1 Juan 2
2
1Kuyë wamralläkuna, kë cartata qellqëkämü jutsata mana rurayänëkipaqmi.#Rom. 6.11-14. Sitsun jutsata rurëkuntsik, Teyta Diospa nöpanchömi noqantsikman qaqämunanpaq abogäduntsik këkan. Tsë abogäduqa alli ruraq Jesucristum. 2Pëmi sacrificiu kashqa jutsantsikkunata Teyta Dios perdonamänantsikpaq.#1Juan 4.10. Manam noqantsiklla perdonashqa kanantsikpaqtsu wanurqan, sinöqa jinantin munduchö nunakuna perdonashqa kayänanpaqmi.
3Teyta Diosta reqishqantsikta musyantsik mandamientunkunata cäsukurmi.#Juan 14.15, 21, 23. 4Mëqantsikpis <<Teyta Diosta reqïmi>> nikar mandamientunkunata mana cäsurqa manam rasun kaqtatsu parlantsik, sinöqa ulikïkantsikmi. 5Mandamientunkunata cäsurqa Teyta Diosta rasunpam kuyantsik. Tsënöpam musyantsik Teyta Diospa makinchö kashqantsikta. 6Pipis <<Teyta Diospa makinchömi kä>> nirqa Jesucristo kawashqannö kawatsun.
Mushuq mandamientu
7Kuyë wamralläkuna, jukniki juknikipis kuyanakuyanki. Kë mandamientu manam mushuq mandamientutsu, sinöqa unëpita patsa musyashqantsik mandamientum. Tsë mandamientutaqa musyayankinam. 8Mushuq mana kaptinpis kananqa musyayanki Jesucristo kuyamashqantsiknö kuyanakuyänëkipaq kashqantam. Tsëmi tsë mandamientu mushuq këkan. Jesucristo kuyakuq kashqannömi qamkunapis kuyanakïkäyanki. Tsënö kuyanakurmi paqaspita aktsiman yarquqnö këkäyanki.
9Pï nunapis <<aktsichömi këkä>> nikar nuna mayinta chikirqa paqaschönöllaran këkan. 10Tsënö kaptinpis nuna mayinta kuyarqa aktsichö këkaqnömi këkan.#Rom. 13.12-13. Tsënö kawaptinqa pëta rikarmi pïmëpis shumaq kawayanqa. 11Nuna mayinta chikiq kaqqa paqaschönömi këkan. Wisku nuna mëpa ëwashqantapis mana käyishqannömi Teyta Dios munashqannö kawananpaqpis käyintsu.
Imanir Juan cartakunqan
12Kuyë wamrakuna, qamkunamanmi cartakëkämü Jesucristo noqantsik rëkur wanushqanpita perdonashqa kayaptiki.
13Tëtakuna, qamkunamanmi cartakëkämü qallëkunanpita kawaq Jesucristuta reqishqa kayaptiki.
Jövinkuna, qamkunamanmi cartakëkämü Satanásta vencishqa kayaptiki.
14Kuyë wamrakuna, qamkunamanmi cartakëkämü Teyta Diosta reqishqa kayaptiki.
Tëtakuna, qamkunamanmi cartakëkämü qallëkunanpita patsa kawaq Jesucristuta reqishqa kayaptiki.
Jövinkuna, qamkunamanmi cartakëkämü kallpayuq kar Diospa willakïninta cäsukur Satanásta vencishqa kayaptiki.
Diosta mana cäsukuq nunakuna kawayanqannö mana kawanantsikpaq ninqan
15Diosta mana cäsukuq nunakunanöqa ama kawayëtsu. Pëkunanö kawarqa Teyta Diosta manam kuyayankitsu. 16Diosta mana cäsukuq nunakunaqa shonqunkuna munashqannömi llutanta rurayan, imatapis rikashqantam munapäyan y llapanpitapis mas alli rikashqa këtam munayan. Pëkunanö kawarqa manam Teyta Dios munashqannötsu kawayanki, sinöqa jutsasapa nunakunanömi. 17Kë patsapis y nunakuna munayashqanpis ushakanqam. Teyta Dios munashqannö kawaq nunakunaqa wiñë kawëtam tariyanqa.
Anticristukuna yuriyämunanpaq ninqan
18Kuyë wamralläkuna, ushanan junaqkunachönam këkantsik. Anticristo shamunanpaq kashqanta musyayashqëkinöpis atska anticristukunanam yuriyämushqa. Tsënöpam musyantsik ushanan junaqkunachöna këkashqantsikta. 19Tsë nunakunaqa nöpata noqantsikwan juntu kashqa karpis kananqa manam noqantsikman ëllukäyämunnatsu. Pëkunaqa manam Jesucristuta rasunpatsu chaskikuyashqa. Jesucristuta rasunpa chaskikushqa karqa noqantsikwanmi juntarëkäyanman karqan. Noqantsikpita yarqushqa kayaptinmi musyantsik Jesucristuta mana chaskikuyashqanta.
20Qamkunamanqa Jesucristum Espíritu Santuta kachamushqa. Tsëmi käyiyanki mëqan yachatsikïkuna alli kashqanta y mëqan mana alli kashqantapis.#1Cor. 2.10-16. 21Tsënömi käyiyanki tsë ulikuqkuna Teyta Diospa willakïninta yachatsikuyänanpa rantin llutanta yachatsikuyashqanta. Rasun kaq yachatsikïta käyiyashqëkita musyarmi cartakëkämü.
22Tsë ulikuqkunaqa <<Jesúsqa manam Teyta Dios kachamushqan Cristutsu>> nirmi llutanta yachatsikïkäyan. Tsënö yachatsikuqkunaqa anticristum këkäyan. Pëkunaqa Teyta Diostapis y Jesucristutapis negayanmi. 23Jesucristo Teyta Diospa Tsurin kashqanta pipis negarqa Teyta Diostapis neganmi. <<Jesucristuqa Diospa Tsurinmi>> nirqa Teyta Diostapis chaskinmi.
24Tsënö këkaptinqa Jesucristupa willakïninta yachakuyashqëkita ama qonqayëtsu. Mana qonqarqa Teyta Diospa y Tsurin Jesucristupa makinchömi kawëkäyanki. 25Pëmi änimarquntsik gloriachö wiñëpa kawanantsikpaq.
26Kë cartata cartakëkämü llutan yachatsikuqkunata mana chaskiyänëkipaqmi. 27Jesucristupita chaskiyashqëki Espíritu Santum qamkunawan këkan. Pëmi rasun kaqllata llapantapis käyikätsiyäshunki. Manam imëpis ulipäyäshunkitsu. Tsënö këkaptinqa llutan yachatsikïkunata ama chaskiyëtsu. Tsëpa rantinqa Espíritu Santu käyitsiyäshushqëkinölla Jesucristuman markäkur imëpis kawayë.
28Kuyë wamralläkuna, Jesucristupa makinchö imëpis kawakuyë. Tsënö kawarmi Jesucristo kutimuptin mana mantsakushpa y mana penqakushpa nöpanchö kayanki.
29Musyantsikmi Jesucristo imëpis allita ruraq kashqanta. Tsëmi pipis allita rurarqa Teyta Diospa wamran këkan.
Currently Selected:
1 Juan 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.