bi' ni, ndyanu cho' to' tyuquee bi', ndyunaa tsa cho'. Laja lo'o ndyunaa ti cho', li' nguxña'a̱ cho' nde ne' tyuquee bi', 12na'a̱ ji'i̱ tucua tya'a xca̱ ji'i̱ ycui' Ndyosi nu ngutu'u ya̱a̱ nde cua̱. Ngati̱ tsa ña'a̱ ste' ngu' nu ndu'u tucua nde bi'. Ca su nguscua jyo'o Jesús tya la ti ti, ca bi' ndyaa tucua ngu'; tsaca yu ndyaa tucua nde su nguscua hique jyo'o bi', chaca yu ndyaa tucua nde su nguscua quiya' yu. 13Li' nchcuane xca̱ bi' ji'i̱ María:
―¿Ni cha' laca lye tsa ndyunaa nu'u̱?
Li' nguxacui̱ María cha' ji'i̱ xca̱ bi':
―Cua ngulo ngu' ji'i̱ jyo'o Xu'na na' ―nacui̱―, lo'o ná jlo ti' na' mala ndyaa lo'o ngu' ji'i̱ ndyaa.
14Lo'o ndye nchcui' María lo'o xca̱ bi', nguxña'a̱ cho' nde chu̱' cho', lo'o li' na'a̱ cho' cha' ndu̱ Jesús nde bi', pana ná ndyuloo María ji'i̱ yu. 15Li' nchcuane Jesús ji'i̱:
―¿Ni cha' laca lye tsa ndyunaa nu'u̱? ―nacui̱ yu ji'i̱ nu Maria bi'―. ¿Ti ji'i̱ nclyana nu'u̱ ndya'a̱?
Ngua ti' María cha' nu ca ji'i̱ yaca tyacala' laca nu ndu̱ bi', bi' cha' nchcui' lo'o yu li':
―Si nu'u̱ laca nu ngulotsu' ji'i̱ jyo'o nu nguatsi' re, cusu' ―nacui̱ ji'i̱ yu―, cua'ni nu'u̱ cha' tso'o cuacha' clya xi 'na mala ndyaa lo'o nu'u̱ ji'i̱, cha' li' tsaa lo'o na' ji'i̱ jyo'o bi' chaca se'i̱ su tso'o la.
16―¡María! ―nacui̱ Jesús ji'i̱ li'.
Lo'o li' nguxtyacui María na'a̱ su ndu̱ Jesús.
―¡Raboni! ―nacui̱. (Sca cha' hebreo laca; La Mstru 'na, jua'a̱ nti' ñacui̱ cha' bi'.)
17Li' nchcui' Jesús lo'o María:
―Ná cala' nu'u̱ jna' cha' tya lyiji tya'a na' nde cua̱ ca su ntucua Sti na' ―nacui̱―. Nu juani, yaa clya nu'u̱ su ndi'i̱ nu xa' la ñati̱ nu cua ngusñi cha' 'na, yaa cacha' nu'u̱ ji'i̱ ngu' bi', cha' cua tyacuí̱ ti na' tya'a na' ca su ntucua ycui' Ndyosi Sti na', nu laca Sti ma̱. Tya'a na' ca su ntucua ycui' Ndyosi nu Xu'na na', nu bi' nu laca ycui' Ndyosi nu Xu'na ma̱.
18Li' ndyaa María Magdalena su ndi'i̱ ngu' nu ngua tsa'a̱ ji'i̱, ndyaa cacha' ji'i̱ ngu':
―Cua na'a̱ na' ji'i̱ ycui' nu Xu'na na tsa̱ ―nacui̱.
Lo'o li' nda nu cuna'a̱ bi' cha' lo'o ngu', lcaa ña'a̱ cha' nu cua nacui̱ Jesús ji'i̱.
Xa' la tyempo lo'o ndu'u tucua Jesús slo ñati̱ ji'i̱
19La cui' talya tsa̱ clyo ji'i̱ semana bi', cua nga'a̱ ya' ni'i̱ su ndyu'u ti'i̱ ngu' nu ngua tsa'a̱ ji'i̱ Jesús, cha' ntsi̱i̱ ngu' ji'i̱ ngu' judío. Li' ya̱a̱ Jesús, ndatu̱ slo ngu' bi'.
―Ti̱ ti tyi'i̱ tyiquee ma̱, ná culacua tsa ti' ma̱ ―nacui̱ yu ji'i̱ ngu' bi'.
20Li' ngulu'u Jesús tyuu ya' yu ji'i̱ ngu', ngulu'u yu sii' yu ji'i̱ ngu', su ngua quicha yu. Lo'o na'a̱ ngu' nu ngua tsa'a̱ ji'i̱ ycui' nu Xu'na ngu', tso'o tsa ntsu'u tyiquee ngu' li'. 21Chaca quiya' nchcui' Jesús lo'o ngu' li':
―Ti̱ ti tyi'i̱ tyiquee ma̱, ná culacua tsa ti' ma̱ ―nacui̱ yu ji'i̱ ngu'―. Ñi'ya̱ lo'o nda Sti na' 'na lijya̱a̱ chalyuu, jua'a̱ ta na' ji'i̱ ma̱ cha' tsaa ma̱ tyucui ña'a̱ chalyuu.
22Ngulo tu'u Jesús lo ngu' bi' li'.
―Tyanu Xtyi'i ycui' Ndyosi ne' cresiya ji'i̱ ma̱ juani ―nacui̱ yu ji'i̱ ngu' bi'―. 23Cua'ni clyu ti' ycui' Ndyosi ji'i̱ qui'ya nu ntsu'u ji'i̱ ñati̱ lo'o chcui' ma̱ lo'o ngu' cha' cua'ni clyu ti' Ni ji'i̱ ngu', lo'o jua'a̱ tyanu qui'ya nu ntsu'u ji'i̱ ñati̱ lo'o chcui' ma̱ lo'o ngu' cha' ná cua'ni clyu ti' Ni ji'i̱ ngu'.
Na'a̱ Tomás ji'i̱ ycui' Jesús
24Cua ntsu'u sca nu qui'yu tya'a nu tii tyucuaa tya'a ngu', nu naa Tomás nu Culaca'. Ná lo'o Tomás ndi'i̱ lo'o nu xa' tya'a ngu' nu ngua tsa'a̱ bi', nu lo'o ndyaa Jesús slo ngu'. 25Li' nacui̱ ngu' tya'a ngua tsa'a̱ ji'i̱ Tomás:
―Cua na'a̱ ya ji'i̱ ycui' nu Xu'na na ―nacui̱ ngu'.
Li' nchcui' Tomás lo'o ngu':
―Lo'o cua na'a̱ na' ca su ngujuo' ngu' clavo ya' ycui', li' jlya ti' na' cha' la cui' yu laca bi' ―nacui̱―. Lo'o cua ndyojo' sne ya' na' cuityu su ngujuo' ngu' clavo ya' yu, lo'o cua ndyojo' ya' na' ca su ntucua cuityu sii' yu, ca li' jlya ti' na' ―nacui̱ Tomás.
26Li' cua ndu'u scua snu' tsa̱, ndyalaa ngu' nu ngua tsa'a̱ ji'i̱ Jesús toni'i̱ chaca quiya'; lo'o Tomás ndi'i̱ lo'o ngu' li'. Cua ndyacu̱' toni'i̱, li' ndyatí̱ Jesús ni'i̱ jua'a̱ ti, ndyatu̱ yu slo ngu' bi'. Li' nchcui' yu lo'o ngu':
―Ti̱ ti tyi'i̱ tyiquee ma̱.
27Li' nchcui' Jesús lo'o ycui' Tomás:
―Cua̱a̱ nu'u̱ ca nde, cojo' sne ya' nu'u̱ su ntucua cuityu ya' na' ―nacui̱―. Ña'a̱ tso'o nu'u̱ su ntucua cuityu ya' na' re. Cua̱a̱ nu'u̱, cojo' ya' sii' na'. Nga'aa cua'ni nu'u̱ cha' ná jlya ti' nu'u̱ 'na, taca jlya tso'o ti' nu'u̱ 'na juani ―nacui̱ Jesús.
28―Xu'na na' laca nu'u̱, cusu' ―nacui̱ Tomás ji'i̱ Jesús―, lo'o jua'a̱ Ndyosi jna' laca nu'u̱.
29―Jlya ti' nu'u̱ juani cha' cua na'a̱ nu'u̱ jna' ―nacui̱ Jesús ji'i̱ Tomás―, pana tso'o la caca tyiquee ñati̱ nu jlya ti' 'na lo'o bilya ña'a̱ ngu' 'na.
Ni cha' laca cua nscua quityi re
30Chañi cha' ngua'ni Jesús quiña'a̱ la cha' tlyu cha' cube ti' ñati̱ ji'i̱ ycui' Ndyosi Sti yu. Na'a̱ ngu' nu ngua tsa'a̱ ji'i̱ cha' bi', masi ná nchcui' quityi re cha' ji'i̱ lcaa cha' bi'. 31Cha' nu nscua lo quityi re ni, nscua bi' cha' taca jlya ti' ma̱ cha' Jesús laca Cristo nu cua nda ycui' Ndyosi ji'i̱ lijya̱ chalyuu, cha' taca xñi ma̱ cha' ji'i̱ Jesús, cha' laca yu nu sca ti Sñi' ycui' Ndyosi. Li' caja chalyuu tso'o nu ná nga'a̱ cha' tye ji'i̱ ma̱ chacuayá' ji'i̱ ycui' Jesús.
Currently Selected:
SAN JUAN 20: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.