Hebreos 1
1
Dxiohs guñiꞌ pur Lliiꞌn Ñiꞌh
1Laꞌn dxyih galohtiiꞌyi raꞌ ziahan guhca dxyiꞌdxyi nin guñiꞌ Dxiohs loh raꞌ xtitalliudoꞌ raꞌ nuꞌh, nee ziahan za guñiꞌ Ñiꞌh pur guehtu daada raꞌ nin bacaꞌh xchiꞌdxyi Ñiꞌh, 2per nnah laꞌn dxyih raꞌ riiꞌ guñiꞌ Dxiohs loh nuꞌh pur Lliiꞌn Ñiꞌh nee basiaꞌhannee Ñiꞌh garaatiiꞌ nin nuu guidxyiyuh laꞌh Lliiꞌn Ñiꞌh laasii pur Lliiꞌn Ñiꞌh bwiꞌhnnchaꞌyi Ñiꞌh garaatiiꞌ. 3Niꞌchin Lliiꞌn Dxiohs naa laꞌgahca llaꞌñih nin naa Dxiohs nee naa paꞌhcaa Ñiꞌh ziga gahca naa Xtaada Dxiohs Ñiꞌh, nee cun xquelrnabwaꞌ Ñiꞌh naa dziꞌtsi garaa niꞌchi si gurihxchih, ya chin guyaꞌloh basiaa Ñiꞌh laꞌh nuꞌh loh duhlda, guzohba Ñiꞌh xlahdu derehchu Xtaada Ñiꞌh.
Lasahca ru Lliiꞌn Dxiohs loh raꞌ xaanjla Ñiꞌh
4Bwiꞌhnn lasahca ru Dxiohs laꞌh Lliiꞌn Ñiꞌh loh raꞌ aanjla raꞌ, laasii Lliiꞌn gahca Ñiꞌh dziꞌbaloh loh raꞌ aanjla pur zirooꞌ ru guelrnabwaꞌ nin nahpa Ñiꞌh nnah cun neezaa dziꞌn nin nahpa Ñiꞌh, 5laasii laꞌh Dxiohs nin tuhbi dxyih ayi guñiꞌ Ñiꞌh loh nin tuhbi xaanjla Ñiꞌh ñahbi Ñiꞌh:
Yiꞌh naa luꞌh Lliiꞌnahn; nnadxyih guliin yiꞌh tin guinabwaꞌ luꞌh.
Nin ayi za guñiꞌ Ñiꞌh loh tuhbi xaanjla Ñiꞌh:
Naꞌh gacaꞌhn Xtaada luꞌh, nee yiꞌh gaca luꞌh Lliiꞌnahn.
6Per dxyih nin guxeꞌhla Ñiꞌh Lliiꞌn galoh Ñiꞌh loh guidxyiyuh rahbi Ñiꞌh:
Garaa raꞌ xaanjlaꞌhn gulgazuꞌnllihbi nez loh Lliiꞌnahn.
7Ya chin bazeꞌta Dxiohs xaanjla raꞌ Ñiꞌh rahbi Ñiꞌh:
Ruhnn Ñiꞌh xaanjla Ñiꞌh ziga bwih, ya xmooza Ñiꞌh ruhnn Ñiꞌh ziga bwehla.
8Per chin bazeꞌta Ñiꞌh Lliiꞌn Ñiꞌh rahbi Ñiꞌh:
Yiꞌh naa luꞌh Dxiohs, nee ayi chuu dxyih chaꞌloh xquelrnabwaꞌ luꞌh,
nee zinabwaꞌ xnehza za luꞌh.
9Rucaꞌh stoꞌ luꞌh guunn luꞌh dziꞌn zaꞌca ya rdxyiꞌchi luꞌh gallee nin naa dxaaba raꞌ,
niꞌchin laꞌh Dxiohs, Xchiohs luꞌh, basiahxi ru Ñiꞌh laꞌn lastoꞌ luꞌh mahzi ru que laꞌh raꞌ lasaaꞌ raꞌ luꞌh.
10Rñiꞌ za Ñiꞌh squiiꞌ:
Yiꞌh Daada, chin guzoꞌbalohyi bwiꞌhnnchaꞌyi luꞌh garaatiiꞌ raꞌ, bwiꞌhnnchaꞌyi luꞌh guidxyiyuh,
yiꞌh gahca za bwiꞌhnnchaꞌyi luꞌh dxibaaꞌ.
11Laꞌh raꞌn ziñichiloh raꞌn per yiꞌh ba nuu nabahan luꞌh para tuꞌpazi,
ya garaa raꞌ nin nuu guidxyiyuh ziuhlla raꞌn ziga riuhlla lahdxi;
12zutuꞌbi raꞌ luꞌhn ziga rduꞌbi tuhbi lahdxi per yiꞌh ayi guidxaꞌh ziga naa luꞌh ya xihza raꞌ luꞌh ayi chuutiiꞌ dxyih nin gazaaꞌ raꞌn.
13Nee ¿cuucalla rahbi Dxiohs loh tuhbi xaanjla Ñiꞌh squiiꞌ?:
Guzohba xlahdu derehchuꞌhn tin guinabwaꞌ luꞌh hasta guigaꞌha loh dxyihyi nin gutsiiga raꞌn bwiinn raꞌ nin rdxyiꞌchinee yiꞌh loh luꞌh,
14laasii laꞌh raꞌ aanjla raꞌ, spíritu si naa raꞌ ba loh xtsiꞌn Dxiohs tin ziꞌchi gacanee raꞌ ba laꞌh raꞌ bwiinn nin guicaꞌha guel nabahan nin ayi ñichilohtiiꞌ.
Currently Selected:
Hebreos 1: zpv
Highlight
Share
Copy
Want to have your highlights saved across all your devices? Sign up or sign in
© 1990, Wycliffe Bible Translators, Inc. All rights reserved.