2 Timoteo 2
2
ꞌNéˉ e jmóˆnaaꞌ téꞌˋbaaꞌ có̱o̱ꞌ˜ jaléꞌˋ iihuɨ́ɨˊ
1Jo̱ fɨ́ɨˉguɨ́ɨ ꞌnʉˋ, Timoteo i̱ lɨ́ɨngˊ lafaꞌ jó̱o̱ˋo̱, teáˋ sinꞌˊ uøꞌˊ e fɨˊ nɨsinꞌˊ laꞌeáangˊ có̱o̱ꞌ˜ e bíˋ e nɨcangɨ́ɨnꞌˋ quiáꞌˉ Dseaˋ Jmáangˉ. 2Jo̱guɨ jaléꞌˋ júuˆ e canʉ́ʉꞌˉ e nɨcafáꞌˉ jnea˜ fɨˊ quiniˇ jaléngꞌˋ dseaˋ fɨ́ɨngˊ, jo̱baꞌ fɨ́ɨˉɨ ꞌnʉˋ lana e niꞌéꞌˆ dseaˋ jiéngꞌˋ e júuˆ jo̱. Jo̱ ꞌnéˉ jméeꞌˆ lajo̱ jí̱i̱ꞌ˜ có̱o̱ꞌ˜ dseaˋ i̱ ta˜ oꞌˊ có̱o̱ꞌ˜, lɨ́ꞌˆ lajaléngꞌˋ dseaˋ i̱ li˜ quɨ́ɨꞌ˜ jmɨɨ˜ e niꞌéꞌrˉ jaléngꞌˋ dseaˋ jiéngꞌˋ.
3Jo̱guɨ jmeeˉ téꞌˋ có̱o̱ꞌ˜ jaléꞌˋ iihuɨ́ɨˊ e dsingɨ́ɨnꞌˉ uíiꞌ˜ e lɨnꞌˊ dseaˋ quiáꞌˉ Dseaˋ Jmáangˉ lɨ́ꞌˆ laco̱ꞌguɨ la jmóoˋ jaangˋ ꞌléeˉ téꞌrˋ có̱o̱ꞌ˜ jaléꞌˋ e dsingɨ́ɨiñˉ. 4Dsʉco̱ꞌ jí̱i̱ꞌ˜ jaangˋ ꞌléeˉ, e lajeeˇ e jmóorˋ ta˜, catɨ́ɨngˉ e nijmérˉ nʉ́ʉꞌr˜ lají̱i̱ꞌ˜ ta˜ quiʉꞌˊ jaangˋ dseaˋ jiéngꞌˋ i̱ jaˋ lɨ́ɨngˊ fiir˜, co̱ꞌ lají̱i̱ꞌ˜ fii˜bre ꞌnéˉ e nijmiꞌiáaiñˋ dsíiñꞌˊ. 5Jo̱guɨ lajo̱bɨ cajo̱, faꞌ jaangˋ dseaˋ cóoˋ bǿøꞌ˜, jaˋ catɨ́ɨngˉ e niꞌíñꞌˋ lají̱i̱ꞌ˜ e calɨ́ꞌrˉ do fɨng song jaˋguɨ cajmitir˜ røøˋ laco̱ꞌguɨ jí̱i̱ꞌ˜ e sɨꞌíˆ e cóoˋ dseaˋ. 6Jo̱guɨ lajo̱bɨ cajo̱, faꞌ jaangˋ dseaˋ jmóorˋ ta˜ jenuuˋ, catɨ́ɨmˉbre e niꞌíñꞌˋ guiéeˆ quiáꞌrˉ laꞌuii˜ mɨ˜ niróˋ jaléꞌˋ e jnirˊ. 7Jo̱baꞌ fɨ́ɨˉguɨ́ɨ ꞌnʉˋ, Timoteo, íiˋ oꞌˊ røøˋ lají̱i̱ꞌ˜ e júuˆ e fɨ́ɨˉɨ ꞌnʉˋ lana, jo̱ lajo̱baꞌ Fíiˋnaaꞌ Dseaˋ Jmáangˉ nijmɨcó̱o̱ꞌr˜ ꞌnʉˋ e ningánꞌˋ røøˋ lají̱i̱ꞌ˜ e júuˆ na.
8Jo̱ contøøngˉ jmiguiénꞌˊ oꞌˊ jaléꞌˋ e cangongɨ́ɨngˉ Dseaˋ Jmáangˉ, i̱ dseaˋ i̱ cají̱ꞌˊtu̱ laꞌuii˜ jee˜ jaléngꞌˋ ꞌlɨɨ˜, jo̱guɨ i̱ lɨ́ɨngˊ dseaˋ sɨju̱ˇ dseata˜ dseaˋ féngꞌˊ Davíꞌˆ; jo̱ lanab jí̱i̱ꞌ˜ lɨ́ɨˊ júuˆ e guiaˋ jnea˜ quiáꞌˉ jial laangˋ dseaˋ jee˜ jaléꞌˋ dseeˉ quiáꞌrˉ. 9Jo̱guɨ uíiꞌ˜ e guiaaˉ júuˆ labaꞌ e íinꞌ˜n jaléꞌˋ iihuɨ́ɨˊ, jo̱ jɨˋguɨ e ꞌñúumꞌ˜baa iuunˉ fɨˊ dsíiˊ ꞌnʉñíˆ lafaꞌ jaangˋ dseaˋ i̱ nɨcaꞌléeˊ; dsʉꞌ e júuˆ quiáꞌˉ Dseaˋ Jmáangˉ e guiaaˉ la jaˋ lɨ́ɨˊ faꞌ e jaˋ cuǿøngˋ lɨñiˊ dseaˋ dsʉco̱ꞌ jaˋ jiéꞌˋ sɨjnɨˊ quiáꞌˉ. 10Jo̱ uíiꞌ˜ e lajo̱b lɨ́ɨˊ, jo̱baꞌ jmóoˋbaa téꞌˋe có̱o̱ꞌ˜ jaléꞌˋ e iihuɨ́ɨˊ la e laco̱ꞌ jaléngꞌˋ dseaˋ i̱ nɨcaguíngꞌˋ Fidiéeˇ i̱ nilíingˉ dseaˋ quiáꞌrˉ nilíꞌrˋ e nileáiñˋ jee˜ jaléꞌˋ dseeˉ quiáꞌrˉ jo̱ nilɨseeiñˋ fɨˊ ñifɨ́ˉ lata˜ laꞌeáangˊ có̱o̱ꞌ˜ Fíiˋnaaꞌ Dseaˋ Jmáangˉ.
11Jo̱ dseángꞌˉ e jábꞌˉ lají̱i̱ꞌ˜ e júuˆ e fɨ́ɨˉɨ ꞌnʉˋ la:
Song nijú̱u̱ˉnaaꞌ uíiꞌ˜ e lɨ́ɨˊnaaꞌ dseaˋ quiáꞌˉ Dseaˋ Jmáangˉ,
jo̱baꞌ nilɨse̱e̱ˉbaaꞌ có̱o̱ꞌr˜ lata˜ cajo̱.
12Jo̱guɨ song jmooˉbaaꞌ téꞌˋnaaꞌ có̱o̱ꞌ˜ jaléꞌˋ iihuɨ́ɨˊ e ngɨ́ɨngˋnaaꞌ,
jo̱baꞌ niꞌɨ́ˉbaaꞌ íꞌˋ røøˋ có̱o̱ꞌr˜ fɨˊ jmɨgüíˋ co̱o̱ˋ.
Jo̱guɨ song féꞌˆnaaꞌ e jaˋ cuíingˋnaaꞌr,
jo̱baꞌ lajo̱b nijíñꞌˉ cajo̱ e jaˋ cuíiñˋ jneaa˜aaꞌ mɨ˜ tɨˊ lɨ˜ jo̱.
13Jo̱guɨ song jmooˉnaaꞌ e jaˋ jáꞌˉ lɨ́ɨngˋnaaꞌ júuˆ quiáꞌrˉ,
dsʉꞌ írˋ contøømˉ jmitirˇ jaléꞌˋ e nɨcajíñꞌˉ,
co̱ꞌ jaˋ cuǿøngˋ faꞌ e jaˋ jmitir˜ jaléꞌˋ júuˆ quiáꞌrˉ.
Jaangˋ dseaˋ i̱ jmóoˋ ta˜ e iáangˋ dsíiˊ Fidiéeˇ
14Jo̱ fɨ́ɨˉguɨ́ɨ ꞌnʉˋ, Timoteo, jmiguiénꞌˊ dsíiˊ jaléngꞌˋ dseaˋ quiáꞌˉ Dseaˋ Jmáangˉ jaléꞌˋ júuˆ e nifáꞌˆa la, jo̱ liúungꞌ˜ jaléngꞌˋ íˋ fɨˊ quiniˇ Fidiéeˇ e jaˋ güɨquíñꞌˊ e tɨ́ɨngˊ júuˆ quiáꞌrˉ có̱o̱ꞌ˜ lɨ́ꞌˆ doñiˊ eeˋ júuˆ. Dsʉco̱ꞌ jaléꞌˋ e júuˆ jo̱ jaˋ e ta˜ íingˆ jí̱i̱ꞌ˜ co̱o̱ˋ; jo̱ lɨco̱ꞌ ꞌléebˊ jo̱guɨ jmóoˋ e dsicamꞌˊ jaléngꞌˋ i̱ dseaˋ i̱ núuˋ jaléꞌˋ e jo̱. 15Jo̱ jmeeˉ quijí̱ˉ carˋ ngocángˋ oꞌˊ e nilɨꞌiáangˋ dsíiˊ Fidiéeˇ có̱o̱ꞌ˜ jaléꞌˋ ta˜ jmooꞌˋ, jo̱ lajo̱baꞌ jaˋ nilíˋ ɨꞌˋ lɨ́ɨnꞌˉ quiáꞌˉ jaléꞌˋ e jo̱. Jo̱guɨ éeꞌ˜ røøˋ jaléngꞌˋ dseaˋ júuˆ seaˋ contøøngˉ quiáꞌˉ Fidiéeˇ. 16Jo̱guɨ jie˜ mɨˊ jmooꞌˋ faꞌ e quɨ́nꞌˋ jee˜ jaléngꞌˋ dseaˋ i̱ féꞌˋ jaléꞌˋ júuˆ e jaˋ uiing˜ seaˋ; dsʉco̱ꞌ jaléngꞌˋ dseaˋ i̱ jmóoˋ lajo̱, eáangˊguɨ dsihuíiñˉ quiáꞌˉ Fidiéeˇ laco̱o̱ˋ jmɨɨ˜ laco̱o̱ˋ jmɨɨ˜, 17jo̱guɨ eáamˊ niꞌrˊ jaléꞌˋ e júuˆ ꞌlɨꞌˆ e erˊ do lɨ́ꞌˆ laco̱ꞌ lɨ́ɨˊ co̱o̱ˋ jmohuɨ́ɨˊ e dsicuángˋ jmɨnáˉ. Jo̱ lajo̱b cangongɨ́ɨngˉ i̱ dseañʉꞌˋ i̱ siiˋ Himeneo có̱o̱ꞌ˜guɨ i̱ siiˋ Fileto, 18co̱ꞌ i̱ dseaˋ gángˉ la nɨcacá̱rˉ fɨˊ gaˋ lajeeˇ e cuíiñˋ Dseaˋ Jmáangˉ, jo̱ lana nɨngɨrˊ féꞌrˋ júuˆ e nɨcají̱bꞌˊtu̱ jaléngꞌˋ dseaˋ i̱ nɨcajúngˉ. Jo̱ có̱o̱ꞌ˜ jaléꞌˋ e júuˆ e féꞌrˋ do, nɨcalɨgǿmˋ i̱ lɨɨng˜ dseaˋ i̱ jáꞌˉ lɨ́ɨngˋ e júuˆ e seaˋ contøøngˉ quiáꞌˉ Fidiéeˇ. 19Dsʉꞌ Fidiéeˇ lafaꞌ catá̱ꞌrˉ co̱o̱ˋ tɨɨˉ fɨɨˋ quiáꞌˉ ꞌnʉ́ʉˊ e téꞌˋ huǿøˉ e jaˋ niꞌíingˉ, jo̱ e tɨɨˉ fɨɨˋ do lɨ́ɨˊ la lɨ́ɨˊ e júuˆ la e jaˋ tó̱o̱ˋ jmɨɨ˜ niꞌíingˉ, jo̱ lalab féꞌˋ: “Jo̱ nɨcuíimˋ Fíiˋnaaꞌ Fidiéeˇ jaléngꞌˋ dseaˋ i̱ lɨ́ɨngˊ dseaˋ quiáꞌrˉ”; jo̱guɨ féꞌˋbɨ cajo̱: “Jaléngꞌˋ dseaˋ i̱ jíngꞌˉ e lɨ́ɨiñˊ dseaˋ quiáꞌˉ Fíiˋnaaꞌ Fidiéeˇ ꞌnéˉ nitʉ́ˋbre e joˋ jmérˉ jaléꞌˋ e jaˋ dseengˋ e lamɨ˜ jmóorˋ do.”
20Dsʉco̱ꞌ faꞌ co̱o̱ˋ dsíiˊ sɨnʉ́ʉˆ quiáꞌˉ jaangˋ dseaˋ i̱ seaˋ cuuˉ, o̱ꞌ lajɨˋ e jmáiñꞌˋ ta˜ do lɨ́ɨˊ có̱o̱ꞌ˜ cunéeˇ o̱ꞌguɨ có̱o̱ꞌ˜ cuteeˋ, co̱ꞌ seabˋ cajo̱ e lɨ́ɨˊ có̱o̱ꞌ˜ ꞌmaˋ jo̱guɨ có̱o̱ꞌ˜ guóoꞌ˜. Dsʉꞌ e lɨɨng˜ e jmáiñꞌˋ ta˜ do jmáiñꞌˋ ta˜ mɨ˜ jmóorˋ jmɨɨ˜ laniingˉ, jo̱guɨ e lɨɨng˜guɨ e do jmáiñꞌˋ ta˜ contøøngˉ. 21Jo̱ song jaangˋ dseaˋ contøøngˉ jmɨꞌúuiñˋ e laco̱ꞌ jaˋ nitéiñꞌˋ fɨˊ ni˜ dseeˉ, jo̱baꞌ niꞌuíiñˉ jaangˋ i̱ sɨꞌíingˆ jo̱guɨ i̱ íingˆ ta˜ quiáꞌˉ Fidiéeˇ. Jo̱ Fidiéeˇbingꞌ i̱ nijmeángꞌˋ ta˜ írˋ e laco̱ꞌ nijmérˉ jmangꞌˉ e guiʉ́ˉ.
22Jo̱ fɨ́ɨˉguɨ́ɨ ꞌnʉˋ jie˜ mɨˊ quɨ́nꞌˋ jee˜ jaléꞌˋ e jaˋ dseengˋ e lɨtɨ́ɨngˋ jaléngꞌˋ sɨmingꞌˋ có̱o̱ꞌ˜ sɨmɨ́ˆ e jmóorˋ, jo̱ teáˋguɨ sinꞌˊ uøꞌˊ e jmóoˋ jmangꞌˆ jaléꞌˋ e guiʉ́ˉ, jo̱ e jáꞌˉguɨ lɨ́ɨnꞌˋ júuˆ quiáꞌˉ Dseaˋ Jmáangˉ, jo̱guɨ e jmiꞌneáangˋguɨꞌ jaléngꞌˋ dseaˋ rúnꞌˋ, jo̱guɨ e seengˋguɨꞌ juguiʉ́ˉ júuˆ røøˋ. Jo̱ jmeeˉ jaléꞌˋ e jo̱ co̱lɨɨng˜ có̱o̱ꞌ˜ jaléngꞌˋ dseaˋ i̱ ꞌnángꞌˊ Fidiéeˇ e ngocángˋ dsíirˊ. 23Jo̱guɨ jie˜ mɨˊ quɨ́nꞌˋ jee˜ jaléꞌˋ júuˆ íiˊ e jaˋ uiing˜ seaˋ, co̱ꞌ nɨñíˆbaꞌ guiʉ́ˉ e jaléꞌˋ e júuˆ jo̱ quié̱e̱ˊ jí̱i̱ꞌ˜ ta˜ jɨ́ɨmˋ. 24Jo̱ jaangˋ dseaˋ i̱ jmóoˋ lají̱i̱ꞌ˜ e iing˜ Fíiˋnaaꞌ Dseaˋ Jmáangˉ jaˋ cuǿøngˋ e ningɨ́rˉ ta˜ tɨ́ɨngˊ có̱o̱ꞌ˜ jaléngꞌˋ dseaˋ, co̱ꞌ o̱ꞌ lajo̱ e catɨ́ɨngˉ e nijmérˉ. Co̱ꞌ lɨ́ꞌˆ lɨˊ ꞌnéˉ jmérˉ jmangꞌˉ e guiʉ́ˉ có̱o̱ꞌ˜ lɨ́ꞌˆ doñiˊ i̱i̱ˋ dseaˋ, jo̱guɨ ꞌnéˉ e quɨ́ɨꞌ˜bre jmɨɨ˜ jial niꞌéꞌrˉ dseaˋ, jo̱guɨ ꞌnéˉ e féngꞌˊ dsíiˊbre có̱o̱ꞌ˜ jaléngꞌˋ dseaˋ rúiñꞌˋ, 25jo̱guɨ ꞌnéˉ e jaˋ jmɨjløngꞌˆ ꞌñiaꞌrˊ mɨ˜ liúiñꞌˋ jaléngꞌˋ dseaˋ i̱ jaˋ jíiꞌ˜ júuˆ quiáꞌˉ Dseaˋ Jmáangˉ; jo̱ laꞌeáangˊ có̱o̱ꞌ˜ e jo̱, jangámˉ nijmɨcó̱o̱ꞌ˜ Fidiéeˇ quiáꞌˉ jaléngꞌˋ i̱ dseaˋ íˋ e laco̱ꞌ niquɨ́ꞌˉ jíngꞌˋ yaaiñ˜ fɨˊ quiniˇ dseaˋ do, jo̱guɨ e nijáꞌˉ líiñˋ júuˆ quiáꞌˉ Dseaˋ Jmáangˉ, 26jo̱ lajo̱baꞌ niꞌɨ́ɨˉtu̱ dsíirˊ røøˋ e laco̱ꞌ nijmihuíingˉ yaaiñ˜ có̱o̱ꞌ˜ fii˜ i̱ ꞌlɨngꞌˆ, dsʉco̱ꞌ íˋbingꞌ i̱ lamɨ˜ ꞌméꞌˊ quiáꞌrˉ e jmóorˋ lɨ́ꞌˆ doñiˊ eeˋ e iing˜ íˋ.
Currently Selected:
2 Timoteo 2: cco
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.