1 Timoteo 2
2
Teyta Diosta mañakunantsikpaq käyitsinqan
1Timoteo, wawqikunata y panikunata kallpatsë Teyta Diosta payllä nikur llapan nunakunapaq imëpis mañakuyänanpaq. 2Tsënölla Teyta Diosta mañakuyätsun reykunapaq y wakin autoridäkunapaqpis. Alli mandakuyänanpaq Teyta Dios yanapaptinmi noqantsikpis Teyta Dios munashqannö yamë kawakushun. 3Llapan nunakunapaq mañakurqa salvamaqnintsik Teyta Dios munashqannömi mañakïkantsik. 4Teyta Diosqa munan llapan nunakuna alli willakïninta chaskikur salvakuyänantam.
5Jukllëllam Teyta Dios.
Y jukllëllam Teyta Dioswan alli kawanantsikpaq amishtatsikuq nuna.
Tsë nunaqa Jesucristum.
6Pëmi wanushqa llapan nunakunata salvananpaq.
Tsënö salvakuq kashqantam höranchö Teyta Dios musyatsimarquntsik.#Mat. 20.28; Mar. 10.45; Gál. 1.4; Tito 2.14.
7Tsë alli willakïta mana Israel nunakunata willapar apostolnin kanäpaqmi Teyta Dios akramashqa. Tsëmi Jesucristuman markäkuyänanpaq nunakunata rasunpa kaqllata willapëkä.#2Tim. 1.11. Mana ulikushpam [Jesucristupa shutinchö] rasun kaqta nï.
8Noqa munä mëchö ëllukarpis mana rimanakushpa ni pitapis mana chikipashpa wawqikuna makinkunata pallarkur Teyta Diosta mañakuyänantam.
Warmikunapaq willapäkïkuna
9Warmikunapis shumaqllata yakakuyätsun. Ama penqakïpaq ratashkunataqa yakakuyätsuntsu. Ama yarpakachäyätsuntsu aqtsankunata tukïläyaman tikratsita ni qoriwanpis ni perlawanpis adornakïta. Alläpa chaniyuq ratashkunatapis ama yakakuyätsuntsu.#1Ped. 3.3. 10Tsëpa rantin Teyta Dios munashqannö kawaq warmikunanö allikunata rurar kawakuyätsun.
11Ëllukäyanqanchö yachatsikuyaptin upällalla warmikuna yachakuyätsun. 12Manam munätsu warmikuna nunakunata yachatsiyänanta ni mandayänanta. Tsëpa rantin upälla kakuyätsun. 13Tsënö niq Adánta kamarirninraq#Gén. 2.7. Evata Teyta Dios kamashqa kaptinmi.#Gén. 2.21-22. 14Jina manam Adántatsu Satanás engañarqan, sinöqa Evatam.#Gén. 3.1-6. Engañaptinmi jutsa rurëman ishkirqan.
15Tsënö kaptinpis warmikuna salvakuyanqa wawankunata shumaq wätarmi, Teyta Diosman alli markäkurmi, pïmëtapis kuyarmi, qollmi shonqu karmi y Teyta Dios munashqannö kawarmi.#Fil. 2.12.
Currently Selected:
1 Timoteo 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.