2 Corintios 2
2
1Nöpata qamkuna kaqman shamur llakitsiyashqaqnö yapë llakitsiyënikita manam munätsu. 2Qamkunata llakitsiyaptiqqa ¿pïllanaraq kushitsimanqa? 3Tsëmi shamunäpa rantin cartallata cartakamurqü. Manam munarqütsu shamuptï llakitsiyämänëkita, sinöqa llapantsikpis kushikunantsiktam munarqü. Musyarqämi qamkuna kushikuyaptiki noqakunapis kushikuyänäpaq kashqanta.
4Tsë cartata qellqamur sientikushqa këkäyashqëkita yarparmi alläpa llakikur waqarqä. Manam llakikuyänëkipaqtsu cartakamurqä, sinöqa qamkunata alläpa kuyayashqaqta musyayänëkipaqmi.
Contran nunata Pablo perdonanqan
5Conträ nunaqa manam noqallatatsu llakitsimashqa, sinöqa qamkunatapis llakitsiyäshurqunkim. 6Tsë nunata willapäyashqëki allim këkan. 7Alläpa mana llakikunanpaq perdonar kallpatsiyë. 8Tsëmi qamkunata rowayaq pëta kuyar alli rikäyänëkipaq.
9Tsë cartata qamkunaman cartakamurqä tsë nunata willapäyänëkipaqmi. Tsënöpam musyëta munarqä cäsuyämashqëkita o mana cäsuyämashqëkitapis. 10Tsë perdonayashqëki nunata noqapis perdonämi. Imallapis perdonanäpaq kaptinqa Jesucristupa nöpanchömi qamkuna rëkur pëta perdonarqü. 11Musyantsikmi Satanás imëkanöpapis nunakunata jutsaman ishkitsinanpaq kashqanta. Tsëmi tsë nunata perdonashqa piñatsinakïman Satanás jitamäshunnatsu.
Troaschö Pablo llakikunqan
12Troas markaman Jesucristupa alli willakïninta willakuq chäriptï manam ima tsapapis kashqatsu. 13Tsënö kaptinpis qamkuna kaqpita Tito mana yurimuptinmi alläpa llakikurqä. Tsëmi Troaschö quedanäpa rantin Tituta ashiq#2.13 Pabluwan tinkur Tito willapashqanta musyanëkipaq leyinki 2Cor. 7.6-15. Macedonia provinciaman ëwarqä.#Hech. 20.1.
Teyta Diosta Pablo payllä nikunqan
14¡Teyta Diostam payllä nikü! Pëmi Jesucristuchö kayaptï imëpis yanapayäman. Tsëmi willakuyaptï jinantinchöpis nunakunata käyitsin Jesucristuta chaskikur pëta reqiyänanpaq. 15Jesucristupa willakïninta willakuyashqäqa inciensupa alli pukutaqninnömi Teyta Diospaq këkan. Salvakuyänanpaq kaqkunaman y mana salvakuyänanpaq kaqkunamanpis chëkanmi. 16Mana salvakuqkunapaqqa melanëpaq asyaqnömi këkan. Tsënö kaptinpis salvakuqkunapaqqa kuyëllapaq pukutaqnömi këkan. Tsënö kaptinqa ¿piraq kikinllapita Jesucristupa willakïninta willakunman?
17Wakinkunaqa imatapis chaskiyänan rëkurllam Diospa willakïninta willakïkäyan. Noqakunaqa manam pëkunanötsu kayä, sinöqa Teyta Dios kachayämashqa kaptin y noqakunawan pë këkashqanta musyarmi Jesucristupa shutinchö llapan shonqükunawan willakuyä.
Currently Selected:
2 Corintios 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.