Romanos 1
1
Apóstol Pablo napakunqan
1Noqa Pablum Jesucristupa sirwiqnin këkä. Apostolnin kanäpaq Teyta Dios churamashqa kaptinmi pëpa alli willakïninta willakur purikä.
2Teyta Dios änikushqan alli willakï willakushqa kananpaqqa unë profëtakunam qellqayarqan. Tsë qellqayashqanmi Teyta Diospa sagrädu palabran këkan. 3Tsë alli willakïqa Teyta Diospa Tsurin [Señornintsik Jesucristupam]. Pëmi rey Davidpa castanpita yurikurqan.#Mat. 1.1; 12.23. 4Wanuratsiyaptinpis Espíritu Santum poderninwan kawaritsimushqa. Tsënöpam Señornintsik Jesucristuqa Teyta Diospa Tsurin kashqanta musyantsik.
5Jesucristo noqantsik rëkur wanushqa kaptinmi Teyta Dios ankupämar apostolnin kanäpaq churamashqa. Tsëmi jinantin nacionkunachö pïmëtapis willapä Jesucristuman markäkur y Teyta Dios munashqannö kawar pëta alabayänanpaq. 6Qamkunatapis Teyta Diosmi akrayäshurqunki Jesucristupa makinchöna kawayänëkipaq.
7Romachö täraq markäkuq mayikuna, Teyta Diosmi kuyayäshurniki wamrankuna kayänëkipaq qayayäshurqunki. Yayantsik Teyta Dios y Señor Jesucristo ankupäyäshurniki alli kawayänëkipaq yanapëkulläyäshï.
Romaman Pablo ëwëta munanqan
8Wawqikuna y panikuna, Jesucristuman markäkuyashqëkita jinantinchö parlayaptinmi Jesucristupa shutinchö Teyta Diosta qamkunapaq payllä nikü. 9Waran waran qamkunapaq mañakushqäta Teyta Diosmi musyan. Pëtam sirwï Tsurin Jesucristupa alli willakïninta llapan shonqüwan willakur.
10Tsëmi mañakïkä Teyta Dios munaptinqa imanöpapis qamkunaman watukakuq shamunäpaq. 11Qamkunawan tinkïtam munëkä. Espíritu Santu käyitsimashqannömi Jesucristuman shumaq markäkuyänëkipaq käyitsiyashqëki. 12Tsënölla juknintsik juknintsik kallpatsanakushun Jesucristuman alli markäkunantsikpaq.
13Wawqikuna y panikuna, atska kutim qamkunaman watukakuq shamïta munarqä.#Hech. 19.21. Tsënö kaptinpis atäju kaptinmi puëdirqütsu. Wakin markakunachö willakuptï mana Israel nunakuna Jesucristuta chaskikuyashqannö qamkuna kaqchöpis Jesucristuta chaskikuyänanpaqmi willakïta munëkä. 14Griego kayaptinpis, mana griego kayaptinpis, yachaq kayaptinpis, mana yachaq kayaptinpis llapan nunakunatam Jesucristupa willakïninta willapänä precisan. 15Tsëmi Jesucristupa alli willakïninta qamkunatapis willapäyänaqpaq imëkanöpapis Romaman shamïta munëkä.
16Noqa manam penqakütsu Teyta Diospa alli willakïninta willakur. Tsë willakïqa Teyta Diospa poderninmi llapan chaskikuqkunata salvananpaq.#Mar. 8.38; 1Cor. 1.18. Puntataqa Israel nunakunatam musyatsirqan y tsëpitanam mana Israel nunakunatapis musyatsirqan. 17Alli willakïninchömi Teyta Dios käyitsimantsik jutsata rurashqantsikpita perdonamashqantsikta. Tsënö perdonamantsik pëman markäkushqam. Palabranchöpis kënömi qellqarëkan: <<Munashqänö kawaq nunaqa noqaman markäkamurmi kawanqa>>.#Hab. 2.4.
Nunakuna jutsasapa kayanqan
18Ciëlupita patsam Teyta Dios piñakur pïmëtapis jutsa ruraqkunata castiganqa. Tsë nunakunaqa jutsata rurarmi tsapäyan wakin nunakunapis Teyta Diospa willakïninman mana creyikuyänanpaq. 19Jutsata rurarpis nunakuna musyayanmi Teyta Dios kashqanta. Pë kashqanta kikin Teyta Diosmi musyatsin. 20Kamashqankunata rikarmi unëpita patsa nunakuna musyayan Teyta Dios kashqanta y llapanpaqpis puëdiq kashqanta.#Hech. 17.24-25. Tsëmi Teyta Diospa nöpanchö pipis tsapakur ninqatsu: <<Noqa manam musyallarqütsu qam kashqëkita>>.
21Teyta Dios kashqanta musyëkarpis nunakuna manam pëta wiyakuyantsu ni payllä nikuyantsu. Manakaqkunaman peqankuna churakashqa kaptinmi yarpëninkunapis paqwë upayashqa këkan.#Efe. 4.17-18. 22Kikinkuna yachaq tukïkarpis manam imatapis musyayantsu ni mäkuyantsu. 23Tsëmi wiñëpa kawaq Teyta Diosta adorayänanpa rantin ïdulukunata adorayan. Tsë ïdulukunatam rurayan nunatanö, päriqkunatanö#1.23 Wakin nunakunaqa bolaqkunatanö niyanmi., wätakunatanö y lätëpa puriqkunatanö.
24Ïdulukunata adorayaptinmi Teyta Dios piñar pëkunata jaqirishqa shonqunkuna munashqannö melanëpaq kaqkunata rurakuyänanpaq y jukwan jukwan penqakïpaq kaqkunata rurakuyänanpaq. 25Tsë nunakunaqa kamamaqnintsik Teyta Diosllata adorayänanpaq këkashqanta musyëkarmi pë kamashqankunallata adorayan. Tsëmi rasun kaqman creyiyänanpa rantin manakaqkunaman creyiyan. Teyta Dios imëyaqpis adorashqa këkullätsun. Amén.
26Tsëmi tsë nunakunata Teyta Dios jaqirishqa penqakïpaq mana allikunata rurakuyänanpaq. Jaqirishqa kaptinmi warmikunapis ollqullawan pununakuyänanpa rantin warmipura pununakuyan. 27Tsënöllam ollqukunapis warmiwan pununakuyänanpa rantin ollqupura penqakïpaq pununakuyan. Tsëmi jutsata rurayashqanmannö pëkunata Teyta Dios castiguëkan.
28Teyta Dios munashqannö kawëta mana munayaptinmi mana penqakushpa jutsata rurar kawayänanpaq Teyta Dios jaqirishqa. 29Tsënö kawarmi imëka jutsatapis rurar [fornicación jutsata rurayan,] mana alli kayan, kikinkunallapaq imatapis munayan, chikinakuyan, imbidiösu kayan, nuna mayinta wanutsiyan, achäquita ashipäkuyan, engañanakuyan, tukïläya mana allikunata rurayan y wasarima kayan. 30Tsënöllam pitapis penqapäyan, [nuna mayinta tumpar shimpipäyan,] Teyta Diospa contran kayan, pïmëwanpis liryakuyan, nuna tukuyan, alabakuyan, llutankunata rurayänanpaq yarpäyan y tëtanta mamanta cäsuyantsu. 31Kullu rinrim, baduläquim, ankupäkïta mana yachaqmi y perdonakïta mana yachaqmi kayan. 32Pëkuna musyayanmi tsënö kawaqkuna wanutsishqa kayänanpaq Teyta Dios ninqanta. Tsëta musyëkarpis mana mantsakushpam jutsata rurayan. Tsëpis manam tsëllatsu, sinöqa wakinkuna llutanta rurayaptinpis kushikuyanmi.
Currently Selected:
Romanos 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.