AISEA 1
1
1 #
2Tui 15.1-7; 2Vei 26.1-23;
2Tui 15.32-38; 2Vei 27.1-9;
2Tui 16.1-20; 2Vei 28.1-27;
2Tui 18.1—20.21; 2Vei 29.1—32.33 Na i vola oqo sa koto kina na i tukutuku baleti Juta kei Jerusalemi e a vakaraitaka na Kalou vei Aisea na luve i Emosi ena gauna e ratou a tui kina e Juta o Usaia, o Jocame, o Easi kei Esekaia.
Era sa Ca Vakalevu na Juta
2Ni rogoca na vuravura kei lomalagi;
ni sa vosa vakaoqo ko Jiova:
Au a susugi ira na gone ka tuberi ira,
ia era sa qai saqati au.
3Na bulumakau sa kila na kena i taukei,
ka sa kila na asa na bai ni nona turaga.
Ia o ira na Isireli sa sega ni kila,
ka ra sega ni tugana rawa e lomadra na noqu tamata.
4O sa matanitu i valavala ca,
ka matatamata sa bikai ena i valavala ca.
O ni sa luve ni daucaka ca,
na gone daumuria na sala duka,
o ira sa biuti Jiova,
o ira sa beca na Le dua Yalosavasava ni Isireli,
o ira sa vakanadakui koya.
5A cava na vuna o ni via laumoku tale kina?
A cava o ni vakadrecike tikoga kina?
Sa robota kece na ulumu na mavoa,
ka sa tauvi mate na yalomu kei na nomu vakasama.
6Mai na qeteqete ni yavamu me yaco sara ki ulumu,
sa sega ni dua na tikimu me vinaka;
Sa robo ena drakusi, ena bo kei na mavoa bula;
Ka sa sega ni bau sava se vadretitaki.
Sa sega talega ni biu kina na wainimate.
7Sa lala na nomuni vanua,
ka kama yavu na nomuni veikoro.
Era sa taura na nomuni vanua na kemuni meca,
ka sa yaco oqo ena matamuni;
ka sa lala, me vaka sa vakarusai vei ira na vulagi.
8Sa qai vo taudua ga na goneyalewa o Jerusalemi,
me vaka na vale vakacevaceva ena loga ni vaini;
Me vaka na vakatunuloa ena loga ni kiukaba,
me vaka na koro sa vesuki.
9 #
Vteki 19.24; Roma 9.29 Kevaka e a sega ni vakavoca ko Jiova
e vica vei keda me bula,
ke da a vakataki Sotoma
se vakataki Komora.
10Ni rogoca na vosa i Jiova,
oi kemudou na i liuliu mai Sotoma!
Dou vakarorogo ki na i vakavuvuli ni Kalou,
oi kemudou na kai Komora!
11 #
Emo 5.21,22 Sa kaya ko Jiova, “A cava na kena yaga vei au na nomuni i soro e vuqa;”
Sa rauti au vinaka na veisoro kama,
na sipi kei na uro ni nomuni manumanu maroroi;
Ka'u sa sega ni taleitaka na dra ni bulumakau,
kei na sipi, se na me tagane.
12O cei sa kerea vei kemuni
mo ni kauta mai vei au na veika oqo
ena nomuni lako mai mo ni mai qaravi au?
O cei sa tukuna vei kemuni
mo ni mai butubutu wavoki na noqu lomanibai?
13Sa sega ni yaga mo ni kauta mai na nomuni i soro,
ni ka'u sa vakasisilataka na nomuni madrali boi vinaka.
Au sa sega ni vosota rawa na nomuni solevu ni vulavou,
na nomuni Siga ni Vakacecegu kei na nomuni veisoqoni vakalotu.
Era sa vakacacani kece ena nomuni i valavala ca.
14Au sa cata na nomuni solevu ni vulavou
kei na nomuni veisolevu tabu.
Era sai colacola ga vei au
ka'u sa oca na colata.
15Ni o ni laveta cake na ligamuni ena masu,
au na sega ni rai yani vei kemuni.
E veitalia sara na levu ni nomuni masu,
au na sega ga ni via rogoca,
baleta ni sa duka tu na ligamuni ena dra.
16Ni vui kemuni mo ni savasava;
Ni tarova na veika ca o ni cakava tiko,
na kena ka'u raica ni o ni se cakava tikoga.
Io, ni muduka sara na nomuni i tovo ca,
17ka vulica mo ni daucaka vinaka;
Ni vakasaqara na cakacaka vakadodonu,
ka vukei ira era tabaki sobu;
Solia vei ira na luveniyali na nodra dodonu,
ka taqomaki ira na yada.
18A sa kaya ko Jiova,
“Ni lako mai me da mai walia vata oqo.
E dina ga ni sa takavi kemuni na damu ni valavala ca,
au na savai kemuni mo ni savasava me vaka na uca vulavula.
Kevaka sa damudamu sara,
o ni na qai vaka ga na vuti ni sipi vulavula.
19Kevaka ga o ni sa lomasoli ka talairawarawa,
o ni na kania na vuata vinaka ni vanua.
20Ia kevaka o ni bese ka veisaqasaqa,
o ni na mate ena i seleiwau;
ni sa kaya vakaoqo ko Jiova.
Na Koro i Valavala Ca
21Sa yaco vakacava
me dautagane na koro yalodina?
Ena dua na gauna era a tiko kina na yalododonu,
ia oqo, era sa tiko ga kina na daulaba.
22Na nomuni siliva sa yaco me tikitiki ni kaukamea tawayaga,
Kei na memuni waini sa vakawaicalataki ena wai.
23O ira na nomuni turaga era sa dautalaidredre,
ka ra nodra i tokani na daubutako.
Era sa dau taleitaka me soli vei ira na i loloma,
ka taura na ka era saumi kina me ra cakava na ka ca.
Era sa sega ni taqomaki ira na luve ni yali,
ka sega ni via rogoca na ka e baleti ira na yada.
24O koya oqo sa kaya kina ko Jiova ni lewevuqa, na Kalou qaqa ni Isireli:
“Au na sauma na noqu cudru vei ira na kequ meca,
ka cudruvi ira era sa cati au.
25Ia au na dodoka yani na ligaqu vei kemuni,
me'u vuya laivi na nomuni dukadukali,
ka savata tani kece na nomuni valavala ca.
26Au na qai solia tale vei kemuni eso na i liuliu,
kei na so na daunivakasala me vaka e liu.
Sa na qai vakatokai tale o Jerusalemi
me koro savasava ka yalodina.”
27Ena vakabulai o Saioni ena lewa dodonu,
kei ira era veivutuni kina ena i tovo savasava.
28Era na vakarusai na dautalaidredre kei ira era saqati koya,
ka vaqeavutaki o ira era sa vakanadakui Jiova.
29O ni na qai maduataka na vuni oki o ni sa dau qarava,
kei na veiteitei tabu#1.29 veiteitei tabu: Era vakabauta na tamata ni kena cabori na i teitei vua na kalou ni vuavuai (fertility god) ena vakavuna me vakalougatataka kina na nodra vuata. o ni sa teivaka.
30O ni na qai vaka na vuni oki sa malai,
kei na i teitei sa sega ni vakasuasuataki.
31Ia me vaka na kena kama na kau mamaca ena dua na lidi ni buka,
ena rusa vakakina na tamata kaukauwa ena nona i valavala ca,
ka na sega ni dua me na tarova rawa na veivakarusai.
Currently Selected:
AISEA 1: FNV
Highlight
Share
Copy
Want to have your highlights saved across all your devices? Sign up or sign in
Fijian New Version Bible, Revised Edition © Bible Society of the South Pacific, 2017, 2021.