JEMESA 1
1
1 #
Maciu 13.55; Mari 6.3; Caka 15.13; Kala 1.19 Mai vei Jemesa, na dauveiqaravi ni Kalou kei na Turaga ko Jisu Karisito:
Au sa veikidavaki yani vei kemuni na yavusa e tinikarua o ni dui veiseyaki tu e vuravura:
Na Vakabauta kei na Vuku
2Oi kemuni na wekaqu, ni okata ga me ka ni reki na nomuni sota kaya na veimataqali veivakatovolei e vuqa; 3ni o ni kila sa dau vakatubura na dauvosota na vakatovolei ni nomuni vakabauta. 4Ia me vakaoti vakavinaka na cakacaka ni dauvosota, mo ni matua ka vakataucokotaki sara kina, ka me kakua ni dua na ka me yali vei kemuni. 5Kevaka sa lailai na vuku vua e dua vei kemuni, me masulaka ga vua na Kalou, ni na soli ga vua; baleta ni sa dau lomasoli ka yalovinaka na Kalou ena soli-ka vei ira kecega na tamata. 6Ia me masu ga ena vakabauta ka me kakua sara ni qai vakatitiqa. O koya sa vakatitiqa sa vaka na ua ni wasawasa sa cagina ka veitubuyaki ena cagi. 7Ia me kakua ni nanuma na tamata o ya ni na rawata e dua na ka mai vua na Turaga; 8sa tamata lomalomarua o koya, ka sa sega ni tudei ena nona i valavala kece sara.
Na Dravudravua kei na Vutuniyau
9O ira na lotu Vakarisito era dravudravua e dodonu me ra reki ni sa laveti ira cake na Kalou, 10#Aisea 40.6,7 (LXX)kei koya na lotu Vakarisito sa vutuniyau e dodonu me marau ni sa vakayalomalumalumutaki koya na Kalou. Ni ra na takali yani me vaka na se ni co o ira na vutuniyau. 11Ni sa cabe na matanisiga sa lako vata cake kei na kena cagi katakata ka vakaraqosataka na co; sa mira na sena, ka sa seyavu na kena rairai vinaka. Ena takali talega vakakina na tamata vutuniyau ni sa ogataka voli ga na nona bisinisi.
Na Veivakatovolei kei na Veiveretaki
12Sa kalougata na tamata sa vosota ni sa vakatovolei tiko, ia ni sa vorata rawa na veivakatovolei, ena soli vua na bula, o ya na i covi ka sa yalataka oti na Kalou vei ira era lomani koya. 13Kevaka sa veretaki e dua mai na veivakatovolei eso, ia me kakua ni kaya vakaoqo, “Sa veretaki au na Kalou.” Ni sa sega ni veretaki rawa ena ca na Kalou, ka sega talega ni dau veiveretaki o koya. 14Ia sa dau veretaki ga na tamata yadua ni sa dreti koya vakaukauwa ka bacani koya na nona gagadre ca. 15Sa qai kunekune na gagadre ca ka vakasucuma na i valavala ca; ia na i valavala ca, ni sa oti vakadua na kena tubu tiko, sa vakasucuma na mate.
16Oi kemuni na wekaqu lomani, mo ni kakua sara ni vakacalai. 17Sa lako mai lomalagi na i loloma vinaka kei na i solisoli uasivi kecega; sa lako sobu mai vua na Kalou, o koya sa bulia na rarama vakalomalagi. Sa sega ni dauveivukiyaki o koya me vaka na kena dau veitosoyaki na i yaloyalo ni dua na ka. 18A sa vakatuburi keda mai o koya mai na vosa ni dina ka na nona lewa ga vakai koya oqo, me da yaco rawa kina me da i matai ni veika sa bulia o koya.
Na Vakarorogo kei na Vakayacora
19Kemuni na wekaqu lomani, mo ni nanuma vinaka sara oqo! Me dau totolo sara ena vakarorogo na tamata yadua, ka me berabera ga ni vosa, ka berabera ni cudru. 20Ni sa sega ni vakayacori rawa na i naki vinaka ni Kalou ena vuku ni cudru ni tamata. 21Ia mo ni biuta tani kina na i vakarau dukadukali kece sara kei na i tovo vakasisila kecega. Ni vakamalumalumutaki kemuni ga vua na Kalou ka ciqoma na vosa sa teivaka o koya ena lomamuni, ni sa rawa ni vakabulai kemuni.
22Ia mo ni muria na vosa ka kakua ni rogoca walega, ka vakaisini kemuni kina vakai kemuni. 23O koya vakayadua sa rogoca walega na vosa ka sa sega ni cakacakataka, sa tautauvata o koya kei na tamata sa ilovi koya ena iloilo ka sega ni raica e dua na veisau. 24Ni sa vakaraici koya vinaka ena iloilo ka lako yani, sa qai guilecava vakasauri na kena i rairai. 25Ia o ira era sa vakararai matua ki na lawa uasivi sa dauveisereki, era sa tudei tikoga kina ka ra sega ni rogoca walega ka qai guilecava tale, ia era sa vakayacora ga — era na vakalougatataki mai vua na Kalou ena veika era na vakayacora.
26Kevaka sa nanuma e dua na tamata ni sa lotu, ka qai sega ni vakatulewataka rawa na yamena, sa ka walega na nona lotu, ka sa vakaisini koya ga vakai koya. 27Ia oqo na veika sa raica na Kalou o Tamada ni dusia na lotu dina ka savasava: me ra kauwaitaki ka qaravi o ira na luveniyali kei ira na yada ena nodra rarawa, ka me qarauni vinaka na bula yadua me kakua ni vakadukadukalitaki ena veika vakavuravura.
Currently Selected:
JEMESA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.