Hechos 2
2
Espíritu Santu shamunqan
1 Pentecostés fiesta junaqmi Jesucristuman markäkuqkuna juk wayichö ëllukashqa këkäyarqan. 2Tsëchö këkäyaptinmi juklla shukukïnöraq alläpa qaparir ciëlupita wiyakamurqan. 3Tsënöllam qallunö qallunö nina niraqkuna juknin jukninman charqan. 4Llapanmi Espíritu Santupa poderninwan imëpis mana parlayashqan idiömakunapa parlar qallëkuyarqan.
5Tsë witsanmi Dios munashqannö kawaq Israel nunakuna jinantin nacionpita Jerusalénchö këkäyarqan. 6Shukukï vientunöraq qapariqta wiyarmi ima pasashqantapis rikaq ëwayarqan. Juknin jukninpis markanchö parlayashqan idiömakunata parlëkäyaqta wiyarmi mantsakäyarqan. 7Tsëmi kënö niyarqan: <<Kë llapan parlëkaqkunaqa ¿manaku Galilea nunakuna kayan? 8Idiömantsikta parlayänanpaq ¿imanöpataq yachakuyashqa? 9Këchöqa jinantinpitam këkantsik: Partiapita, Mediapita, Elampita, Mesopotamiapita, Judeapita, Capadociapita, Pontupita, Asiapita, 10Frigiapita, Panfiliapita, Egiptupita, Libiachö kaq Cirenipa lädunkunapita y Romapitapis. 11Wakinnintsikqa yurikushqantsikpita patsam Israel nunakuna këkantsik. Y wakinnintsiknam Israel nunana kanantsikpaq Teyta Diosta chaskikurquntsik. Cretapitapis, Arabiapitapis këchömi këkantsik. Mëtsëpita karpis kikintsikpa idiömantsikchömi wiyëkantsik Teyta Dios kushikïpaq rurashqankunata>>.
12Tsëmi espantakur kikinpura parlayarqan: <<¿Imataq pasakun?>> nir.
13Wakinnam asipar niyarqan: <<Këkunaqa machashqam këkäyan>>.
Pedro willakunqan
14Tsënö parlayaptinmi apóstol mayinkunawan sharkur Pedro kënö nirqan: <<Jerusalénchö y jinantinchö täraq Israel nunakuna, shumaq wiyayämë. 15Manam yarpäyashqëkinötsu machashqa këkäyä. Qoya las nuëvillaqa manam pipis machantsu. 16Kanan rikëkäyashqëki pasananpaqmi profëta Joel willakur nirqan:
17<< <Teyta Diosmi kënö nin:
Ushanan junaqkunachömi Espïritüta kachamushaq llapan nunakunaman.
Tsëmi ollqu tsurikikuna y warmi tsurikikunapis willakïnïta willakuyanqa.
Jövinkunapis revelaciontam rikäyanqa.
Awkinkunatapis suëñïninkunachömi musyatsishaq.
18Tsë junaqkunam sirwimaqnïkunaman ollqumanpis y warmimanpis Espïritüta kachamuptï willakïnïta willakuyanqa.
19Imëpis mana rikäyashqëkikunatam ciëluchöpis y kë patsachöpis rikakätsimushaq.
Yawartapis, ninatapis y qoyëtapis rikäyankim.
20Intipis tutapärinqam.
Killapis yawarmanmi tikranqa.
Tsëkuna kanqa juzganä junaq manaraq chämuptinmi.
Tsë junaqqa mantsakäkïpaqmi kanqa.
21Tsënö kaptinpis noqata mañakamaq kaqtaqa pïmëtapis salvashaqmi>.#Joel 2.28-32.
22<<Israel nunakuna, shumaq wiyayämë. Musyayashqëkinöpis Nazaretpita Jesústam Teyta Dios yanaparqan mana rikashqantsik milagrukunata noqantsik kaqchö rurananpaq. 23Tsënö këkaptinpis qamkunam Jesústa prësu tsarïkur Diosta mana cäsukuq nunakunaman qoykuyarqunki crucifiquëpa wanutsiyänanpaq.#Luc. 23.33; Juan 19.18. Tsënö kananpaq kashqantaqa unëpita patsam Teyta Dios nirqan.#Luc. 24.26. 24Wanuratsiyaptinpis pamparashqanllachö ushakänanta mana munarmi Teyta Dios kawaritsimushqa.#Mat. 28.5-6; Mar. 16.6; Luc. 24.5.
25<<Davidpis Jesucristupaq kënömi qellqarqan:
<< <Teyta Diostam imë hörapis yarparëkä.
Allawka lädüchö karmi imëpis yanapëkäman.
26Tsëmi shonqüpis alläpa kushikun.
Shimïpis pëtam alaban.
Pëman markäkurmi imëpis yamëlla kawakü.
27Wanushqakuna pamparäyashqanchöqa manam jaqiramankitsu.
Santu sirwiqniki kaptïmi sepultürachö ayä ismunantapis munankitsu.
28Munashqëkinö kawanäpaqmi alli nänipa pushamanki.
Nöpëkichöqa imëpis kushishqallam kawakü>.#Sal. 16.8-11.
29<<Wawqikuna, musyantsikmi David wanushqanta. Mëchö pamparëkashqantapis musyantsikmi. 30Profëta karmi David musyarqan castanpita [Cristo] yurinanpaq kashqanta. Tsënöllam musyarqan pënö rey kananpaq Teyta Dios jurar änishqanta.#2Sam. 7.12-13; Sal. 132.11. 31Tsëmi kikinpaq qellqananpa rantin tsë yuriq kaq nunapaq David qellqarqan. Pëqa salvamaqnintsik Cristum këkan. Cristo kawarimushqanta rikaqnömi David qellqarqan pamparashqanchö Teyta Dios mana jaqirinanpaq kashqanta y ayan mana ismunanpaq kashqantapis.
32<<Kananqa David qellqashqannöllam Jesústa Teyta Dios kawaritsimushqa. Kawarimushqanta llapäkunam rikäyarqü. 33Pëtam Teyta Dios allawka kaq lädunman tëkatsir änikushqan Espíritu Santuta qoykushqa. Jesucristunam Espíritu Santuta noqakunaman kachamushqa. Tsëtam kanan wiyëkäyanki y rikëkäyanki.
34<<Davidqa manam kawarimushqatsu ni ciëluman ëwashqatsu. Tsëmi kikinpaq qellqananpa rantin jukpaq qellqar nirqan: <Mandamaqnïtam Teyta Dios kënö nirqan: <<Allawka kaq lädüman täkamï 35llapan chikishuqnikikunata munënikiman churamushqäyaq>> >.#Sal. 110.1.
36<<Israel nunakuna, niyashqaqta shumaq käyikuyë. Qamkuna Jesústa cruzchö wanutsishqa kayaptikipis Teyta Diosmi pëta churashqa Señornintsik y salvamaqnintsik Cristo kananpaq>>.
37Tsëta wiyëkurmi nunakuna alläpa llakikur Pedruta y wakin apostolkunatapis tapur niyarqan: <<Wawqikuna, ¿imatataq rurayäman?>> nir.
38Pedrunam nirqan: <<Teyta Dios perdonayäshunëkipaq jutsa rurëta jaqirir Jesucristupa shutinchö bautizakuyë. Tsënöpam Teyta Dios qarayäshushqëki Espíritu Santuta chaskiyanki. 39Teyta Diosnintsik änikushqan Espíritu Santuqa qamkunapaq, tsurikikunapaq y jinantinchö llapan qayashqan nunakunapaqmi këkan>>.
40Tsënö nirmi Pedro mas käyitsir nirqan: <<¡Jutsasapa nunakunanö castigashqa kayänëkipaq kashqanpita salvakuyë!>>
41Pedro nishqanta chaskikuqkuna kima waranqanömi (3,000) kayarqan. Bautizakurmi markäkuqkunaman yapakäyarqan. 42Pëkunam imëpis ëllukäyaq apostolkuna yachatsiyashqankunata yachakuyänanpaq, kallpatsanakuyänanpaq, Santa Cënata mikuyänanpaq y Teyta Diosta mañakuyänanpaqpis.
Markäkuqkuna yanapanakur kawayanqan
43Apostolkuna milagrukunata rurayashqanta rikarmi llapan markäkuqkuna mantsakäyarqan. 44Imëpis ëllukarmi imëkankunatapis rakinakur yanapanakuyaq.#Hech. 4.32-35. 45Tsënöllam chakrankunata y imëkankunatapis rantikur wanayashqanmannö tsë qellëta rakinakuyaq. 46Waran waranmi templupa patiunman ëllukäyaq. Tsënöllam wayinkunachö ëllukar tantata pakinakur kushishqa juntu mikuyaq. Mëqanpis manam quejatsinakuyaqtsu. 47Pëkunaqa imëpis Teyta Diostam alabayaq. Llapan nunakunam pëkunata respetayaq. Wakintapis Señornintsik salvaptinmi waran waran yapakärëkäyaq.
Currently Selected:
Hechos 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.