JEREMAIA 1
1
O Jeremaia
1Oqo na vosa i Jiova ka a yaco vei Jeremaia na luve i Ilikaia, e dua vei ira na bete mai Anacoci ena vanua o Penijamini. 2E a yaco taumada vei Jeremaia na vosa ena i katini katolu ni yabaki vakatui i Josaia na luve i Emoni na tui Juta. 3E a vosa tale vei Jiova ena gauna e a tui kina o Jioiakimi na luve i Josaia. Ni oti o ya, e a vosa tale vakavuqa vua me yacova na nodra a kau tani yani vakabobula na lewe i Jerusalemi ena i kalima ni vula ena i katini kadua ni yabaki vakatui i Setekaia na luve i Josaia.
Na Kacivi nei Jeremaia
4A sa kaya vei au ko Jiova, 5Ni bera ni'u buli iko ena kete i tinamu au sa digitaki iko, ni o se bera ni sucu mai au sa vakatabui iko; ka digitaki iko mo parofita ki na veimatanitu.”
6Au a qai kaya, “Isa Jiova na noqu Turaga, au sa sega ni gusu matata, ka ni'u sa rui gone.” 7Ia sa kaya ga vei au ko Jiova, “Kakua ni tukuna ni o sa rui gone, ia mo lako ga vei ira na tamata au sa talai iko kina, ka tukuna vei ira na ka kecega au sa vakarota vei iko. 8Kakua sara ni rerevaki ira, baleta ni'u na tiko kei iko me'u taqomaki iko,” a kaya ko Jiova.
9A qai dodoka mai na ligana ko Jiova, ka tara na tebe ni gusuqu, ka kaya vei au, “Raica, au sa tauca na noqu vosa ena gusumu, 10Au sa solia vei iko edaidai na kaukauwa mo lako ki na veivanua kei na veimatanitu, mo cavuraka, ka talaraka sobu, mo basuraka ka vakarusa mo tara cake ka tea.”
11A qai tarogi au ko Jiova, “Jeremaia, a cava o sa raica?”
Au mani sauma ka kaya, “E dua na taba ni amodi”
12A qai kaya vei au ko Jiova, “O sa donu vinaka! Au sa wanonova tiko me yaco dina sara na noqu vosa.”
13A qai taroga tale vei au ko Jiova, “A cava tale o sa raica?”
Au a qai sauma ka kaya, “Au sa raica e dua na kuro sa buebue mai na yasana ki cake vaka ki na vualiku, ka sa vakarau me tasova sobu mai ki na vanua oqo.”
14A sa kaya vei au, “Ena tekivu na veivakarusai mai na veivanua mai cake vaka ki na vualiku, ka na yacovi ira kece era tiko ena vanua oqo. 15Rogoca mada na noqu vosa. Au sa kacivi ira kece sara na tui ni veimatanitu mai cake vaka ki na vualiku. Era na lako mai ka tara na nodra i tikotiko vakatui ena matamata mai Jerusalemi me wavokita na kena bai, ena vaka talega kina na bai ni veikoro e Juta. 16Au na totogitaki ira ena vuku ni nodra ca, era sa vakanadakui au ka vakacabora na i soro boi vinaka ki na veikalou tani, ka ra lotu ki na veimatakau era cakava. 17Mo yaloqaqa; lako ka la'ki tukuna vei ira na veika kece sara au a vakarota vei iko mo tukuna. Mo kakua sara ni rerevaki ira de'u na qai vakarerei iko vakalevu cake e matadra. 18O na vaka e dua na koro vakabai kaukauwa, o na vaka e dua na duru kaukamea ka vaka talega na lalaga parasa ki na vanua taucoko oqo; vei ira na tui Juta, vei ira na kena bete kei ira na tamata kece sara ena vanua oqo. 19Era na sega ni vakadrukai iko rawa, ni'u sa tikoga kei iko, sa kaya ko Jiova. Au na vakabulai iko.”
Currently Selected:
JEREMAIA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.