Juan 6
6
Pitsqa waranqa nunakuna mikuyanqan
Mateo 14.13-21; Marcos 6.30-44; Lucas 9.10-17
1Tsëpitanam Galilea qochapa wak tsimpanman Jesús pasarqan. Tsë qochatam Tiberias niyan. 2Qeshyaqkunata kachakätsishqanta rikarmi atskaq nunakuna Jesúspa qepanta ëwayarqan. 3Qocha tsimpanchönam jirkaman ëwëkur discïpulunkunawan täkuriyarqan. 4Israel nunakunapa Pascua fiestankunapaq ichikllanam pishikarqan. 5Pëkuna këkäyanqanman atskaq nunakuna chaqta rikarnam Felipita Jesús kënö nirqan: <<Këtsika nunakunapaq ¿mëpitataq mikïta rantimushun?>>
6Tsënö nirqan <<mä Felipe imash ninqa>> nirmi. Jesúsqa musyarqannam imata rurananpaq kaqtapis. 7Felipinam nirqan: <<Ishkë pachak (200) junaq uryar ganapakushqantsikwan rantimushqapis manam tinkunmantsu ichik ichiklla llamiriyänanllapaqpis>>.
8Tsënö niptinmi Jesúspa discïpulun Andrés nirqan (Andrésqa Simón Pedrupa wawqinmi karqan): 9<<Këchö juk wamrapam pitsqa cebäda tantan y ishkë pescädun këkäpun. Tsëllaqa manachi llapan nunakunapaq tinkumantsu>>.
10Jesúsnam llapan nunakunata jamatsiyänanpaq nirqan. Tsëmi tsampakunaman nunakuna täkuriyarqan. Nunakunaqa pitsqa waranqanömi (5,000) kayarqan. 11Tsë pitsqa tantata Jesús tsarirkurnam Teyta Diosta mañakur payllä nikurqan. Tsëpitanam tsëchö tëkaq nunakunata [discïpulunkuna] rakiyarqan. Tsënöllam pescädutapis rakiyarqan. Rakiyaptinmi llapanpis pacha junta mikuyarqan.
12Nunakuna mikuriyaptinnam discïpulunkunata kënö nirqan: <<Katukunata llapanta ëlluyämï. Ama imatapis perditsishuntsu>>.
13Tsënö niptinmi pitsqa cebäda tantallapita katunkunata chunka ishkë canasta juntata ëlluyarqan. 14Tsë milagru rurashqanta rikëkurmi nunakuna niyarqan: <<¡Kë nunaqa Teyta Dios kachamunanpaq kaq profëtam!>>#Deut. 18.15-18.
15Tsënö nirmi reyninkuna kananpaq mälas churëta munayarqan. Tsëta mäkurirmi jirkapa Jesús japallan ewkurqan.
Yaku jananpa Jesús ëwanqan
Mateo 14.22-27; Marcos 6.45-52
16Patsa tsaqëkaptinnam Jesúspa discïpulunkuna qocha kuchunman kutikuyarqan. 17Patsa tutapëkaptinnam barcuman lloqarkur Capernaúm markaman ewkuyarqan. Tsënö kaptinpis Jesúsqa manaran kutirqanraqtsu. 18Ëwëkäyaptinnam alläpa vientuptin yaku laqchiqsar qallakïkurqan. 19Juk lëwatanö ëwëkarnam Jesústa rikäyarqan yaku jananpa pëkuna kaqman ëwëkaqta. Tsëta rikëkurmi alläpa mantsakäyarqan. 20Tsëmi Jesús nirqan: <<¡Noqam kä! ¡Ama mantsakäyëtsu!>>
21Tsëmi Jesús lloqananpaq barcuta päratsiyarqan. Tsëpitaqa rätullanam qocha kuchunman chäriyarqan.
Wiñëpa kawatsikuq tanta kanqanta Jesús ninqan
22Waränin qoyanam quedaq nunakuna mäkuriyarqan tsëchö këkaq jukllëlla barcuwan discïpulunkunalla ewkuyashqanta. Tsënöllam musyayarqan pëkunawan Jesús mana ëwashqanta. 23Tsënö yarpakachar këkäyaptinmi Tiberias markapita barcukuna chäyarqan Señor Jesús tantata qarashqan kaqman. 24Jesústapis ni discïpulunkunatapis mana tarirnam tsë barcukunawan Jesústa ashirnin Capernaúm markaman ewkuyarqan.
25Capernaúmchö tarïkurnam tapuyarqan: <<Rabí, ¿imëtaq këman shamurqunki?>>
26Jesúsnam nirqan: <<Rasunpam rasunpam niyaq: Manam qamkunaqa milagrukunata rikartsu ashikäyämanki, sinöqa pacha junta mikuyashqëkillapitam ashikäyämanki. 27Ushakaq mikïllapaqqa ama uryayëtsu, sinöqa wiñëpa kawatsikuq mikïta tariyänëkipaq uryayë. Tsë mikïtaqa Nunapa Tsurinmi qarayäshunki. Tsëpaqmi Teyta Dios kachamushqa>>.
28Tsënam tapuyarqan: <<Teyta Diospa uryëninchö uryayänäpaq ¿imatataq rurayäshaq?>>
29Jesúsnam nirqan: <<Teyta Diospa uryëninqa këkan kachamushqanman markäkuyashqëkim>>.
30Tsënam niyarqan: <<Teyta Dios kachamushushqëkita creyiyänäpaqqa mä juk milagruta ruraramï. 31Unë castantsikkunaqa chusyaq jirkachö manátam mikuyarqan. Teyta Diospa palabranchöpis kënömi qellqarëkan: <Ciëlupita tantatam mikuyänanpaq qararqan> >>.#Éxo. 16.4, 15; Sal. 78.24.
32Tsëmi Jesús nirqan: <<Rasunpam rasunpam niyaq: Manam Moiséstsu ciëlupita tantata qorqan, sinöqa Teytämi. Pëmi ciëlupita rasunpa kawatsikuq tantataqa qoyäshunki. 33Tsë tantaqa ciëlupita shamuq nunam këkan. Pëmi pïmëtapis wiñë kawëta qonqa>>.
34Nunakunanam niyarqan: <<Tëtë, tsë tantalläkunaqa imëpis qarëkalläyämë>>.
35Jesúsnam nirqan: <<Noqam kawatsikuq tanta kä. Noqata chaskimaq kaqqa imëpis mananam mallaqanqanatsu ni yakunanqanatsu. 36Nöpata niyashqaqnöllam rikëkämarpis creyiyämankitsu.
37<<Teytä qomashqan nunakunaqa llapanmi chaskiyäman. Noqata chaskimaq kaqkunataqa manam pitapis qarqushaqtsu. 38Manam kikï munashqäta ruranäpaqtsu ciëlupita shamurqü, sinöqa kachamaqnï munashqanta ruranäpaqmi. 39Kachamaq [Teytäqa] manam munantsu qomashqan nunakunata ni jukllëllatapis oqranäta, sinöqa llapantapis juiciu junaqchö kawaritsimunätam munan. 40Pëqa munan llapanpis Tsurinman creyiqkuna wiñë kawëta tariyänantam. Pëkunataqa juiciu junaqchömi kawaritsimushaq>>.
41<<Noqaqa ciëlupita shamuq tantam kä>> niptinmi tsëchö këkaq Israel nunakuna Jesústa manakaqpaq churar 42niyarqan: <<Kë nunaqa ¿manaku Josépa tsurin Jesús? Musyantsikmi mamänin tëtan pï kashqantapis. ¿Imanirtaq pëqa <ciëlupitam shamurqü> nikämantsik?>>
43Jesúsnam nirqan: <<Ama manakaqpaq churayämëtsu. 44Kachamaq Teytä mana käyitsiptinqa manam pipis chaskimanmantsu. Chaskimaqkunataqa juiciu junaqchömi kawaritsimushaq. 45Profëtakuna qellqayashqanchöpis kënömi nikan: <Llapan nunakunata kikïmi yachatsishaq>.#Isa. 54.13. Tsë nishqannöllam Teyta Dios käyitsishqanta chaskikuq kaqkunaqa llapanpis chaskiyäman. 46Teyta Diosta manam pipis rikashqatsu. Diospita shamuq nunallam pëtaqa rikashqa. 47Rasunpam rasunpam niyaq: Noqata chaskimaqkunaqa wiñë kawëtam tariyanqa.
48<<Noqam kawatsikuq tanta këkä. 49Unë castëkikunaqa chusyaq jirkachö manáta mikurpis wanuyarqanmi. 50Ciëlupita shamuq tantata mikuqkunaqa manam wanuyanqatsu. 51Noqam ciëlupita shamuq kawëkaq tanta kä. Pipis kë tantata mikurqa wiñë kawëtam tarinqa. Kë tantaqa kikïpa ëtsämi. Nunakuna wiñë kawëta tariyänanpaqmi ëtsäta sacrificiutanö Teyta Diosman qoykushaq>>.
52Israel nunakunanam kikinpura kënö ninakuyarqan: <<¿Imanötaq kë nuna ëtsanta mikutsimashwan?>>
53Jesúsnam nirqan: <<Rasunpam rasunpam niyaq: Nunapa Tsurinpa ëtsanta mana mikurqa y yawarninta mana upurqa manam wiñë kawëta tariyankitsu. 54Ëtsäta mikur y yawarnïta upurqa wiñë kawëtam tariyanki y juiciu junaqchöpis kawaritsiyämushqëkim. 55Noqapa ëtsäqa rasunpa kaq mikïmi y yawarnïpis rasunpa kaq yakum. 56Ëtsäta mikuq kaqqa y yawarnïta upuq kaqqa noqawan juknöllam kanqa y noqapis pëwan juknöllam kashaq.
57<<Noqa kawëkä kachamaqnï wiñëpa kawaq Teytä kawëta qomaptinmi. Teytäpita noqa kawëta chaskishqänöllam ëtsäta mikuq kaqkunapis noqapitaraq kawëta chaskiyanqa. 58Ciëlupita shamuq tantam noqaqa kä. Tsë tantaqa manam unë castëkikuna manáta mikuyashqannötsu këkan. Manáta mikurpis pëkunaqa wanuyarqanmi. Kë tantata mikuqkunaqa wiñëpam kawayanqa>>.
59Jesús tsënö yachatsirqan Capernaúmchö këkaq sinagögachömi.
Jesús yachatsinqankuna wiñë kawëta qomänantsikpaq kanqan
60Tsënö yachatsishqanta wiyarirnam Jesúspa atskaq discïpulunkuna kënö niyarqan: <<Kë yachatsikïkunaqa alläpa sasam. Tsëta ¿piraq creyinqa?>>
61Tsënö niyashqanta käyirmi Jesús nirqan: <<¿Yachatsikushqäpitaku piñakurkuyanki? 62Tsënö piñakurqa ¿imaraq niyankiman Nunapa Tsurin ciëluman kutikuqta rikëkurnäqa? 63Manam pipis kikinllapitatsu wiñë kawëta tarin, sinöqa Espïritupitam. Noqa yachatsishqäqa Espíritu Santupita karmi wiñë kawëta qoyäshunëkipaq këkan. 64Tsënö këkaptinpis wakinnikiqa nishqäkunata manam creyiyankitsu>>.
Jesús tsënö nirqan mëqan nunakuna pëta mana chaskikuyashqanta musyarmi. Tsëtaqa qallëkunanpita patsam musyarqan. Jina musyarqanmi mëqan discïpulun pëta rantikunanpaq kashqantapis.
65Jesúsnam nirqan: <<Wakinniki mana creyiyashqëkita musyarmi niyarquq: <Teytä mana käyitsiptinqa manam pipis chaskimanmantsu> >>.
66Tsëkunata niptinnam atskaq discïpulunkuna Jesústa jaqirir ewkuyarqan. 67Ewkuyaptinnam chunka ishkë akrashqan kaq discïpulunkunata Jesús kënö tapurqan: <<¿Qamkunapis ewkïtaku munëkäyanki?>>
68Tsëmi Simón Pedro kënö nirqan: <<Tëtë, qampita mas jukqa manam pipis kantsu qatiyänäpaq. Nishqëkikunaqa wiñë kawëta tariyänäpaqmi këkan. 69Noqakunaqa qammanmi creyiyä. Qamqa Teyta Dios kachamunqan santu nunam kanki#6.69 Wakin qepa kaq griego copiakunam niyan: Qamqa kawëkaq Teyta Diospa Tsurin Cristum këkanki.>>.#Mat. 16.16; Mar. 8.29; Luc. 9.20.
70Jesúsnam nirqan: <<¿Manaku discïpulükuna kayänëkipaq qamkunata chunka ishkëta akrayarquq? Tsënö këkaptinpis juknikiqa diablupa munëninchömi këkan>>.
71Jesús tsënö nirqan Simónpa tsurin Judas Iscariotipaqmi. Pëmi apostolnin karpis Jesústa wanutsiyänanpaq rantikurqan.
Currently Selected:
Juan 6: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.