1 CORINTIOS 3
3
Sca ti cña ji'i̱ ycui' Ndyosi ndu'ni ca ta'a ngu' nu ngulu'u cha' ji'i̱ Jesús
1Cu'ma tya'a ngusñi na cha' ji'i̱ ycui' Ndyosi, tyucui tyempo lo'o nguti'i̱ na' ca slo ma̱ nu ngua tya li', ná ngua 'na chcui' na' lcaa cha' nu ngua ti' na' chcui̱' lo'o ma̱, cha' bilya xñi tso'o ma̱ cha' ji'i̱ Xtyi'i ycui' Ndyosi nu nda Ni ji'na. Xti ti cha' nchcui' na' lo'o ma̱ li', cha' ña'a̱ ti cuxi ti ngulacua ti' ma̱. Ñi'ya̱ laca nu sube cuañi', jua'a̱ ngua cu'ma̱, cha' bilya xñi tso'o ma̱ cha' ji'i̱ ycui' Ndyosi; 2bi' cha' tiya' ti ngulu'u na' scaa cha' ji'i̱ ma̱. Ñi'ya̱ laca lo'o sca cubi' cuañi', styi' xtya'a̱ ti ntyi' cubi' bi', cha' ná nchca cacu tso'o; jua'a̱ ngua cu'ma̱, cha' ná ngua cuna tso'o ma̱ scaa cha'. Masi juani tya lyiji cua'ni yala ma̱ cha' ca tsa'a̱ tso'o ma̱, 3cha' ña'a̱ ti tya ndiya la ti' ma̱ ña'a̱ cha' cuxi nu ndyu'ni ñati̱ chalyuu. Nu lo'o liye' ti' ma̱ ji'i̱ tya'a ñati̱ ma̱, nu lo'o lye nxu̱u̱ tya'a ma̱, tyaca̱' tyijyu' cha' ndiya la ti' ma̱ cha' cuxi nu ntsu'u nde chalyuu. Tya ndu'ni ma̱ ñi'ya̱ nu ndu'ni ñati̱ cuxi. 4Nu lo'o ñacui̱ sca ngu' tya'a ma̱ cha' ndi'ya̱: “Ñati̱ ji'i̱ Pablo laca ya”, cuati ñacui̱ xa' la ngu' tya'a ma̱ cha' ndi'ya̱: “Ñati̱ ji'i̱ Apolos laca ya”, ñi'ya̱ ndu'ni ñati̱ cuxi, jua'a̱ ndu'ni ma̱ li'.
5¿Tilaca laca nu Apolos bi' lacua? ¿Tilaca laca na' lacua? ¿Ha si'i cña ji'i̱ ycui' Ndyosi ndyu'ni ca ta'a ya? ¿Ha si'i xqui'ya cha' nda ya cha' lo'o ma̱, bi' cha' ngusñi ma̱ cha' ji'i̱ Cristo li'? Cua laca cña ndyu'ni scaa ya, la cui' cña ñi'ya̱ nu cua nda ycui' nu Xu'na na cha' cua'ni ya. 6Ñi'ya̱ laca sca ñati̱ nu cataa sca si'yu, lo'o li' chaca laca nu su'ba hitya su̱u̱ na cuiñii bi', jua'a̱ laca cuare lo'o ma̱; na' laca̱ nu ya̱a̱ ndacha' na' cha' bi' ji'i̱ ma̱ su clyo, lo'o tiya' la li' ñaa Apolos nda la cha' bi' lo'o ma̱. Pana sca ti ycui' Ndyosi laca nu ndu'ni cha' tyanu tso'o cha' bi' ne' cresiya ji'i̱ ma̱; 7ná ndu'ni cha' tilaca laca nu cua nda cha' bi' lo'o ma̱ tya clyo la, ná ndu'ni cha' tilaca laca nu tya nda la cha' bi' lo'o ma̱ ca tiya' la. Sca ti ycui' Ndyosi laca nu ndulo tsa cha' ji'i̱, cha' ycui' Ndyosi laca nu ndu'ni cha' tyanu tachaa cha' ji'i̱ Ni ne' cresiya ji'i̱ ma̱. 8Sca ti cuayá' ndu'ni ya lo'o tya'a ya, masi nda ya cha' lo'o cu'ma̱ su clyo, masi nclyu'u tso'o la ya cha' bi' ji'i̱ ma̱ ca tiya' la. Ycui' Ndyosi ni, tya ta la Ni cha' tso'o ji'i̱ ya, tsa ña'a̱ nu ndyu'ni tso'o ya cña ji'i̱ Ni. 9Tya'a ndyu'ni ya cña ji'i̱ ycui' Ndyosi laca cuare; lo'o cu'ma̱ ni, ndu'ni Ni cña ne' cresiya ji'i̱ ma̱, cña ji'i̱ ycui' Ndyosi laca bi'.
Lo'o jua'a̱ taca ta na' chaca cui̱i̱ lo'o ma̱ juani: ñi'ya̱ si laca ma̱ sca ni'i̱ tonu, jua'a̱ laca ma̱ cuentya ji'i̱ ycui' Ndyosi; 10lo'o na', ñi'ya̱ nti' sca cuityi ni'i̱ cuentya ji'i̱ ycui' Ndyosi, jua'a̱ laca na' lo'o cu'ma̱, laja lo'o nclyu'u na' ji'i̱ ma̱ cha' ji'i̱ ycui' Ni. Ndi'ya̱ ndyu'ni na' lo'o ma̱: ñi'ya̱ nti' si cua ngusta tso'o na' quiya' sca ni'i̱, lo'o li' ndyalaa xa' la ngu' cuityi cha' cua'ni lyiji ngu' cha' tya' ni'i̱ bi', bi' laca ñati̱ nu tya'a ndya'a̱ na' cña nu cua ngulu'u tso'o la ji'i̱ ma̱. Lcaa ngu' cuityi nga'a̱ cha' culacua ti' clyo ñi'ya̱ ña'a̱ xana tya' ni'i̱; lo'o jua'a̱ lcaa ya tya'a ndyu'ni ya cña, nga'a̱ cha' cui'ya tso'o ya cuentya ñi'ya̱ nu caca culu'u tso'o la ya cha' bi' ji'i̱ ñati̱. 11Jua'a̱ laca cha' lacua: cua laca ngusta ycui' Ndyosi ji'i̱ Jesucristo, cha' sca ti yu bi' caca su̱u̱ lcaa cha' bi', cha' ycui' Jesús laca nu ntucua quiya' cha' nu cua ngusñi na ji'i̱ ycui' Ndyosi Sti na; nga'aa ntsu'u xa' la jo'ó xa' la ñati̱ nu laca su̱u̱ cha' bi'. 12Ntsu'u ngu' tya'a na nu nclyu'u tso'o la ji'i̱ lcaa tya'a na, ñi'ya̱ nti' si cuiñá chca ngu' sca ni'i̱ tso'o, ñi'ya̱ laca si tya' ni'i̱ bi' masi lo'o oro, masi lo'o plata, masi lo'o quee ndubi nu quiña'a̱ tsa nga'a̱ tya' ni'i̱ bi'. Pana ntsu'u xa' la ngu' tya'a na nu cuxi la nclyu'u ji'i̱ tya'a, ñi'ya̱ laca si cuiñá chca ngu' sca ni'i̱ yaca ti, nu canta' ti tya' lo'o quii lo'o quixi̱i̱ ti. 13Tiya' la li' lo'o ca̱a̱ Jesucristo chaca quiya' cha' cua'ni cuayá' ji'i̱ ñati̱ chalyuu, li' quijeloo cha' ji'i̱ ycui' Ndyosi ñi'ya̱ ña'a̱ cña nu ngua'ni scaa ngu'. Tsa̱ bi' tsaa cña nu ngua'ni scaa ñati̱ lo sca quii' tlyu, cha' cua'ni cuayá' Ni ji'i̱; si tyaqui̱ cña bi', ná tso'o ngua cña bi' li'; si ná tyaqui̱, li' caca cuayá' ti' Ni cha' tso'o tsa cña bi' li'. 14Nu lo'o talo cña nu ngua'ni sca ñati̱ lo'o cua ndyaa lo quii' bi', li' ta Ni cha' tso'o nu tyacua ji'i̱ ñati̱ bi'. 15Cuati ñati̱ nu tyaqui̱ cña ji'i̱ lo quii' bi', nga'aa ña'a̱ ngu' ji'i̱ li'; chcuna' cña bi' tsiya' ti. Pana tya culaá Ni ji'i̱ ngu' bi', masi tya xi tya lyiji cha' tyaqui̱ ycui' ngu'.
16-17Nu laa tlyu su ndu'ni tlyu ngu' judío ji'i̱ ycui' Ndyosi tyaca'a tsa ji'i̱ Ni laca bi', cha' cuentya ji'i̱ Ni ndya' ni'i̱ bi'; tyaala tsa ycui' Ni si cua'ni ñu'u̱ ñati̱ ji'i̱ laa bi'. Lo'o cu'ma̱ ni, tyucui ña'a̱ taju cu'ma̱ nu ngusñi ma̱ cha' ji'i̱ Cristo, tyaca'a tsa ma̱ cuentya ji'i̱ ycui' Ndyosi; na cua ndyanu Xtyi'i ycui' Ndyosi ne' cresiya ji'i̱ ma̱. Lo'o jua'a̱ cua'ni tye ycui' Ni ji'i̱ cua ña'a̱ ca ñati̱ nu cua'ni ñu'u̱ tyucui̱i̱ ji'i̱ sca ñati̱ nu tya'a ngusñi na cha' ji'i̱ Jesús.
18Cua ngusñi na cha' ji'i̱ Cristo, bi' cha' tso'o la si ná cñilo'o na ji'i̱ ycui' ca na cha' ngua tsa ji'na, ñi'ya̱ ndu'ni ñati̱ chalyuu nu ngua tsa ji'i̱ ngu'. Ná tso'o si jua'a̱ nclyacua ti' na; nga'a̱ cha' culacua ti' na cha' ná ngua ji'na tsiya' ti, lo'o li' taca cua'ni ycui' Ndyosi cha' ca'ya sca cha' liñi hique na. 19Masi ndu'ni ñati̱ chalyuu cha' ngua tsa ji'i̱, cha' tso'o tsa nclyacua ti' ngu', si'i jua'a̱ nti' ycui' Ndyosi ña'a̱ Ni ji'i̱ ngu' bi'; ná tso'o tsiya' ti cha' nu nchcui' ñati̱ chalyuu nti' Ni. Cua nscua sca cha' lo quityi cusu' nu nchcui' ndi'ya̱: “Ndu'ni ycui' Ndyosi cha' quichi̱ yaa cha' hique ñati̱ chalyuu, masi tso'o tsa ndu'ni ngu' nti' ngu'”, nacui̱ lo quityi. 20Lo'o ndi'ya̱ laca cha' nu nscua chaca se'i̱ lo quityi bi': “Cua jlo ti' ycui' Ndyosi cha' ná tso'o tsiya' ti cha' nu nchcui' ñati̱ chalyuu nu nchca tsa ji'i̱ ndu'ni”. 21Bi' cha' nga'aa cua'ni tyixi ma̱ lo'o tya'a ma̱, nga'aa tyu'u lca'a̱ tsa ma̱ ji'i̱ sca ti ñati̱ tya'a ya. Cuentya ji'i̱ cu'ma̱ laca cua ña'a̱ ca tya'a ndyu'ni ya cña, 22masi na', masi Apolos, masi Pedro; lo'o jua'a̱ cuentya ji'i̱ cu'ma̱ laca cua ña'a̱ ca cha' nu ndyaca nde chalyuu, masi lu'ú na, masi cua ngujuii na, masi sca cha' nu ndyaca juani, masi sca cha' nu caca tyempo nde loo la; cuentya ji'i̱ cu'ma̱ laca lcaa cha' nu ndyaca nde chalyuu lacua. 23Pana cu'ma̱ ni, cuentya ji'i̱ Cristo laca ma̱; lo'o nu Cristo bi', cuentya ji'i̱ ycui' Ndyosi laca Ni.
Currently Selected:
1 CORINTIOS 3: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.