2 Tesalonicenses 3
3
Teyta Diosta mañakuyänanpaq käyitsinqan
1Wawqikuna y panikuna, Teyta Diospa alli willakïninta mëtsëmanpis chätsiyänäpaq mañakuyë. Tsënöpam qamkunata willapäyaptiq kushir chaskiyashqëkinölla wakinkunapis kushikur chaskiyanqa. 2Jina mana alli nunakunapita tsapëkayämänanpaq Teyta Diosta mañakuyë. Musyayanqëkinöpis manam llapan nunakunatsu Jesucristuman markäkuyan.
3Qamkunataqa Teyta Diosmi imëpis yanapëkäyäshunki pëman markäkuyänëkipaq y jutsaman Satanás mana ishkitsiyäshunëkipaq. 4Teyta Dios tsënö yanapayäshuptikim musyayä yachatsiyashqaqta imëpis cäsukuyänëkipaq kashqanta.
5Teyta Dios yanapëkuyäshï pë kuyakuq kashqannö qamkunapis kuyakuq kayänëkipaq. Jina yanapëkuyäshï imata jiparpis Jesucristunö pacienciakur kawakuyänëkipaq.
Wawqikunata y panikunata uryakuyänanpaq käyitsinqan
6Wawqikuna y panikuna, Señornintsik Jesucristupa shutinchömi qamkunata niyaq yachatsikushqäta mana cäsukuq qela wawqikunapita y panikunapita witikuyänëkipaq. 7Musyayankim noqakunata rikäyämashqëkinö qamkunapis kawayänëkipaq kashqanta. Qamkunachö këkar manam imëpis jitaräkuyarqütsu. 8Qarëllaqa manam pipa imantapis mikuyarqütsu, tsëpa rantinmi mana afanayänaqpaq paqaspapis y junaqpapis uryayarqü.#Hech. 18.3; 1Tes. 2.9. 9Apóstol kar yanapayämänëkipaq derëchükuna këkaptinpis manam mañakuyarquqtsu, sinöqa uryayarqü qamkunapis rikäyämar yachakuyänëkipaqmi.
10Qamkunachö këkarpis yachatsiyarqaqnam pipis uryëta mana munaptinqa pachan mana qarayänëkipaq. 11Tsënö yachëkätsiyaptiqpis ¿imanirtaq wakin wawqikuna y panikuna mana uryakushpa nuna imanöpis kawakushqanta rikapar purikäyan? 12Señornintsik Jesucristupa shutinchömi tsënö kawaq wawqikunata y panikunata nï: Wayin wayin purikuyänanpa rantin mikuyänanpaq uryakuyätsun.
13Wawqikuna y panikuna, qamkunaqa mana ajayashpa allikunallata imëpis rurayë.#Gál. 6.9. 14Kë cartachö qellqamushqäta mëqanpis mana wiyakuyaptinqa pëkunawan ama juntakuyëtsu. Tsënöpa itsa penqakur käyikuyanqa. 15Imanö kaptinpis ama chikiyëtsu, tsëpa rantin wawqikitanö o panikitanö shumaq käyitsiyë.
Cartapa ushanan
16Ima pasayäshuptikipis alli kawëta qomaqnintsik Teyta Dios yanapëkuyäshï shumaq kawayänëkipaq. Teyta Dios qamkunawan këkätsun. 17Kë cartata nishqänölla juk qellqapämashqa kaptinpis ushanantaqa kikï Pablum qellqamü. Llapan cartakushqäkunachöpis ushanantaqa kikïmi qellqä. 18Señornintsik Jesucristo ankupäyäshurniki imëpis yanapëkulläyäshï. [Tsënö katsun.]
Currently Selected:
2 Tesalonicenses 3: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.