SAN JUAN 18
18
Ndyaa lo'o ngu' ji'i̱ Jesús preso
1Ndye nchcui' Jesús cha' bi' lo'o ngu' nu ndyaca tsa'a̱ ji'i̱, li' ngutu'u Jesús ndyaa yu lo'o ngu'. Nteje tacui ngu' ndyaa ngu' ca chaca tsu' sta'a̱ Cedrón, sca sta'a̱ lati nu nscua to' quichi̱ Jerusalén. Tacala' xi lo yuu nde bi' su ndi'i̱ xi yaca cuiñii ji'i̱ ngu', ca bi' ndyaa Jesús lo'o ngu' nu ndyaca tsa'a̱ ji'i̱. 2Lo'o nu Judas nu cua ndyujui' cresiya ji'i̱ Jesús ji'i̱ ngu' cuxi ni, lo'o Judas jlo ti' mala su ndyaa ngu', cha' cua tyu̱u̱ quiya' ndyu'u ti'i̱ ngu' nu ndyaca tsa'a̱ ji'i̱ lo'o Jesús ca bi'. 3Bi' cha' ndyaa lo'o Judas ji'i̱ sca taju sendaru lo'o policía nu nda ngu' tlyu ji'i̱ ndyaa, la cui' sti jo'ó nu laca loo bi' lo'o ngu' fariseo. Lo'o xee lámpara, lo'o quii' quityee, lo'o chcua̱ cusu̱u̱ ntucua ya' ngu' ndyaa ngu'. Li' ndyaa lo'o Judas ji'i̱ ngu' bi' ca su ndi'i̱ yaca cuiñii bi'. 4Jlo ti' Jesús lcaa cha' nu nga'a̱ cha' cua'ni ngu' lo'o yu, bi' cha' ndyaa yu ndyacua tya'a yu lo'o ngu' xña'a̱ bi' tyucui̱i̱ su lijya̱ ngu'. Li' nchcuane Jesús ji'i̱ ngu':
―¿Ti ji'i̱ lijya̱ ma̱ yaana ma̱? ―nacui̱ yu ji'i̱ ngu' bi'.
5―Ji'i̱ Jesús, ngu' Nazaret, bi' laca nu nclyana ya ji'i̱ ―nacui̱ ngu'.
―Na' laca̱ bi' ―nacui̱ Jesús ji'i̱ ngu' li'.
Lo'o jua'a̱ stu'ba ti ndu̱ Judas lo'o ngu', nu Judas nu cua ndyujui' cresiya ji'i̱ Jesús ji'i̱ nu ngu' xña'a̱ bi'. 6Lo'o cua nchcui' Jesús cha': “Na' laca̱ bi'”, nacui̱ yu, hora ti nguta'a̱chu̱' ngu' li', ndyaa stii ngu' lo yuu. 7Chaca quiya' nchcuane Jesús ji'i̱ ngu':
―¿Ti ji'i̱ nclyana ma̱ ndya'a̱ ma̱? ―nacui̱.
―Ji'i̱ Jesús, ngu' Nazaret, yu bi' laca nu nti' ya ―nacui̱ ngu'.
8―Cua ni na' ji'i̱ ma̱ tsa̱ cha' na' laca̱ bi' ―nacui̱ Jesús ji'i̱ ngu' li'―. Si jna' ti nti' ma̱, ta ma̱ chacuayá' tyaa laja ti nu xa' la ngu' tya'a ndya'a̱ na' re.
9Nchcui' Jesús lo'o ngu' jua'a̱, cha' caca ñi'ya̱ nu cua nchcui' ca Jesús lo'o ycui' Ndyosi Sti yu, nu lo'o cua nacui̱ yu ndi'ya̱: “Ni tsaca ñati̱ nu cua nda nu'u̱ 'na, ná nguna' ngu' 'na”. 10Li' ngulo Simón Pedro xlyu cusu̱u̱ nu nga'a̱ sii', ngujui'i̱ Pedro xlyu ji'i̱ ngu', ngusi'yu cu' jyaca̱ la'a tsu' cui̱ sca nu naa Malco; msu ji'i̱ xu'na sti jo'ó laca bi'. 11Hora ti nchcui' Jesús lo'o Pedro:
―Xco'o clya xlyu cua hi̱ ne' quiji̱. Na cua nda ycui' Ndyosi Sti na' chacuayá' ji'i̱ ngu' cha' xcube' ngu' 'na. ¿Ha ná tso'o cha' jua'a̱ caca 'na nti' nu'u̱?
Ndu̱ Jesús nde loo xu'na sti jo'ó
12Cua ngua li', lo'o nu sendaru, lo'o xu'na sendaru, lo'o policía ji'i̱ ngu' judío, ntejeya' ngu' ji'i̱ Jesús, tachaa ngusca̱' ngu' ji'i̱ yu li'. 13Clyo ndyaa lo'o ngu' ji'i̱ yu slo sca nu cusu' nu naa Anás, sti laa Caifás nu ngua xu'na sti jo'ó yija̱ bi'. 14La cui' Caifás ngua nu nda cha' lo'o ngu' judío tya tsubi' la cha' caca tso'o la xi ji'i̱ ngu' quichi̱ masi cajaa sca ñati̱, cha' ná ntsu'u cha' cajaa lcaa ñati̱ li'.
Ndyutsi̱i̱ Pedro cha' tyuloo ji'i̱ Jesús slo ñati̱
15Ndya'a̱ Simón Pedro lca'a̱ ji'i̱ Jesús tyijyu' ti. Lo'o jua'a̱ chaca nu ndyaca tsa'a̱ ji'i̱ Jesús, lo'o nu qui'yu bi' lca'a̱ ji'i̱ Jesús. Ndyuloo tso'o nu bi' ji'i̱ sti jo'ó Anás, bi' cha' ndyaa lca'a̱ ji'i̱ Jesús ca nde ni'i̱ tlyu, nu laca to' tyi sti jo'ó bi'. 16Pana ndyanu Pedro nde liya'; bi' cha' ndyaa nu chaca, ndyaa nchcui' lo'o sca nu cuna'a̱ cua' nu ndu̱ cua̱ toni'i̱. Li' ndyaa lo'o ji'i̱ Pedro nde ni'i̱. 17Nacui̱ nu cuna'a̱ cua' nu ndu̱ toni'i̱ bi' ji'i̱ Pedro:
―¿Ha lo'o nu'u̱ ndyaca tsa'a̱ ji'i̱ yu jua lacua? ―nacui̱ nu cuna'a̱ bi' ji'i̱.
―Si'i na' ―nacui̱ Pedro.
18Laja li' nu ngu' msu lo'o ngu' policía bi', cua nguxtyu'u ngu' quii' nchcubi' nde bi', cha' tlya' tsa; ndu̱ ngu' to' lquii' bi', cha' caca chcatsu̱ ngu'. Lo'o Pedro ndu̱ lo'o ngu' bi' li', cha' lo'o nti' caca chcatsu̱ ti' to' lquii'.
Nchcuane sti jo'ó nu laca loo ji'i̱ Jesús
19Nchcuane sti jo'ó nu laca loo ji'i̱ Jesús li':
―¿Tilaca laca nu ndyaca tsa'a̱ jinu'u̱? ¿Ñi'ya̱ cha' laca nu nclu'u nu'u̱ ji'i̱ ngu'?
20Li' nguxacui̱ Jesús cha' ji'i̱ sti jo'ó bi':
―Lcua ti se'i̱ su ndya'a̱ na', liñi nchcui' na' lo'o ngu' ña'a̱ cuayá' nu cuna lcaa ñati̱ ―nacui̱ yu―. Masi ne' laa sube ti, masi ne' laa tlyu, lcaa su ndyu'u ti'i̱ ngu' judío, ca bi' ngulu'u na' ji'i̱ ngu'; ni sca quiya' ná nchcui' na' cuaana ti lo'o ngu'. 21¿Ni cha' laca nchcuane nu'u̱ jna'? Cuacha' nu'u̱ ji'i̱ ñati̱ nu cua ndyuna cha' nu nchcui' na' ni cha' nda na' lo'o ngu' bi'. Jlo ti' ngu' lcaa cha' nu ngulu'u na' ji'i̱ ngu'.
22Lo'o nchcui' Jesús jua'a̱, li' ngujui'i̱ ya' sca policía tu'ba yu:
―Ná tso'o xacui̱ nu'u̱ cha' jua'a̱ ji'i̱ sti jo'ó nu laca loo ―nacui̱ policia li'.
23―Si cuxi ti nchcui' na' ngua ti' ma̱, cuacha' clya ma̱ 'na ni cha' cuxi laca bi' ―nacui̱ Jesús li'―. Pana cua nchcui' na' cha' liñi lo'o ma̱. ¿Ni cha' laca ngujui'i̱ ya' ma̱ tu'ba na' li'? ―nacui̱ Jesús.
24Li' ngulo nu cusu' Anás cña ji'i̱ ngu' cha' tyaa lo'o ngu' ji'i̱ Jesús, ña'a̱ ndyaaca̱' ti, slo Caifás, nu laca xu'na sti jo'ó bi'.
Tya chaca quiya' ná ntaja'a̱ Pedro ta cha' liñi lo'o ngu'
25Laja li' ndu̱ Pedro to' lquii' cha' caca chcatsu̱ ti'. Nchcui' nu xa' ñati̱ nu ndi'i̱ nde bi' lo'o Pedro li':
―¿Ha lo'o nu'u̱ ndyaca tsa'a̱ ji'i̱ yu jua?
Ná ntaja'a̱ Pedro ta cha' liñi lo'o ngu'.
―Ná lo'o na' ―nacui̱.
26Lo'o nde bi' ndi'i̱ sca msu ji'i̱ xu'na sti jo'ó bi', la cui' tya'a lo'o nu ngusi'yu cu' Pedro jyaca̱ bi'. Nchcui' msu bi' lo'o Pedro li':
―¿Ha ná cua na'a̱ na' hi̱ tsaca quiya' tsa̱ lo'o ndyaa nu'u̱ lo'o yu jua ne' yaca cuiñii bi'? ―nacui̱ msu bi'.
27Xa' nchcui' Pedro cha' ná lo'o ndyaa, lo'o la cui' hora li' ngusi'ya ndye'e.
Ngua cuayá' ji'i̱ Jesús slo Pilato
28Li' ngutu'u ngu' slo Caifás, ndyaa lo'o ngu' ji'i̱ Jesús ca su ndi'i̱ nu gobernador romano nu naa Pilato. Cua cuxee ti ndyaca li', bi' cha' ná ntaja'a̱ nu ngu' judío bi' tyatí̱ ngu' ne' ni'i̱ ji'i̱ gobernador; tacati tsa ndu'ni ngu' bi' xqui'ya ta'a. Ngua ti' ngu' cha' quiñu'u̱ cha' ji'i̱ ngu' si tyatí̱ ngu' ne' ni'i̱ ji'i̱ ngu' xa' tsu', cha' ná ntsu'u chacuayá' cacu ngu' si̱i̱ ta'a bi' li'; 29bi' cha' ngutu'u nu naa Pilato, nu laca gobernador bi', ndyaa slo ngu' judío cha' xcuane ji'i̱ ngu' ndi'ya̱:
―¿Ni qui'ya ngusta ma̱ hichu̱' yu re? ―nacui̱ Pilato ji'i̱ ngu'.
30Li' nguxtyacui ngu' cha' lo'o Pilato:
―Si ná ntsu'u qui'ya ji'i̱ yu, ná ca̱a̱ lo'o ya ji'i̱ yu slo nu'u̱, cusu' ―nacui̱ ngu' ji'i̱.
31―Yaa lo'o ma̱ ji'i̱ yu re cha' cua'ni cuayá' ma̱ ji'i̱ yu cuentya ji'i̱ cha' cusu' nu ntsu'u ji'i̱ ycui' ca ma̱ ―nacui̱ Pilato ji'i̱ ngu' li'.
Nguxacui̱ nu ngu' judío bi' cha' ji'i̱ Pilato li':
―Ná ntsu'u chacuayá' ji'i̱ ya cha' cujuii ya ji'i̱ sca ñati̱ jua'a̱, cha' ngu' judío laca ya ―nacui̱ ngu'.
32Lo'o ngua'ni ngu' jua'a̱, li' ngutu'u tucua cha' nu cua nchcui' Jesús lo'o ngu', ñi'ya̱ ña'a̱ cajaa ycui' ca. 33Li' nguxtyu̱u̱ Pilato ndyaa toni'i̱ ji'i̱, ngusi'ya ji'i̱ Jesús cha' tya̱a̱ slo:
―¿Ha nu'u̱ laca rey nu laca loo ji'i̱ ngu' judío? ―nacui̱ Pilato ji'i̱ Jesús.
34Nchcui' Jesús lo'o nu cusu' bi' li':
―¿Ha cha' ngua'ya hique ycui' ca nu'u̱ laca cha' cua? ¿Ha xa' ñati̱ ndacha' jinu'u̱ cha' jua'a̱ laca na'? ―nacui̱ Jesús ji'i̱ Pilato.
35―¿Ha ngu' judío laca na' nti' nu'u̱? ―nacui̱ Pilato li'―. Jlo ti' nu'u̱ cha' ñati̱ tya'a quichi̱ tyi nu'u̱, lo'o jua'a̱ sti jo'ó nu laca loo ji'i̱ ngu', bi' ngu' laca nu cua ya̱a̱ lo'o jinu'u̱ cha' ca cuayá' jinu'u̱ slo na'.
36―Si laca na' sca rey jua'a̱ ―nacui̱ Jesús―, li' cua nxu̱u̱ tya'a ngu' tya'a ndya'a̱ na' lo'o ngu' judío jua cha' ná xñi ngu' 'na ―nacui̱―. Pana si'i ñati̱ chalyuu laca nu cua ngusta 'na cha' caca na' loo ji'i̱ ngu'.
37―¿Ha laca nu'u̱ rey lacua? ―nacui̱ Pilato.
Li' nguxtyacui Jesús cha' lo'o nu cusu' bi' chaca quiya':
―Nu'u̱ nacui̱ cha' laca na' rey. Cña nu ntsu'u 'na laca cha' chcui' liñi na' ji'i̱ lcaa cha' nu ntsu'u slo ycui' Ndyosi lo'o ngu'; bi' cha' ngula na' chalyuu, bi' cha' lijya̱ na' lo yuu cha' chcui' liñi na' lcaa cha' ji'i̱ ycui' Ndyosi lo'o ñati̱. Cuna ngu' lcaa cha' nu nchcui' na' si ná ndyacu̱' hique ngu' ji'i̱ cha' liñi bi'.
38Li' nchcui' Pilato lo'o Jesús:
―Ná jlo ti' na' si ntsu'u cha' liñi jua'a̱ nde chalyuu ―nacui̱.
Ngulo Pilato cña cha' cujuii ngu' ji'i̱ Jesús
Li' ngutu'u Pilato nde liya', ndyaa nde su ndu̱ nu ngu' judío bi' chaca quiya'.
―Cuentya jna', ná ntsu'u qui'ya ji'i̱ yu jua, ná ntsu'u cha' xcube' na' ji'i̱ yu ―nacui̱ Pilato ji'i̱ ngu' judío―. 39Pana cua ngui'i̱ ma̱ cha' ndu'ni lyaá na' ji'i̱ sca ngu' preso lcaa yija̱ lo'o nchca tsa̱ ta'a pascua ―nacui̱ Pilato li'―. ¿Ha cua nti' ma̱ cha' cua'ni lyaá na' ji'i̱ yu jua nu laca rey ji'i̱ cu'ma̱ ngu' judío?
40Cui̱i̱ ngusi'ya lo'o ngu' ji'i̱ chaca quiya':
―Si'i ji'i̱ yu jua nti' ya. Ji'i̱ Barrabás cua'ni lyaá nu'u̱ ―nacui̱ ngu'.
Lo'o nu naa Barrabás ni, si'i ñati̱ tso'o laca bi'; tyaala tsa Barrabás, la cui' ñati̱ cuaana laca.
Currently Selected:
SAN JUAN 18: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.