LELE I JEREMAIA 1
1
Na Tagi ni Vutugu i Jerusalemi
1Sa mai dabe lala toka na koro,
A sinai taumada tu ena tamata.
Sa vaka e dua na yada o koya,
Ka rogo tu ena veimatanitu.
A yaco me raluve ni veiyasana,
Na koro vakaturaga sa yaco me bobula.
2A sa tagi vakalevu ena bogi taucoko,
Sa drodrova na baluna na wai ni matana;
Ena kedra maliwa na nona daulomani
Sa sega e dua me vakacegui koya rawa;
Era sa liumuritaki koya na nona i tokani kece,
Ka yaco me ra nona meca tale.
3Ia o Juta sa kau vakabobula ena dela ni rarawa
Ka sa vakasaurarataki ena cakacaka vakaukauwa;
Sa bula tu oqo ena kedra maliwa na veimatanitu,
Ka sega ni kunea rawa na vanua ni vakacegu.
Era sa voliti koya na nona meca
Ka sa sega na vanua me ra dro bula kina.
4Sa tagi vakalevu na veisala ki Saioni,
Ni sa sega sara e lako mai ki na solevu;
Sa lala na nona veimatamata ni koro kece,
Ka ra sa vutugu o ira na bete;
Era sa rarawa na kena goneyalewa
Ka sa rarawa vakalevu sara o koya.
5O ira na nona meca sa gumatua ga vua,
Ka ra sa yaco me ra nona turaga,
Ni sa vakatara na Kalou me vakararawataki
Ena vuku ni nona i valavala ca;
Era sa lako tani yani na luvena,
Ka vakabobulataki e matadra na nona meca.
6Sa takali mai vua na goneyalewa ni Saioni na nona i ukuuku totoka kecega.
O ira na kena dauveiliutaki era sa vaka na dia
Era sa malumalumu mai ena viakana;
Sa sega na nodra kaukauwa
Ni ra sa dro tani mai ligadra na dauvakasasa.
7Sa nanuma ga o Jerusalemi,
Na siga ni nona vakararawataki kei na veilakoyaki,
Ka vakakina na veika totoka kece
Sa dau tu vua ena veisiga sa oti yani.
Ia oqo ni ra rawai na tamata mai na ligadra na meca,
Ka sa sega e dua me vukei koya,
Era sa vakalialiai koya ga na nona meca
Ka dredrevaka na nona sa vakarusai.
8Sa i valavala ca vakalevu sara o Jerusalemi,
A sa yaco me vakasewasewani;
O ira kece era daurokovi koya era sa beci koya,
Ni ra sa kunea na nona luvawale;
Sa vutugu vakalevu ga o koya,
Ka sa vunia na matana ena madua.
9A sa kunei rawarawa na nona dukadukali,
Ia sa sega ni kauwaitaka na nona veisiga ni mataka;
Na nona bale sobu sa ka rerevaki sara
Ni sa sega ni dua me vukei koya rawa.
“I Jiova, ni raica mada na noqu rarawa,
Ni ra sa gumatua vei au na kequ meca!
10Era sa dodoka yani na ligadra o ira na meca
Ka tara na veika vinaka sa tu vei au,
Era sa raici ira na veimatanitu
Ni ra sa kaba mai na nona tikina tabu.
Sa raici ira o koya ni ra sa curuma na Valenisoro,
Ena tikina vakatabui vei ira na kai matanitu tani.
11Era sa vutugu kecega na tamata
Ena nodra sa vakasaqaqara kedra;
Era sa volitaka na nodra i yau
Me i voli ni kakana me ra bula tiko kina.
Mo ni rai mai Jiova, ka raica
Na noqu vakaloloma levu.”
12Sa ka wale li vei kemuni sa lako voli yani?
Ni raica mada ka kila,
Se sa tiko e dua na rarawa
Sa vaka na noqu rarawa sa caka vei au
O koya sa kauta mai ko Jiova
Ena siga ni nona cudru kaukauwa.
13Sa vakauta mai lagi na bukawaqa;
Sa curuma sara na noqu sui e loma;
A sa corita na yavaqu ena lawa
Ka vakadavori au sobu ki na qele.
A sa qai biuti au tu yani
Ena bibi ni yalo kei na mosi.
14“A sa raica na noqu caka cala kece sara
Ka sa vesuvesuki ira vata;
A sa qai vauca ki na usouso ni domoqu,
Ka'u sa malumalumu ena ruku ni i colacola;
Sa soli au ko Jiova ki na ligadra na meca
O ira ka'u sa sega ni vorata rawa.
15Na Turaga sa vakanadakui ira
Na noqu mataivalu kecega sa voliti au;
Sa kacivaka ga na gauna ni veisausaumi
Me vakarusai ira kina na noqu cauravou;
Sa butuqaqi ira na noqu tamata ko Jiova
Me vaka na qerepi ena kena i qaqi.
16Ia ka'u sa tagi ena vuku ni ka oqo;
Sa drodro vakayauyau na wai ni mataqu;
Ni sa yawa mai vei au na dauveivakacegui,
O koya me vakayaloqaqataki au tale;
Era sa biu wale tu ga na luvequ
Ni sa gumatua vei ira na kedra meca.
17Sa dodoka mai na ligana o Saioni,
Ia sa sega e dua me vakacegui koya;
Sa veivakaroti ko Jiova ena vuku i Jekope
Ni ra na nona meca tale o ira sa tiko voliti koya;
Sa yaco ga o Jerusalemi
Me dua na ka vakasisila vei ira.
18Sa dodonu tikoga ko Jiova,
Ni'u sa vuki tani oi au mai na nona vosa;
Ia mo ni rogoca na tamata kecega,
Ni raica mada na noqu veika rarawa;
O ira na noqu goneyalewa kei na cauravou
Era sa kau vakabobula.
19Au a kacivi ira na noqu daulomani,
Ia era sa vakaisini au ga;
O ira na noqu bete kei ira na noqu qase
Era sa rusa ena loma ni koro
Ni ra sa vakasaqaqara kakana voli
Me ra vakaukauwataki ira kina.
20Ni rai mai, Jiova, ni'u sa rarawa bibi
Ka sa mosi vakalevu sara na yaloqu!
Sa vorovorolaki na utoqu mai loma
Ena vuku ni noqu i valavala ca.
Sa yaco na veivakamatei ena salatu;
Sa yaco vakakina ena loma ni tikotiko.
21Era sa rogoca na noqu tagi ni vutugu;
Sa sega ga e dua me vakacegui au.
Era sa rogoca na noqu leqa o ira na meca;
Era sa marautaka na nomuni sa vakaleqai au.
Mo ni vakayacora na siga o ni sa lokuca,
Ka me ra rarawa vakai au na kequ meca.
22“Ni cudruvi ira ena vuku ni nodra cala;
Ni totogitaki ira me vaka na noqu totogitaki.
Au sa tagi ga ena levu ni rarawa
Ka'u sa tauvimate e vu-ni-yaloqu.”
Currently Selected:
LELE I JEREMAIA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.