Colosenses 1
1
Apóstol Pablo napakunqan
1-2Colosas markachö salvashqa kaqkuna:
Noqa Pablum, Jesucristupa apostolnin kanäpaq Teyta Dios churamashqa kaptin wawqintsik Timoteuwan kë cartata cartakayämü. Qamkunaqa Teyta Diospana karmi pë munashqannö kawëkäyanki. Yayantsik Teyta Dios [y Señor Jesucristo] ankupäyäshurniki alli kawayänëkipaq yanapëkulläyäshï.
Teyta Diosta Pablo mañakunqan
3Qamkunapaq cada mañakurmi Señornintsik Jesucristupa Teytan Diosta imëpis payllä nikäyä 4Jesucristuman shumaq markäkuyanqëkitam y creyikuq mayintsikkunawan kuyanakuyashqëkitam musyariyarqü. 5Teyta Dioswan gloriachö wiñëpa kawayänëkipaq kashqanta musyarmi tsënö kawëkäyanki. Jesucristupa willakïninta chaskiyashqëkipita patsam gloriachö kawayänëkipaq kashqanta musyayarqunki.
6Jesucristupa alli willakïnin qamkunaman chämushqannömi mëtsëmanpis chëkan. Tsë alli willakïta chaskikurmi Teyta Dios munashqannöna kawëkäyan. Qamkunapis Jesucristupa alli willakïninta chaskiyashqëkipita patsam Teyta Dios ankupäkuq kashqanta käyikur pë munashqannöna kawëkäyanki.
7Tsë willakïninta chaskiyänëkipaqqa willakuq mayï kuyë Epafrasmi#Col. 4.12; Film. 23. willapäyäshurqunki. Pëpis Jesucristupa sirwiqnin karmi shumaq käyitsiyäshurqunki. 8Epafrasmi willayämashqa Espíritu Santu yanapayäshuptiki kuyanakur shumaq kawëkäyashqëkita.
9Tsënö kawayashqëkita musyayashqäpita patsam Teyta Diosta imëpis mañakïkäyä Espíritu Santu yachëta qoykuyäshuptiki Teyta Dios munashqannö kawayänëkipaq. 10Pë munashqannö kawar y imëpis allillata rurarmi waran waran pëta reqiyanki.
11Tsënöllam mañakïkäyä poderninwan yanapayäshuptiki ima jipakïchö karpis mana ajayashpa pëman markäkuyänëkipaq 12y kushishqa imëpis payllä niyänëkipaq. Pëmi salvamarquntsik llapan salvashqan kaqkunawan herenciantsikta chaskir gloriachö kawanantsikpaq.
13 Satanáspa makinpitam Teyta Dios jorqamarquntsik#Efe. 6.12. kuyashqan Tsurin Jesucristupa mandakïninchöna kawanantsikpaq. 14Jesucristum [yawarninta ramar] rantimarnintsik jutsantsikkunapita perdonamarquntsik.#Efe. 1.7.
Jesucristo llapanpitapis puëdiq kanqan
15Teyta Diosta mana rikarpis Jesucristuchömi pë imanö kashqantapis käyintsik.
Pëqa llapan kamashqankunapaq punta yuriqmi këkan.#1.15 Llapan kamashqankunapaq punta yuriqmi këkan ninanqa imapis manaraq kaptinmi Jesucristuqa këkarqanna ninan y Jesucristo llapanpaqpis mandaqmi këkan ninanmi (Sal. 89.27).
16Pëwanmi Teyta Dios kamarqan llapan imëkatapis:
ciëluchö kaqkunata, patsachö kaqkunata,
rikanqantsikkunata, mana rikanqantsikkunata
y ciëluchö llapan poderyuqkunatapis.#Efe. 6.12.
Llapantapis kamarqan Jesucristuwanmi y pëpa makinchö kananpaqmi.
17Imapis manaraq kaptinmi Jesucristuqa këkarqanna.
Llapan kamashqankunatapis munëninchömi tsararëkan.#Juan 1.1-3, 18; Heb. 1.2-3.
18Jesucristum peqantsik.
Noqantsiknam iglesian kar cuerpun këkantsik.#Efe. 1.22-23; 4.15.
Llapan wanuqkunapitapis Jesucristo mas puntata kawarimurmi pïmëpitapis mas puëdiq këkan.#Hech. 26.23; Apoc. 1.5.
19Tsënö puëdiq kananpaqmi Jesucristuchö Teyta Dios këkan.
20Jesucristo rëkurmi kë patsachö kaqkunawan y ciëluchö kaqkunawanpis Teyta Dios amishtarqan.#Efe. 2.16.
21Nöpataqa noqantsikpis llutan yarpëyuq karmi Teyta Diospa contran karqantsik. Jutsantsikkunam pëpita rakimarqantsik. 22Tsënö kawëkashqam cruzchö Jesucristo wanushqan rëkur Teyta Dios perdonamarquntsik. Tsëmi pëpa nöpanchö jutsannaqna y santuna kashun.
23Tsëpaqqa Jesucristuman imëpis markäkur cäsukushun. Alli willakïninchö Teyta Dios änimashqantsikta imëpis wiyakushun. Tsë willakïtaqa jinantinchömi willakïkäyan. Tsënöllam noqapis willakïkä willakuqnin kanäpaq Teyta Dios akramashqa kaptin.
Jiparpis Pablo willakunqan
24Mana Israel nunakunata willapashqäpita jipatsiyämaptinmi Jesucristo iglesianpaq jipashqanta cumplï. Pëpa iglesianqa cuerpunmi këkan.#Efe. 1.23. Tsëmi llakikunäpa rantin kushikü. 25Iglesianta sirwinäpaq Teyta Dios churamashqa kaptinmi#Efe. 3.2. qamkunatapis llapan willakïninta musyëkätsiyaq.
26Tsë willakïnintaqa unë nunakuna manam musyayarqantsu. Tsënö kaptinpis creyikuq kaqkunatam kananqa Teyta Dios musyatsimarquntsik. 27Tsëmi musyantsik mana Israel nunakunapaqpis tsë willakï alläpa kushikïpaq kashqanta. Tsë willakïqa kënömi nikan: Jesucristo qamkunachömi këkan. Pëman markäkurmi Teyta Diospa nöpanman chäyanki.
28Tsëmi Teyta Dios yachëta qoyämashqanmannö Jesucristupa willakïninta llapan nunakunata willapar shumaq käyitsiyä. Tsënö willakuyä Jesucristuta pïmëpis chaskikur Teyta Diospa nöpanman jutsannaqna chäyänanpaqmi. 29Tsënö kananpaqmi Jesucristo poderninwan yanapamaptin imanö jiparpis willakur purikä.
Currently Selected:
Colosenses 1: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.