TITO 2
2
Znu nac Xtiidz Ndzon Jesús
1Saṉgue luu goṉ, none gnee luu lo grë miech qui zigne nacse Xtiidz Jesús. 2Grë meṉ bgui ne nac zha gol lo to i, bnee lo zho:
tibliladz gac zho,
guṉd zho ncuaaṉe cuee xquieḻto zho,
quix zho biini, ncuaaṉe ndzinli tsienaḻ zho guṉ zho;
tiblique gac zho lo Xtiidz Jesús,
gleynie zho samiech zho, ni
dziits so zho teḻ pe nactaa grë guieḻnë ne noyaṉ zho.
3Scaquegaa grë meṉ wnaa ne nac zhagol, bnee lo zho:
gban zho zigne no gban zha ne nole xnëz Dios,
gzhixcuaad zho diidzguizh,
gzudzd zho.
None zaacse gac zho, 4zeeṉa zha glu lo grë wnaa nguieg zha gban zho. Cseed zho grë wnaa nguieg:
gaṉ zho tsieel zho,
gaṉ zho xpëëd zho,
5gac zho tib wnaa nix biini,
quitnied zho tsieel zho;
zaacse guṉ zho xtsiiṉ zho,
niowse gac zho, niowse gnee zho,
gon zho xtiidz tsieel zho; zeeṉa tsod pe nacne gneenë miech Xtiidz Dios.
6Ni scaquegaa bnee lo grë zha bgui nguieg, gac zho zha nix biini. 7Luuzhal zaacse beeṉ grëse ncuaaṉe no guṉ luu, zeeṉa ga gwi zho gaṉle zha none gban zho. Zeeṉe cseed luu zho, iṉe tibliladz goc, guṉd luu ne quitnie luu zho. 8Bguib diidz ne gnee luu, zeeṉa choot peet glisquid lo luu; ni scagaa, grë zha ne rlëënie Xtiidz Jesús, stoladz zho zeeṉe gaṉ zho guieṉd pe glisqui zho lo ne.
9Grë zha ne lega ruṉ xtsiiṉ beṉ, pso diidz lo zho gon zho xtiidz meṉ ne quia zho xtsiiṉ, niowse gac zho, niowse gnee zho, yquiabrod zho lo me. 10Ib cuand zho, sinque iṉe ti miech mbe lo gac zho; zeeṉa ga gaṉ miech gaṉle zha niowtaa nac lo xquieḻmban zha ne zienaḻ Xtiidz Dios, meṉ ne psilaa ne lo doḻ.
11Grë diidz rii nagoṉ pso lo zho. Gotsaa gwi ne gaṉle zha noxcotaa Dios miech, gacxe psilaa me ne lo doḻ waa; 12sac laa me racladz csaan ne grëse guieḻntseeb, csaan ne grëtaa ncuaaṉe rleynie zha ne nod xnëz me, guieṉ ne ndzinli gban ne, tibaque gwi ne dieṉ pa miṉ wen, pa miṉgaa wend, iṉe dzioxco ne gban ne zigne racladz me. 13Sca none gban ne, haxta dziaṉlo ne gdziṉ dze ne laa Jesús guiaad stib, zigne psaṉle Dios diidz; gaḻ dze co, laa me guiaad con grë xquieḻndzon me. Me nac Dios ro ne rliladz ne, me psilaa ne lo doḻ. 14Sac goṉ, me bgaadz guieḻgut ne nioguiaḻ ne, me bdiizh grëtaa guieḻntseeb ne bdziuuṉ ne, psaṉmbe me ne lo grëtaa ncuaaṉe bdziuuṉ ne; gane niina, lo me ngab ne, ni none dzioxco ne gban ne zigne rnabey me.
15Grë miṉ rii nagoṉ pseed grë miech qui, bnee lo zho gban zhow. Zeeṉe riegala gdzieebd luu goctox lo zho, sac goṉ luu rieguiaḻ gnee lo zho. ¡Sca beeṉ, zeeṉa choot quitnied luu!
Currently Selected:
TITO 2: zpm
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.