1 TIMOTEO 4
4
Sa̱ wɨna̱a̱gɨn tmajtstuꞌuttɨt ja Diosꞌajotꞌa̱jtk
1Tɨyꞌa̱jtɨn ja Espíritu Santo wya̱ꞌa̱ñ ku wɨna̱a̱gɨn tmajtstuꞌuttɨt ja Diosꞌajotꞌa̱jtk ku wyɨnaty wyɨngøñ jøts kyøxt ja na̱xwiiꞌñɨt. Jøts ja tpaduꞌundɨt ja ɨxpøjkɨn midi kaꞌ tyɨyɨ yjanchɨ, midi ja mɨkuꞌ yjaꞌajtpy. 2Jaꞌabɨ ja̱a̱ꞌy ja tmadoꞌodɨp pøn ta̱a̱yꞌa̱jttɨp pøn ja pyøky tkaja̱ꞌwɨdɨp øy ja tjanɨja̱wɨdɨ ku møj tø tyundɨgøydɨ. 3Jadeꞌen wya̱ꞌa̱ndɨt jøts ku kaꞌ nꞌamajtskaꞌant jøts kaꞌap o ti njøøꞌkxɨnt øy ja Dios ja køꞌøm tø tjabɨkta̱ꞌa̱ky; pø tøxɨ ja Dios ja ttanɨbɨkta̱a̱gɨ jøts ja nyiktunkpa̱a̱jtɨndɨt tukɨꞌɨyɨ ja pɨkta̱ꞌa̱ky, pøn jaty ja Dios tjanchja̱ꞌwɨdɨp pøn jaty tnɨja̱ꞌwɨdɨp ja tyɨɨbyɨ yjanchpɨ yjøøꞌkxtɨpts jaꞌ, wan Dios ja ttamøja̱wɨdɨ ttagunuuꞌkxyja̱wɨdɨ. 4Midi ja Dios tø tyikꞌøyɨ, tum øy jaꞌ, kaꞌap adøm ja ngagupøjkɨnt. Ndamøja̱ꞌwɨmp ja Dios jaꞌ ku nyiktunkpa̱a̱jtɨnt, 5ku ja jadeꞌen nduꞌunɨnt kunuuꞌkxyts ja wyɨmbejtnɨ ja pɨkta̱ꞌa̱ky sa̱m ja kyajpxy wya̱ꞌa̱ñ.
Sa̱ ja Jesucristo øy tsuj yikmɨduñ
6Ku ya̱ꞌa̱t øy xukꞌɨxpøkt ja mɨguꞌuktøjk, øy ɨdøꞌøn ja Jesucristo wyɨnaty xmɨduñ, jøts mꞌajotꞌa̱tp jaꞌ, myiktunkpa̱a̱tp jaꞌ ja ɨxpøjkɨn sudso nꞌajotꞌa̱jtɨm ja Dios midi ɨxya̱mba̱a̱t mgamajtstutpy. 7Kaꞌ xmøjpɨkta̱ꞌa̱kt ja kajpxy ja ayuujk midi kaꞌ tyuñ. Amumjoojt ja Dios yjaꞌ xpaduujnɨt; 8øy nugo njanayꞌejxꞌejtɨnt jøts møk møja̱a̱w nyikna̱jxɨnt, ja Dios yjaꞌ neꞌegɨ møj ku nbaduujnaꞌant. Jaꞌats xpudøjkaꞌamp jøts øy tsuj ndsɨna̱a̱ꞌyɨnt jøts nayɨdeꞌen ja øyꞌa̱jtɨn xukpa̱a̱jtɨnt xemɨkøjxp. 9Janch yøꞌ tɨy yøꞌ, pa̱a̱tꞌa̱jtɨp jøts yø nɨdukɨꞌɨyɨ nbaduꞌunɨnt. 10Jaꞌagøjxp møk nduꞌunɨnt øy njaguꞌayoꞌomba̱a̱jtɨndɨ øy njayikjemduꞌuñɨndɨ nyikteduꞌuñɨndɨ. Kaꞌ ti nguma̱a̱ꞌyɨndɨt, jabɨ tøxɨ ja Dios xmøꞌøyɨndɨ ja jøpꞌejxɨn jøts nɨdukɨꞌɨyɨ tyiknɨtsoꞌokt pøn jaty pabøjkɨyɨp.
11Yøꞌøbɨ wɨnma̱a̱ꞌñ ɨdøꞌøn mnɨꞌanaꞌamp jøts nayɨdeꞌen xna̱nkyꞌɨxpøkɨt. 12Øy tsuj jawyeen xunjøpɨt sa̱m pya̱a̱tꞌatyɨn tpaduꞌundɨt pøn ja Dios tjanchja̱ꞌwɨdɨp jøts jadeꞌen myikupøkt øy mjaꞌuna̱ꞌjkɨnɨm; jøts ja mꞌayuujk øy tsuj xyikpɨdsøꞌømt møøt ja mꞌøyja̱a̱ꞌyꞌa̱jtɨn, møøt ja mbaꞌayoꞌowɨn, møøt ja mjanchja̱ꞌwɨn. 13Ku øts jam udyaꞌagyɨ nja̱ꞌa̱tt, ka̱jpx ja nøky jam ma̱ mnamyukyɨdɨ sa̱ ja Dios kyajpxy wya̱ꞌa̱ñ. Yikxon xukwɨnja̱wɨt ja mɨguꞌuktøjk jøts ja yjotmøkta̱ꞌa̱ktɨt, yikxon waanɨ xyikꞌɨxpøkt. 14Yiktuñ ja møkꞌa̱jtɨn ja wijyꞌa̱jtɨn midi ja Dios tø mmøꞌøyɨ, Dios wa̱a̱n ku ja møja̱a̱ꞌdyøjk ojts mgønɨxa̱jyɨ.
15Tuꞌugyɨ xuꞌunt yøꞌøbɨ wɨnma̱a̱ꞌñ jøts jadeꞌen tꞌejxtɨt tnɨja̱wɨdɨt sa̱ tø xyikmɨwenɨ xyikajaꞌajɨ ja mja̱ꞌgyukɨn jøts ja mjanchja̱ꞌwɨn. 16Øyɨm mnayꞌejxꞌettɨt køꞌøm midi mwɨnma̱a̱ꞌñꞌajtpy, midi mdukꞌɨxpijkpy, midi mduknɨja̱ꞌwɨp ja mɨguꞌuktøjk, tuꞌugyɨ xyikꞌett midi mdumpy. Ku jadeꞌen xuꞌunt mba̱a̱tpts ja øyꞌa̱jtɨn jadeꞌen, nayɨdeꞌen jaꞌadɨ pøn tmadoodɨp ja ɨxpøjkɨn.
Currently Selected:
1 TIMOTEO 4: mxp
Highlight
Share
Copy
Want to have your highlights saved across all your devices? Sign up or sign in
© 1987, Wycliffe Bible Translators, Inc. All rights reserved.