San Juan 13
13
Jesús rguibëꞌ níꞌaquëꞌ bönniꞌ usë́d queëꞌ
1Niꞌ nac dza ziꞌa gdxin Lni Pascua catiꞌ tuꞌspanëꞌ ca benëꞌ Dios, bubijëꞌ luyú Egipto bunách queëꞌ. Nözcznëꞌ Jesús chbdxin dza queëꞌ gatiëꞌ, catiꞌ ral‑laꞌ uzë́ꞌë yödzlyú ni, huöjëꞌ ga zoëꞌ Xuzëꞌ. Ca naꞌ nadxiꞌinëꞌ bunách queëꞌ nacuáꞌ yödzlyú ni, naꞌa nadxiꞌinëꞌ lequëꞌ ga gdxintë gatiëꞌ uláz quequëꞌ.
2Chnagúꞌu yöl‑laꞌ Judas Iscariote, zxiꞌnëꞌ tu bönniꞌ lëꞌ Simón, Satanás tuꞌ xöhuiꞌ, quië udödëꞌ Jesús lu naꞌgac nup ludödi Lëꞌ. 3Nözcznëꞌ Jesús ca nac, brujëꞌ ga zoëꞌ Dios, len huöjëꞌ caꞌ ga naꞌ zoëꞌ Dios, atiꞌ chnudödëꞌ lu nëꞌë Lëꞌ Dios Xuzëꞌ gdutë yöl‑laꞌ uná bëꞌ queëꞌ. 4Qui lë ni naꞌ, catiꞌ niꞌ tahuëꞌ, gyasëꞌ Jesús len gduëꞌ lariꞌ rxoa yenëꞌ. Gdel‑lëꞌë tu lariꞌ ruzxini naꞌruꞌ le bdëꞌë lëꞌë. 5Niꞌr gdëꞌë nis lu zxigaꞌ guia, atiꞌ gzu lahuëꞌ rguibëꞌ níꞌaquëꞌ bönniꞌ usë́d queëꞌ, len ruzxinëꞌ níꞌaquëꞌ len lariꞌ naꞌ daꞌ lëꞌë.
6Catiꞌ bdxinëꞌ ga röꞌë Simón Pedro, Pedro naꞌ rëꞌ Lëꞌ:
―Xan, ¿naruꞌ Liꞌ quibtsuꞌ niꞌa?
7Bubiꞌë didzaꞌ Jesús, rëꞌ lëꞌ:
―Lë ni runaꞌ, cutu réjniꞌnuꞌ naꞌa, san huadzéy tséjniꞌnuꞌ.
8Niꞌr Pedro rëꞌ Lëꞌ:
―Cutu quibczuꞌ Liꞌ niꞌa.
Jesús rëꞌ lëꞌ:
―Chquiꞌ nedaꞌ cutu quibaꞌ liꞌ, cutu caꞌ sáquiꞌnuꞌ gunuꞌ nedaꞌ tsazxö́n.
9Niꞌr Simón Pedro rëꞌ Lëꞌ:
―Xan, clëgz niꞌa quibuꞌ, san quibuꞌ caꞌ naꞌa len icjaꞌ.
10Jesús rëꞌ lëꞌ:
―Nu nayár, níꞌazëꞌ run bayúdx tsar, le nacczëꞌ dxiꞌa gdutëꞌ, atiꞌ lbiꞌiliꞌ nacliꞌ dxiꞌa, san clëg yúguꞌtëliꞌ.
11Gnëꞌ cni Jesús: “Clëg yúguꞌtëliꞌ nacliꞌ dxiꞌa”, le nözcznëꞌ nulquëꞌ naꞌ udödëꞌ Lëꞌ.
12Gdöd gdibëꞌ níꞌaquëꞌ Jesús, buguel‑lëꞌë lariꞌ naꞌ buxóa yenëꞌ. Buböꞌë ga tahuëꞌ, atiꞌ rëꞌ lequëꞌ:
―¿I réjniꞌliꞌ lë naꞌ ziꞌa benaꞌ queëliꞌ? 13Lbiꞌiliꞌ ruiꞌliꞌ laꞌ “Bönniꞌ Usëdi”, lencaꞌ “Xan”. Dxiꞌa nac ca rnaliꞌ, le cni nacaꞌ. 14Naꞌa, chquiꞌ nedaꞌ nacaꞌ Xanliꞌ len Bönniꞌ Usëdi queëliꞌ, atiꞌ gdibaꞌ níꞌaliꞌ, lëzcaꞌ cni ral‑laꞌ gunliꞌ lbiꞌiliꞌ, quibliꞌ niꞌa lzaꞌliꞌ tuliꞌ yetuliꞌ. 15Tu le buluiꞌidaꞌ lbiꞌiliꞌ quië gunliꞌ lbiꞌiliꞌ ca naꞌ benaꞌ nedaꞌ. 16Le nactë rëpaꞌ lbiꞌiliꞌ: Cutu náctërëꞌ blau ca xanëꞌ bönniꞌ huen dxin, atiꞌ bönniꞌ gbaz cutu náctërëꞌ blau ca nu nasölaꞌ lëꞌ. 17Chquiꞌ réjniꞌliꞌ yúguꞌtë lë ni, bicaꞌ ba lbiꞌiliꞌ chquiꞌ gunliꞌ cni. 18Didzaꞌ ni ruꞌa cutu rëpaꞌ yúguꞌtëliꞌ. Nözczdaꞌ nup gröczaꞌ nedaꞌ, san run bayúdx utság lë naꞌ nayúj lu guich laꞌy, rna: “Nu rágulen nedaꞌ tsazxö́n, nu ni táꞌbagaꞌ nedaꞌ.” 19Naꞌa rguíxjöiꞌdaꞌ lbiꞌiliꞌ ziꞌal ca gac, quië catiꞌ gac cni, tséjlëꞌliꞌ zoaczaꞌ nedaꞌ. 20Le nactë rëpaꞌ lbiꞌiliꞌ: Nu bönniꞌ gunëꞌ ba laꞌn gbaz gsölaꞌa nedaꞌ, nedaꞌ caꞌ gunëꞌ ba laꞌn, atiꞌ nu bönniꞌ gunëꞌ nedaꞌ ba laꞌn, gunëꞌ caꞌ ba laꞌn Xuzaꞌ, nasölëꞌë nedaꞌ.
Rguíxjöꞌë Jesús ca gunëꞌ Judas, udödëꞌ Lëꞌ
21Catiꞌ budx bëꞌë didzaꞌ ni Jesús, buiꞌnnëꞌ atiꞌ yalj lulu gnëꞌ:
―Le nactë rëpaꞌ lbiꞌiliꞌ: Tu bönniꞌ nutsëꞌë ladjliꞌ udödëꞌ nedaꞌ.
22Niꞌr guluyú lau lzaꞌquëꞌ tuëꞌ yetúëꞌ bönniꞌ usë́d queëꞌ len gulaböꞌtsquëꞌ baguíꞌi taꞌnáb ládxiꞌquëꞌ nuzxa qui naꞌ gnëꞌ cni Jesús. 23Tuëꞌ bönniꞌ usë́d queëꞌ Jesús, bönniꞌ naꞌ Jesús nadxiꞌinëꞌ lëꞌ, zoëꞌ cuit lëꞌë. 24Simón Pedro buláꞌ buluiꞌizëꞌ bönniꞌ ni quië gnabnëꞌ Jesús nuzxa qui naꞌ gnëꞌ cni. 25Niꞌr bönniꞌ naꞌ zoëꞌ cuit lëꞌë Jesús rëꞌ Lëꞌ:
―Xan, ¿nuzxa naꞌ ruꞌu didzaꞌ qui?
26Bubiꞌë didzaꞌ Jesús, rëꞌ lëꞌ:
―Naquëꞌ bönniꞌ naꞌ guꞌa‑nëꞌ yöt xtil nabís.
Niꞌr buspisëꞌ yöt xtil naꞌ, len bëꞌë queëꞌ Judas Iscariote, zxiꞌnëꞌ bönniꞌ lëꞌ Simón. 27Gdöd gdahuëꞌ yöt xtil naꞌ Judas, gyaz icj ládxiꞌdauꞌhuëꞌ Satanás tuꞌ xöhuiꞌ. Niꞌr Jesús rëꞌ lëꞌ:
―Lë naꞌ gunuꞌ, yjentë naꞌa.
28Cutu taꞌyéjniꞌnëꞌ bizx quië naꞌ gudxëꞌ lëꞌ cni Jesús yezícaꞌrëꞌ bönniꞌ usë́d queëꞌ röꞌquëꞌ tahuëꞌ. 29Le nuꞌë Judas bzud dumí quequëꞌ, táquinëꞌ laꞌquëꞌ gudxëꞌ lëꞌ Jesús: “Yajxíꞌ le gáguruꞌ lni”, o gnëꞌ: “Bëꞌ latiꞌ quegac bunách yechiꞌ.” 30Catiꞌ budx gdahuëꞌ yöt xtil naꞌ, len niꞌ nac chdzöꞌl, laꞌ brujtëꞌ Judas.
Tu zxba cub
31Catiꞌ chbrujëꞌ Judas naꞌ, niꞌr gnëꞌ Jesús:
―Naꞌa chzoa glaꞌ lahui yöl‑laꞌ yeníꞌ quiaꞌ nedaꞌ, Bönniꞌ Nuhuöaquëꞌ Gdu Bunách, len glaꞌ lahui caꞌ yöl‑laꞌ yeníꞌ queëꞌ Dios. 32Chquiꞌ glaꞌ lahui yöl‑laꞌ yeníꞌ queëꞌ Dios niꞌa quiaꞌ nedaꞌ, Zxiꞌnëꞌ, lëzcaꞌ Lëczëꞌ Dios gunëꞌ ga glaꞌ lahui yöl‑laꞌ yeníꞌ quiaꞌ nedaꞌ, Zxiꞌnëꞌ, len laꞌ guntëꞌ cni. 33Zxíꞌnaꞌdauꞌ, yetú chiꞌz zóalenaꞌ lbiꞌiliꞌ. Uguiljliꞌ nedaꞌ, atiꞌ ca naꞌ chgúdxgacaꞌ‑nëꞌ bönniꞌ judío, lëzcaꞌ cni rëpaꞌ lbiꞌiliꞌ naꞌa: Ga naꞌ tsijaꞌ nedaꞌ, cutu gac guidliꞌ racz queëliꞌ. 34Tu zxba cub rna béꞌidaꞌ lbiꞌiliꞌ le rna cni: “Gul‑dxíꞌi lzaꞌliꞌ tuliꞌ yetuliꞌ”. Ca naꞌ nedaꞌ nadxiꞌidaꞌ lbiꞌiliꞌ, lëzcaꞌ cni ral‑laꞌ gdxiꞌiliꞌ lzaꞌliꞌ tuliꞌ yetuliꞌ. 35Chquiꞌ huadxíꞌi lzaꞌliꞌ tuliꞌ yetuliꞌ, láquibeꞌi yúguꞌtë bunách daꞌliꞌ nedaꞌ.
Rnëꞌ Jesús gnëꞌ Pedro cutu nunbëꞌë Lëꞌ
36Niꞌr gnabnëꞌ Jesús Simón Pedro, rnëꞌ:
―Xan, ¿gazxcz tsijuꞌ?
Bubiꞌë didzaꞌ Jesús, rnëꞌ:
―Ga naꞌ tsijaꞌ nedaꞌ, cutu gac sáꞌlenuꞌ nedaꞌ naꞌa, san huadzéy guiduꞌ ga tsijaꞌ nedaꞌ.
37Pedro rëꞌ Lëꞌ:
―Xan, ¿bizx quië cutu gac sáꞌlenaꞌ Liꞌ naꞌa? Chzoaꞌ udödaꞌ yöl‑laꞌ naꞌbán quiaꞌ, gatiaꞌ le nadxiꞌidaꞌ Liꞌ.
38Bubiꞌë didzaꞌ Jesús, rëꞌ lëꞌ:
―¿Naruꞌ udöduꞌ yöl‑laꞌ naꞌbán quiuꞌ le nadxiꞌinuꞌ nedaꞌ? Le nactë rëpaꞌ liꞌ, tsonn lzu táꞌbaguꞌu, gnauꞌ cutu núnbëꞌu nedaꞌ ziꞌal ca cödxbaꞌ zxiꞌn druz.
Currently Selected:
San Juan 13: zsr
Highlight
Share
Copy
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.