1 CORINTIOS 1
1
1Pablo laca na' nu nscua̱ quityi re, lo'o jua'a̱ stu'ba ti ntucua na' lo'o Sóstenes tya'a ndyu'ni na' cña. Chacuayá' ji'i̱ ycui' Ndyosi ndya'a̱ na' nchcui' na' cha' ji'i̱ Jesucristo lo'o lcaa ñati̱. 2Nscua na' quityi re cha' ca̱a̱ slo cu'ma̱, ngu' taju ñati̱ ji'i̱ Jesucristo nu ndi'i̱ ma̱ nde quichi̱ Corinto. Xqui'ya Jesucristo cua ngusubi Ni ji'i̱ ma̱, lo'o juani laca ma̱ ñati̱ ji'i̱ ycui' Ni; nga'a̱ cha' tyi'u ti' ma̱ ji'i̱ Ni lcua ti lo cña nu ndu'ni ma̱ su ndi'i̱ ma̱ chalyuu. Stu'ba cha' ji'i̱ ma̱ lo'o cua ña'a̱ ca ñati̱ nu ndu'ni tlyu ji'i̱ Jesucristo nu Xu'na na tyucui ña'a̱ chalyuu, cha' ñi'ya̱ laca Ni Xu'na na, jua'a̱ laca Ni Xu'na ngu' bi'. 3Ndi'ya̱ nti' na': cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.
Lcaa cha' tso'o nu caja ji'na xqui'ya Cristo
4Lcaa tsa̱ nda na' xlya'be ji'i̱ ycui' Ndyosi xqui'ya cu'ma̱, cha' cua nda Ni cha' tso'o lo'o ma̱ xqui'ya Jesucristo. 5Ntsu'u tsa cha' nu cua nda ycui' Ndyosi lo'o ma̱, cha' cua ngua stu'ba cha' ji'i̱ ma̱ lo'o Cristo; bi' laca cha' nu ntsu'u ne' cresiya ji'i̱ ma̱ juani. Bi' cha' cua jlo tso'o ti' ma̱ lcaa cha' nu ji'i̱ Jesús, lo'o jua'a̱ nchca ji'i̱ ma̱ nchcui' ma̱ cha' bi' lo'o ñati̱. 6Jua'a̱ nchca cuayá' ti' xa' ñati̱ cha' liñi laca cha' nu ngusñi ma̱ ji'i̱ Jesús, cha' cua na'a̱ ngu' lcaa cña nu ndu'ni ma̱ su ndi'i̱ ma̱ chalyuu. 7Ná sca cha' lyiji ji'i̱ ma̱ ne' cresiya ji'i̱ ma̱; lcaa cña nchca ji'i̱ ma̱ tyempo juani, xqui'ya cha' ndu̱ tsa ti' ma̱ cha' ca̱a̱ Jesucristo nu Xu'na na chaca quiya'. 8Ycui' Jesús laca nu cua'ni cha' tyanu tachaa cha' ne' cresiya ji'i̱ ma̱ ña'a̱ cuayá' nu tye chalyuu ji'i̱ ma̱. Lo'o li' ná ntsu'u qui'ya nu sta ycui' Ndyosi hichu̱' ma̱ lo'o ca̱a̱ Jesucristo nu Xu'na na cha' cua'ni cuayá' Ni ji'i̱ ñati̱ chalyuu. 9Ycui' Ndyosi ndu'ni cña, lcaa cña nu cua nacui̱ Ni cha' cua'ni Ni; bi' laca nu ngusubi ji'i̱ ma̱ cha' caca stu'ba cha' ji'i̱ ma̱ lo'o Jesucristo nu Xu'na na, nu sca ti Sñi' ycui' Ndyosi.
Tsa cla'be ti ngu' nchcui' ngu' tsaca cha'
10Cu'ma̱ tya'a ngusñi na cha' ji'i̱ Cristo, chcui' na' lo'o cu'ma̱ juani chacuayá' ji'i̱ ycui' Jesucristo nu Xu'na na, cha' caca stu'ba cha' ji'i̱ lcaa cu'ma̱ lo'o tya'a ma̱, cha' ná chcui' ma̱ tucua lo cha'. Tso'o ti tyi'i̱ ma̱ lo'o tya'a ma̱, sca ti cha' culacua ti' ma̱, sca ti cha' tyu'u tyiquee ma̱. 11Tsubi' ti ngujui cha' jna', nu lo'o nacui̱ ngu' tya'a Cloé 'na cha' ntsu'u tsa cha' cusu̱u̱ ji'i̱ ma̱ lo'o tya'a ma̱, cha' ná stu'ba cha' ji'i̱ ma̱ lo'o tya'a ma̱; 12xa' ña'a̱ nchcui' sa scaa ma̱. Ntsu'u sca taju ji'i̱ ma̱ nu nacui̱: “Ji'i̱ Pablo ngusñi ya cha'”; chaca taju ji'i̱ ma̱ nacui̱: “Ñati̱ ji'i̱ Apolos laca ya”; jua'a̱ tya xa' la ngu' taju ji'i̱ ma̱ nacui̱ ngu': “Ñati̱ ji'i̱ Pedro laca ya”; jua'a̱ tya xa' la ngu' nacui̱: “Ñati̱ ji'i̱ Cristo laca ya”. 13¿Ha tyu̱u̱ tya'a nu laca Cristo ntsu'u chalyuu cha' cua'ni lyaá ji'i̱ ma̱ lacua? ¿Ha jna' nu ngujui'i̱ ca'a̱ ngu' 'na lo crusi cha' cajaa na' xqui'ya cu'ma̱? ¿Ha cuentya jna' cua ntyucuatya ma̱? 14Ni tsaca ma̱ ná ntyucuatya na' ji'i̱ ma̱. Tso'o jua'a̱ nti' na' cuentya ji'i̱ ycui' Ndyosi cha' si'i na' laca̱ nu ngua'ni ji'i̱, masi ntsu'u tucua tya'a ti ngu' nu cua ntyucuatya na' ji'i̱, yu Crispo lo'o yu Gayo. 15Ná ca ñacui̱ ngu' cha' cua ntyucuatya ma̱ cuentya jna' lacua. 16Tyu'u cha' clyu ti' ji'i̱ ma̱, ndyi'u ti' na' cha' lo'o ji'i̱ yu Estéfanas, lo'o ji'i̱ ngu' tya'a ndi'i̱ yu, cua ntyucuatya na' ji'i̱ ngu' bi'; pana ná ntsu'u ti' na' si cua ntyucuatya na' ji'i̱ xa' la ngu'. 17Si'i cha' tyucuatya na' ji'i̱ ñati̱ nda ycui' Ndyosi cña 'na lijya̱a̱; cua ngulo Ni cña 'na cha' tsa'a̱ chcui̱' cha' tso'o nu ntsu'u ji'i̱ Jesús lo'o ñati̱. Si'i na lijya̱ na' lo'o quiña'a̱ tsa cha' nu culo hique ti na', ñi'ya̱ nchcui' ñati̱ chalyuu nu nchca tsa ji'i̱; si jua'a̱, ná ca cuaya' ti' ñati̱ ñi'ya̱ ngua cha' tlyu nu ngua'ni Cristo lo'o ngujuii yu lo crusi.
Cristo ntucua su̱u̱ lcaa cha' nu cua nti' ycui' Ndyosi cha' caca cuayá' ti' na ji'i̱
18Ñati̱ nu ngunu'u̱ chalyuu ji'i̱ xqui'ya cha' cuxi nu ndu'ni ngu', ná nchca cuayá' ti' ngu' bi' tsiya' ti; na nxtyí lo'o ti ngu' ji'na si chcui' na lo'o ngu' ñi'ya̱ ntsu'u cha' ji'i̱ Cristo, cha' ngujuii yu lo crusi xqui'ya na cha' cuityi̱ Ni qui'ya nu ntsu'u ji'na. Pana nu na ni, nu clyaá na ji'i̱ qui'ya nu ntsu'u ji'na xqui'ya Cristo, tlyu tsa cña ngua'ni ycui' Ndyosi, jua'a̱ nti' na. 19Ntsu'u sca cha' nu nscua lo quityi cusu' ji'i̱ ycui' Ndyosi nu nchcui' ndi'ya̱:
Cua'ni tye na' ji'i̱ lcaa cha' nu nchcui' ñati̱ nu nchca tsa ji'i̱, nacui̱ ycui' Ndyosi.
Nga'aa taquiya' na' ji'i̱ cha' nu nclyo hique ti ñati̱ nu ngua tsa'a̱ tso'o ti, nacui̱ Ni.
20¿Ni cña tso'o cuentya ji'i̱ ycui' Ndyosi ndu'ni ñati̱ nu nchca tsa ji'i̱ lacua? ¿Ni cña ndu'ni ngu' nu ngua tsa'a̱ tso'o ti? ¿Ni cña ndu'ni ngu' nu nchca tsa nchcui' lacua? Sca ti nde chalyuu cua'nijo'o cña bi' ji'i̱ ngu'. Cua nacui̱ ycui' Ndyosi ji'na cha' ná tso'o tsiya' ti sca cha' nu ngua tsa'a̱ ñati̱ chalyuu ti, cha' tonto laca bi'. 21Ngua'ni Ni cha' ná caja ñi'ya̱ tyuloo ñati̱ chalyuu ji'i̱ Ni cha' hique ti ngu'; jua'a̱ tso'o la, ngua ti' ycui' Ndyosi. Pana ndu'ni lyaá Ni ji'i̱ ñati̱ nu xñi cha' ji'i̱ Ni; la cui' cha' nu ndacha' na ji'i̱ ngu', masi cha' tonto nchcui' na, nacui̱ ngu' li'.
22Cua nti' ngu' judío cha' cua'ni na sca cha' tlyu slo ngu', cha' jlya ti' ngu' cha' nu chcui' na lo'o li'; cuati nu ngu' xa' tsu' ni, cua nti' ngu' cha' tso'o tsa jlo ti' na lcaa cha' lo'o chcui' na lo'o ngu'. 23Pana nu na ni, ndacha' na ji'i̱ ngu' cha' ji'i̱ Cristo nu cua ngujuii lo crusi cha' cua'ni lyaá ji'na. Li' chiya'a̱ nti' ngu' judío lo'o ndyuna ngu' cha' nu nchcui' na re; lo'o jua'a̱ ngu' xa' tsu', cha' tonto nchcui' na nti' ngu' bi', si'i cha' bi' tsiya' ti nti' ngu' bi'. 24Pana xa' ña'a̱ nti' lcaa tya'a na nu cua ngusubi ycui' Ndyosi ji'na, masi laca na ngu' judío, masi laca na ngu' xa' tsu'. Sca ti cha' ji'i̱ Cristo nchcui' na, cha' ji'i̱ ycui' Cristo ntsu'u lcaa chacuayá', lcaa cha' tso'o nu cua nti' ycui' Ndyosi cha' caca cuayá' ti' na. 25Tso'o tsa ndyu'u cua ña'a̱ ca cha' nu nchcui' ycui' Ndyosi, masi ñacui̱ ñati̱ chalyuu cha' tonto tsa laca cha' bi'; pana cuxi la ndyu'u lcaa cha' tlyu nu nda ñati̱ chalyuu nu nchca tsa ji'i̱, nti' ngu'. La cui' jua'a̱ nguula la cña ndyaca, cua ña'a̱ ca cña nu ndu'ni ycui' Ndyosi, masi ñacui̱ ngu' cha' ná nchca ji'i̱ Ni; pana cuxi la cña ndyaca nu ndu'ni ycui' ca ñati̱. 26Cu'ma̱ tya'a ngusñi na cha' ji'i̱ Cristo, tyi'u ti' ma̱ juani ñi'ya̱ ña'a̱ ñati̱ ngua ma̱ tya clyo, nu lo'o ngusubi ca ti Ni ji'i̱ ma̱: sca tucua ti ma̱ nu nchca tsa ji'i̱ ma̱; si'i ñati̱ tlyu laca ma̱, si'i ñati̱ culiya' laca ma̱ su ndi'i̱ ma̱ chalyuu, sca tucua ti cu'ma̱ nu tso'o laca xi ji'i̱ ma̱. 27La cui' cu'ma̱ nu nacui̱ ngu' cha' ná tso'o ma̱ tsiya' ti, nu juani laca ma̱ ñati̱ nu nti' la ycui' Ndyosi ji'i̱. Jua'a̱ cua nti' ycui' Ndyosi ta cha' tyuju'u ti' ji'i̱ ñati̱ nu nchca tsa chcui', nti' ycui' ngu'; bi' cha' cua ngusubi Ni ji'i̱ cu'ma̱, masi ñati̱ ti'i laca ma̱. Lo'o jua'a̱ ndu'ni Ni cha' tyuju'u ti' ñati̱ nu tlyu tsa cña nchca ji'i̱, nti' ycui' ngu'; bi' cha' ngusubi Ni ji'i̱ cu'ma̱ nu ná nchca lye ji'i̱ ma̱. 28Ndu'ni Ni cha' nga'aa nchca chcui' tsiya' ti nu ñati̱ nu ndulo tsa ji'i̱ ycui' ca; bi' cha' nsubi Ni ji'i̱ ngu' ti'i, nsubi Ni ji'i̱ ngu' nu nxtyí lo'o ñati̱ ji'i̱, nsubi Ni ji'i̱ ngu' nu ná sca na ntsu'u ji'i̱ tsiya' ti, bi' ngu' laca nu nsubi ycui' Ndyosi ji'i̱ cha' caca ngu' ñati̱ ji'i̱. 29Jua'a̱ ca cuayá' ti' lcaa na cha' ná tso'o si cua'ni tyucuaa ti' na ji'i̱ tya'a ñati̱ na, si ndube ti' na ji'i̱ ycui' Ndyosi. 30Ndi'ya̱ laca cha': cua nacui̱ ycui' Ndyosi cha' caca stu'ba cha' ji'na lo'o Jesucristo, lo'o jua'a̱ cua nda Ni ji'i̱ Jesucristo ji'na. Masi ná nchca ji'na, pana nu Jesucristo ni, lcaa cha' nchca ji'i̱ ycui'. Xqui'ya nu Jesús bi' nchca tso'o cresiya ji'na ñati̱ cuxi na cuentya ji'i̱ ycui' Ndyosi; xqui'ya Jesús taca caca na ñati̱ ji'i̱ ycui' Ndyosi, cha' Jesús laca nu ngua'ni lyaá ji'na ji'i̱ nu cuxi. 31Bi' cha' cua'ni na ndi'ya̱, ñi'ya̱ nu nscua lo quityi cusu': “Si nti' na chcui' na lo'o xa' ñati̱ cuentya ji'i̱ sca cha' tlyu, li' tso'o la si chcui' na ji'i̱ cha' tlyu nu ngua'ni ycui' nu Xu'na na”. Jua'a̱ nacui̱ quityi bi'.
Currently Selected:
1 CORINTIOS 1: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.