Juan 16
16
1<<Llapan këkunata willëkäyaq noqaman imëpis markäkayämunëkipaqmi. 2Sinagögapitapis qarquyäshunkim. Teyta Dios munashqanta rurëkäyashqanta yarparmi wanutsiyäshunki. 3Tsënö rurayäshunki noqata mana reqimarmi ni Teytätapis mana reqirmi. 4Qamkunatam willayaq nishqänö pasayäshuptiki llapanpis cumplikëkanqanta käyiyänëkipaq. Nöpataqa manam willayarqaqraqtsu tsënö pasayäshunëkipaq kashqanta. Kananqa ewkunäpaqna karmi willëkuyaq.
Espíritu Santu shamunanpaq Jesús ninqan
5<<Kananqa kachamaqnï kaqman kutikunäpaqnam këkä. Tsënö kaptinpis mëpa ëwanäpaq kashqanta manam mëqëkipis tapuyämankitsu. 6Tapuyämänëkipa rantinmi tsëkunata niriyaptiq llakishqa tikrakuriyanki. 7Rasunpam niyaq: Qamkunapa biennikikunam ewkushaq. Mana ewkuptïqa Yanapakuq Espíritu Santu#Juan 14.16; 15.26. manam shamunqatsu. Tsëmi ewkurqa pëta kachamushaq.
8<<Espíritu Santu shamurmi nunakunata käyitsinqa jutsayuq kayashqanta, Teyta Dios munashqannö kawayänanpaq kashqanta y juzgashqa kayänanpaq kashqanta. 9Jutsayuq kayashqanta käyitsinqa noqata mana chaskiyämaptinmi. 10Teyta Dios munashqannö kawayänanpaqmi käyitsinqa Teytä kaqman kutikuptï. Kutikuptïqa mananam rikäyämankinatsu. 11Juzgashqa kayänanpaqmi käyitsinqa kë patsapa mandakuqnin#16.11 Kë patsapa mandakuqninpaq parlarqa Satanáspaqmi Jesús parlarqan. vencishqana kaptin.
12<<Atskaran kan qamkunata niyänaqpaq. Tsënö kaptinpis llapanta niyaptiqqa manam käyiyämankitsu. 13Rasun kaqta käyitsikuq Espíritu Santu shamurqa Diospa willakïninta llapantam käyitsiyäshunki. Pëqa manam kikinpa yarpëninllapitatsu käyitsiyäshunki, sinöqa noqa nishqäkunallatam. Tsënöllam ima pasakunanpaq kaqkunatapis käyitsiyäshunki. 14Noqa nishqäkunata käyitsiyäshunki noqata alabayämänëkipaqmi. 15Teytä nishqankunaqa noqa ninqäkunam këkan. Tsëmi Espíritu Santu nishqäkunata käyitsiyäshunëkipaq niyarquq.
Llakikuyanqanpita kushikuyänanpaq Jesús ninqan
16<<Ichikllanam pishin mana rikäyämänëkipaq. Tsëpita ichik rätullatanam yapë rikärayämanki>>.
17Tsënö niptinnam discïpulunkuna juknin jukninpis kënö ninakuyarqan: <<Tsënö nirqa ¿imatataq nikämantsik? ¿Imanirraq: <Ichikllanam pishin mana rikäyämänëkipaq> nikämantsik? Jina ¿imanirraq: <Ichikllanam pishin yapë rikäyämänëkipaq> nikämantsik? Tsëpitana ¿imanirraq: <Teytä kaqman ëwashaq> nikämantsik? 18<Ichikllanam pishin> nishqanqa ¿ima ninantaq? Manam käyintsiktsu imapita parlëkashqantapis>>.
19Tsëta tapïta munayashqanta käyirirnam Jesús nirqan: <<¿<Ichikllanam pishin mana rikäyämänëkipaq> y <ichikllanam pishin yapë rikäyämänëkipaq> niyashqaqpitaku yarpakachëkäyanki? 20Rasunpam niyaq: Ewkuptïmi Diosta mana cäsukuq nunakuna kushikuyanqa. Tsënö kaptinpis qamkunaqa llakikurmi waqayanki. Tsënö llakikurpis tsëpitaqa kushikuyankim. 21Warmikuna qeshpikï nanë tsariyaptin waqarpis qeshpikurirqa kushikurmi nanëwan jipayashqantapis yarpäyannatsu. 22Tsënöllam qamkuna kanan llakikurpis yapë tinkurishqa kushikuyanki. Tsë kushikïtaqa manam pipis qochiyäshunkitsu. 23Yapë tinkurishqaqa manam imatapis tapuyämankinatsu.
<<Rasunpam niyaq: Noqapa shutïchö imatapis mañakuyashqëkitam Teytä qoyäshunki. 24Noqapa shutïchö manam Teytäta imatapis mañakuyarqunkiraqtsu. Kananpitaqa shutïchö mañakuyë. Mañakurqa chaskiyankim. Tsënöpam alläpa kushikuyanki.#Mat. 7.7-11; Stg. 1.5-6.
25<<Kananyaqqa iwalatsillapam yachatsiyarquq. Tsëpitaqa käyikïllapaqnam Teyta Diospa willakïninta yachatsiyashqëki. 26Tsë witsan manam noqanatsu qamkunapaq Teytäta mañakushaq, sinöqa kikikikunam shutïchö mañakuyanki. 27Tsënö mañakuyanki Teytä kuyayäshuptikim. Pëmi kuyayäshunki pëpita shamushqäta creyir kuyayämaptiki. 28Teytä kaqpita kë patsaman shamushqa karmi Teytä kaqman kutikushaq>>.
29Tsënö niptinmi discïpulunkuna kënö niyarqan: <<¡Kananqa niyämanqëkita paqwëmi käyiriyä! ¡Mana iwalatsikïllapanam parlapëkäyämanki! 30Kananqa musyayämi llapanta musyashqëkita. Tsëmi yachaq kashqëkita pipis tapushunkinatsu. Kananmi sï Teyta Dios kaqpita shamushqëkita creyiriyä>>.
31Jesúsnam nirqan: <<¿Tsëraqku creyiriyanki? 32Höranam chäramushqa japalläta jaqirïkamar wakpa këpa ewkuyänëkipaq. Tsënö ewkuyaptikipis manam japallätsu këkäshaq, sinöqa Teytämi noqawan këkanqa.
33<<Llapan këkunata willapäyarquq noqaman markäkamur alli kawayänëkipaqmi. Kë patsachö kawayashqëkiyaqqa jipayankiran. Tsënö kaptinpis kallpata tsariyë. Noqam kë patsachö llapan mana allikunata vencirirqü>>.#Rom. 8.37; 2Cor. 2.14; 1Juan 5.4-5; Apoc. 3.21; 5.5.
Currently Selected:
Juan 16: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.