Juan 11
11
Lázaro wanunqan
1Betania markachömi Lázaro shutiyuq nuna qeshyëkarqan. Tsëchömi paninkuna María y Martawan täräyarqan.#Luc. 10.38-39. 2(Maríam Jesúspa chakinman perfümita jichëkur aqtsanwan tsakitsishqa karqan.)#Juan 12.3. 3Lázaro qeshyaptinmi paninkuna Jesúsman willakatsiyarqan kënö nir: <<Teyta, kuyashqëki Lázarum qeshyëkan>>.
4Tsënö willayaptinmi Jesús nirqan: <<Lázaruqa manam wanushqanllachö quedakunanpaqtsu qeshyëkan, sinöqa Teyta Diospis y Tsurinpis puëdiq kayashqanta nunakuna musyayänanpaqmi qeshyëkan>>.
5Jesúsqa alläpam kuyarqan Martata, Maríata y Lázaruta. 6Alläpa kuyarpis Lázaro qeshyëkashqanta willaptinpis manam tsë höratsu ëwarqan, sinöqa këkashqanchömi ishkë junaq quedakurqan. 7Tsëpitanam discïpulunkunata nirqan: <<Judea provinciapa yapë ëwashun>>.
8Discïpulunkunanam niyarqan: <<Rabí, tsëllaran tsëchö nunakuna tsampipa wanutsita munayäshurqunki.#Juan 10.31, 39. ¿Tsënö këkaptinku kutita munëkanki?>>
9Tsëmi Jesús nirqan: <<¿Manaku juk junaqchö chunka ishkë höra këkan? Junaqpa purirqa aktsita rikarnin nunakuna manam ishkiyantsu.#Juan 8.12; 9.5. 10Paqaspa purirqa imachöpis tsaktakurmi ishkiyan. Tsënö ishkiyan pëchö aktsi mana kaptinmi>>.#11.10 Tsëkunata parlarmi Jesús kënö nirqan: Hörä manaraq chämuptinqa manam wanutsiyämanqaraqtsu. Tsënölla qamkunawan këkaptïqa manam imapis pasayäshunkitsu.
11Tsëpitanam nirqan: <<Amïguntsik Lázaruqa punukashqallam këkan. Riyatsinantsikpaq aku ëwashun>>.
12Discïpulunkunanam niyarqan: <<Teyta, punukashqalla karqa kachakäramunqam>>.
13Lázaro punukashqa kashqanta nirqa wanushqa kashqantam Jesús nirqan. Discïpulunkunaqa mana käyirmi punukashqa këkashqanllata yarpäyarqan. 14Tsëmi Jesús nirqan: <<Lázaruqa rasunpam wanushqa. 15Wanushqan höra tsëchö mana kashqätam kushikü. Kananqa noqamanmi mas creyiyämunki. Aku ëwashun>>.
16Tsënam Millish niyashqan Tomás discïpulu mayinkunata kënö nirqan: <<Tsënö kaptinqa Jesúswan wanunantsikpaq ëwashun>>.
Wanushqakunata kawaritsimunanpaq Jesús puëdiq kanqan
17Betaniaman Jesús chäriptinnam chusku junaqna Lázaro pamparëkashqanta willayarqan. 18Jerusalénpita Betaniaman media lëwanölla kaptinmi 19atskaq nunakuna ëwayarqan Martata y Maríata shoqayänanpaq. 20<<Jesúsmi shamïkan>> niqta wiyëkurmi Marta taripaq ëwarqan. Maríanam wayichö quedakurqan. 21Jesúswan tinkurirnam Marta kënö nirqan: <<Teyta, këchö kaptikiqa turï manam wanunmantsu karqan. 22Tsënö kaptinpis musyämi llapan mañakushqëkita Teyta Dios rurananpaq kashqanta>>.
23Jesúsnam nirqan: <<Turikiqa kawarimunqam>>.
24Martanam nirqan: <<Awmi Teyta. Änirpis musyämi juiciu junaqchö wanushqakuna kawariyämuptin turïpis kawarimunanpaq kashqanta>>.#Dan. 12.2.
25Jesúsnam nirqan: <<Noqam wanushqakunata kawaritsimuq kä y wiñëpa kawatsikuq kä.#Rom. 6.4-5; Col. 2.12; 3.1. Noqaman markäkamuq kaqtaqa wanuptinpis kawaritsimushaqmi. 26Kawëkaqkunapis noqaman markäkamurqa wiñë kawëtam tariyanqa. ¿Tsëta creyinkiku?>>
27Martanam nirqan: <<Awmi, Teyta, noqa creyïmi Teyta Diospa Tsurin kashqëkita. Qamqa kë patsaman shamunanpaq kaq Cristum kanki>>.
Lázarupaq Jesús waqanqan
28Tsëpitanam Marta kutikurqan nanan Maríata qayananpaq. Chärirnam rinrinllachö kënö nirqan: <<Jesúsmi chämushqa. Pëmi qayëkäshunki>>.
29Tsëmi María ras ëwarqan. 30Jesúsqa manaran markaman charqanraqtsu, sinöqa Martawan tinkushqanllachöran këkarqan. 31Wayipita María ras ewkuqta rikarmi tsëchö këkaqkuna qepanta ëwayarqan: <<Turin pamparanqanmanchi waqaq ëwan>> nir.
32Jesús kaqman chëkurnam nöpanman qonqurikur María nirqan: <<Teyta, qam këchö kaptikiqa manam turï wanunmantsu karqan>>.
33Maríata y yanaqaqnin nunakunatapis waqëkäyaqta rikarmi Jesúspis alläpa llakikurqan. 34Tsëmi tapurqan: <<¿Mëmantaq pampayashqanki?>>
Pëkunanam niyarqan: <<Teyta, rikätsiyänaqpaq ëwashun>>.
35Tsëmi Jesús waqarqan. 36Waqaptinnam wakin nunakuna kënö niyarqan: <<Rikäyë, Lázaruta alläpachi kuyarqan>>.
37Wakinnam niyarqan: <<Wisku nunatapis kachakëkätsirqa ¿manatsuraq Lázarutapis kachakätsinman karqan?>>
Lázaruta Jesús kawaritsinqan
38Alläpa llakishqam Jesús charqan Lázaro pamparashqan machëman. Punkunnam jatun rumiwan tsapararqan. 39Jesúsnam nirqan: <<Tsaparëkaq rumita wititsiyë>>.
Tsënö niptinmi Lázarupa panin Marta kënö nirqan: <<Teyta, chusku junaqnam pamparëkan. Alläpanachi asyëkun>>.
40Jesúsnam nirqan: <<¿Manaku nirquq noqaman markäkamurqa Teyta Dios puëdiq kashqanta rikänëkipaq?>>
41Tsënö niptinnam tsaparëkaq rumita witiratsiyarqan. Jesúsnam ciëluman rikarkur nirqan: <<Teytallä, mañakushqaqta wiyamashqëkipitam qamta payllä nikuq. 42Musyämi imëpis wiyamashqëkita. Tsënö kaptinpis mañakamü këchö këkaq nunakuna kachamashqëkita creyikuyänanpaqmi>>.
43Tsëpitanam Jesús qaparipa nirqan: <<¡Lázaro, yarqamï!>>
44Tsënö niptinnam kawarirkur yarqamurqan peqan, makin y chakin wankushqa. Tsëmi Jesús nirqan: <<Purinanpaq paskayë>>.
Jesústa wanutsiyänanpaq mandakuq sacerdötikuna parlayanqan
Mateo 26.1-5; Marcos 14.1-2; Lucas 22.1-2
45Lázaruta kawaritsishqanta rikëkurmi Maríata yanaqaq nunakuna atskaq creyikuyarqan Jesúsman. 46Tsënö kaptinpis wakinnam fariseukunaman ëwëkur Lázaruta Jesús kawaritsishqanta willayarqan. 47Tsëta musyarirmi mandakuq sacerdötikunawan fariseukuna llapan Sanedrín juezkunata qayëkatsir niyarqan: <<Tsë nunaqa atska milagrukunatam rurëkan. ¿Imatataq rurashun? 48Mana imatapis rurashqaqa llapan nunakunam pëman creyikurkuyanqa. Tsëta musyarirnam Roma soldädukuna shamur templuntsikta juchutsir noqantsiktapis chipyëpa ushakätsimäshun>>.
49Tsënam sumo sacerdöti Caifás kënö nirqan: <<¡Qamkuna manam imatapis musyayankitsu! 50Llapantsik wanunantsikpa rantin mas allim kanman juk nunalla wanuptin. ¿Imanirtaq tsëta käyiyankitsu?>>
51Caifásqa manam kikinpa yarpëninllapitatsu tsënö nirqan, sinöqa tsë wata sumo sacerdöti kaptinmi Teyta Dios käyitsirqan llapan nunakunapa rantin Jesús wanunanpaq kashqanta. 52Manam Israel nunakunallapaqtsu wanunan karqan, sinöqa Diospa wamrankuna mëtsëchöpis ramakashqa këkaqta ëllumunanpaqmi. 53Tsë junaqpitam autoridäkuna yachatsinakuyarqan Jesústa wanutsiyänanpaq.
54Tsëmi Israel autoridäkunapita ratakïllapa Jesús purirqan. Jerusalénpita discïpulunkunawan Efraín markaman ewkurmi tsëchö quedakuyarqan. Tsë markaqa chusyaq jirka nöpanllachömi këkan.
55Israel nunakunapa Pascua fiestan qallëkunanpaqna këkaptinnam markankunapita atskaq nunakuna purificäkuyänanpaq Jerusalénman ëwayarqan. 56Jesústa ashirnam templupa patiunchö juknin juknin tapunakuyarqan: <<Qamkuna ¿imata yarpäyanki? ¿Fiestapaq Jesús shamunqatsuraq?>>
57Mandakuq sacerdötikunam y fariseukunam nunakunata kënö niyashqana kayarqan: <<Jesústa mëchöpis rikarqa prësu tsaritsiyänäpaq juklla willayämanki>>.
Currently Selected:
Juan 11: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.