2 TIMOTEO 3
3
Leṉ dze ne ziaadyob nitlo guidzliu
1Ni none gacnaṉ luu gaṉle, zeeṉe laa dze ziaadyobpaa nitlo guidzliu, nroob nac guieḻnë ne gaṉ grë zha ne no xnëz Dios. 2Zrieequia grë zha ne:
gacladz tebaa lose zho yquiin grëtaa ncuaaṉe no,
loxaque dimi gleynie zho,
niats gac zho,
zdaannie zho ncuaaṉe ni rapd zho,
zneenë zho Dios,
gond zho xtiidz pxoz zho, xtiidz xniaa zho;
sacd zdoo zho miṉe guṉ miech lo zho,
laa zho gban zigne notaa guic zho, ib yquiaadiagd zho Xtiidz Dios.
3Gacnaṉdraa zho pe nac guieḻwleynie, ib yquiad zdoo zho,
loxaque diidz gzhixcuaa zho,
lëbd zho gnabey zho xcuerp zho,
sacsi zho samiech zho,
stsidiḻ zho grëse ncuaaṉe rquiin,
4zgo zho zha ne ndzieeldiidz zho nia zha ne quiṉ zho,
ni lalnu guieḻto tsod lo zho,
loxaque dieṉ zha gdeed guxt xcuerp zho tso zho, laa ne yguib zho xnëz Dios.
5Squiaalo zho ye zho rliladz Dios, per lo grë ncuaaṉe guṉ zho, ga glu ne rliladzd zho me.
Bieṉ, ib ctsieelsad luu grë miech ne sca nac. 6Sac lëë zha ne nacgrë zho ga, rzëëb yu rietsitnie grë wnaa yozh ne zienaḻ ncuaaṉe gdeedtaa guxt xcuerp. 7Tibaque no zho dieeṉ peraa rseed zho, per ib rioguicd zho miṉe nac diidzli. 8Zigne beeṉ chop zha ne biiḻ diidz dox padzeela, Janes grop Jambres, gocndaan zho lo Moisés; scaque ruṉ zha co niina, rlëëniedox zho miṉe nac diidzli. Miech yozha, ndzinlidraa nac guic zho, nacd zho zha ne gliladz Xtiidz Dios; 9per gacdaquew xtse, zeeṉe laa diidz guieṉ gaṉle pe clas miech nac zho, dzigo lëëque grë ncuaaṉe yozh ne ruṉ zho cuee xquieḻto zho; zigne bzhaacaque zha ne sca blëënie Moisés.
Csaand Timoté miṉe pseed me
10Saṉgue luu, naṉle luu gaṉle zha nac grë miṉe pseed naa luu. Wen wen naṉ luu gaṉle zha mban naa, pe no guic naa guṉ naa, zha dib zdoo naa rliladz naa Dios, zha dib zdoo naa rleynie naa samiech naa, rieednied naa zho. 11Naṉle luu gaṉle zha rneedz Dios xfuers naa, rlëëb naa grëtaa miṉe rteed miech naa, zig beeṉ zho naa guiedz Antioquí, guiedz Icon ni Listr, blactaa pquianaḻ zho naa; per tibaque gocnie Dios naa, psilaa me naa lo grëtaa guieḻxtseeb co. 12Ni scagaa naca, grë zha ne rquiabladz gban zigne rnabey Jesús, ible squianaḻ miech zho. 13Per probsaxe grë zha ne sca quiayuṉctal xtoḻ, zha ne sca noquidie miech, zig zie dze laa zho noteedquie zho nëz ne nitlo zho. Quiaguitnie zho miech, ni quiaguitniegaa meṉdox zho.
14Saṉgue luu goṉ, csaand luu grë miṉe pseed luu. Naṉween luu gaṉle diidzliw, ni ruṉbeygaa luu cho nac grë zha ne bneew lo luu. 15Ni stiba, zigne ziadroob luu psilo quiaseed luu Xtiidz Dios, ni lëëw bdixbiini guic luu gocnaṉ luu ne Jesús none gliladz miech parne laa zho lo doḻ. 16Dib nacse Xtiidz Dios, Espíritu Sant psiaaba guic zha ne pquiaaw, laaw biaaṉ:
rseeda ne miṉe nac diidzli,
rsow diidz lo ne guieṉ ne pa lo quiaxiṉ ne,
rseeda ne zaacse gban ne.
17Zeeṉa sca grëse zha ne no xnëz Dios, grieelo wen wen cseed zho, ni guieṉ zho zha guṉ zho grëse dziin ne rquiin, dziin ne rieguiaḻ zho guṉ zho.
Currently Selected:
2 TIMOTEO 3: zpm
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.