1 Makabe 1
1
Alekisada na Qaqa
1O Alekisada na kai Masetonia, luve i Filipe, sa biuta mai na vanua o Kitimi, samuti Dario na Tui Peresia kei Mitia, qai sosomitaki koya me tui. (Sa Tui Kirisi rawa tu). 2A levu na nona ivalu, levu na koronivalu a vakavua, a vakamatei ira na tui ni vuravura. 3A yaco i na iyalayala kei vuravura, vakalala e levu na matanitu. Sa galu e matana o vuravura, sa vakacerecerei, mani dokadoka sara kina. 4A soqona e dua na mataivalu kaukaua sara, a liutaki ira na veimatanitu, vanua, kei na tui, ra mani cava vua.
5Sa qai tauvimate, sa vakila ni sa malumalumu. 6Sa mani kacivi iratou na nona turaganivalu dokai eratou a susu vata mai, me vota rawa vei iratou nona matanitu ni se bula tiko. 7A yabaki tinikarua nona veiliutaki, qai mate. 8Eratou sa qai veiliutaki nona turaganivalu e na nodratou dui vanua. 9Eratou dui vakaisalataki iratou vakatui ni sa mate, vakina o ira na dui luvedratou me vica vata na yabaki; era vakatubu ca vakalevu e vuravura.
O Adioko Epifane kei ira na Jiu duidui ile
10 #
2M 4.7
E dua na nodra kawa valavalaca o Adioko Epifane, luve i Adioko na tui; asa tauri vakavesu tu mai Roma. Sa tekivu nona veiliutaki e na yabaki 137 ni matanitu vaKirisi [175 BSK]. 11E levu na tamata basulawa mai Isireli e na gauna ya, era vakacalai ira e lewe levu e na nodra kaya, “Meda lai veiyalayalati mada kei ira na kaitani era wavokiti keda tu, nida sa mai kalouca vakalevu nida sa tawase mai vei ira.” 12E donu vei ira na ile qo, 13era mani gumatua e so mera cabe vua na tui. A vakadonuya o koya mera rokova na nodra lawa na kaitani. 14Era mani tara e dua na valeniqito levu e Jerusalemi me vaka na ivalavala ni kaitani, 15#1Tui 7.18era kauta laivi na we ni cili, ra vakanadakuya na veiyalayalati tabu. Era tovata kei ira na kaitani, era sa sorova na valavalaca.
Valuti Ijipita o Adioko
16Sa raica o Adioko ni sa dei na nona matanitu, sa lomana me Tui Ijipita me sa nona ruarua na matanitu o Ijipita kei Siria. 17Sa mani kabati Ijipita na nona mataivalu kaukaua, wili kina na qiqi ni ivalu, na elefadi, na ose kei na matamanua levu. 18Erau veivala kei Tolemi na Tui Ijipita, mani dro e matana o Tolemi, era le levu na vuetaki kei na mate. 19Era vakavua na koronivalu kece e Ijipita, e yauta o koya na iyau ni vanua.
Vakararawataki ira na Jiu o Adioko
20Ni sa rawa o Ijipita, sa qai suka tale o Adioko e na yabaki 143 [169 BSK]. A curubotei Isireli nona mataivalu kaukaua qai kabati Jerusalemi. 21A curuma vakaviavialevu na loqi tabu, kovea mai kina na yaletare koula, na itutu ni cina kei na kena iyaya kece. 22A kovea tale ga na teveli ni madrai ni Turaga, na bilo ni vakacabo, na boulu, na iseso koula, na ilatilati, na isala vatu talei, kei na iukuuku koula ni mata ni valenisoro; a luvata kece. 23A kauta na siliva, na koula kei na disi sau levu; a kauta tale ga na iyau vuni a kunea. 24Sa yauta vakadua i nona vanua.
A levu nona laba kei na vosa viavialevu.
25Era bikai e na lolosi na veimataqali i Isireli,
26era vutugu na iliuliu kei ira na qase,
era gogo mai na cauravou kei na goneyalewa,
seyavu na kedra totoka na marama.
27Era lele na tagane vou,
na yalewa vou ra dabe e na lolosi e na loqi ni vakamau.
28Na vanua mada ga e uneune e na vukudra na lewena,
sa luvuci e na madua na kawa taucoko i Jekope.
29Oti yabaki rua, a tala yani na tui i na veikoro e Juta na iliuliu ni kumuni ivakacavacava, mani yaco sara i Jerusalemi kei na matasotia levu. 30A vosa vakamalua vakalawaki vei ira, ra mani vakabauti koya; vakasauri ga sa kabata na koro, samulaka, e levu na kai Isireli era mate kina. 31A yanaraka na koro, visa, talaraka na veivale kei na bainikoro. 32Era vakabobulataki ira na katikati, era yauta na bulumakau. 33Era qai viribaita na koro i Tevita e na bai kaukaua levu vakavaleniyadra kaukaua me nodra koro. 34Era lesia kina na ilala tamata valavalaca dau muri lomadra. Era vakaukauataka na koro; 35era vakumuni iyaragi kei na kakana, era soqona na itokinivalu i Jerusalemi me maroroi kina. Era sa meca levu ni koro.
36Sa yaco me meca ni loqi tabu,
na vunica e saqati Isireli tu ga.
37Era vakadave dra e na yasa kece ni loqi tabu,
era bau vakadukadukalitaka sara ga.
38Era dui se kina na lewe i Jerusalemi;
sa mai itikotiko ni vulagi,
era sa vulagiti koya na luvena, e
ra drovaki koya.
39Sa lala na loqi tabu me vaka na vanua dravuisiga;
na solevu sa vuki me lolosi;
sa beci na siga ni vakacecegu;
sa vuki na dokai me beci.
40Sa tubu na nona maduataki me vaka na nona sakitaki e liu;
sa vuki na vakacerecerei me lolosi.
41Sa qai volavola na tui vei ira kece na lewe ni nona matanitu mera dua ga na matatamata, 42mera dui biuta nodra itovo vakavanua. 43Era sa ciqoma kece na kaitani na lewa ni tui. E levu sara mada ga e Isireli era ciqoma e na reki nona lotu; era soro i na matakau, ra beca na siga ni vakacecegu. 44Sa qai tala mata i Jerusalemi kei na veikoro e Juta, mera sa muria na itovo tani, 45me tabu na isoro kama, na isoro wale kei na isoro gunu e loqi tabu, mera beca na siga ni vakacecegu kei na solevu, 46mera vakadukadukalitaka na loqi tabu kei ira na bete, 47mera tara yaletare, na lomanibai tabu, kei na sava ni qaravi matakau, mera vakacabo vuaka kei na manumanu tawasavasava, 48mera kua ni cili na luvedra, mera cakava na veika kece e duka e lolovira mera tawasavasava kina, 49mera qai vakanadakuya na lawa, ra veisautaka kece na ivakaro. 50“O koya e sega ni rokova na lewa ni tui, e na mate.”
51Qori na lewe ni ivola a vakau i na nona matanitu taucoko. A lesi ira na ovisa mera yadrava na vanua, vakaroti ira na veikoro kei Juta mera dui vakacabo isoro. 52E le levu era sa muri ira qo - o ira kece na vakanadakuya na lawa, era sa caka ca e na vanua. 53Era sa qai veidroyaki kina na kai Isireli mera dui vaqara nodra ivunivuni.
54 #
Tani 9.27; 11.31; 12.11; 1M 6.7; Maciu 24.15; Mari 13.14 E na ikatinikalima ni siga ni Jisilevi e na yabaki 145 [167 BSK], era tara e dua na ka torosobu sara e dela ni yaletare ni isoro kama. Era tara yaletare tale ga e na veikoro e volekati Jerusalemi. 55Era vakama mira e mata ni veivale kei na veigaunisala. 56Na ivola ni lawa era kunea, era dresulaka, ra vakama. 57Ke dua e kune ni tu vua na ivola ni veiyalayalati, se dau muria tiko na lawa, sa vakamatei e na lewa ni tui. 58E veivula era mokulaki na kai Isireli nira laurai e loma ni koro. 59E na ikaruasagavulukalima ni siga ni vula era vakacabo isoro e na yaletare e dela ni yaletare ni isoro kama. 60#2M 6.10E na lewa ni tui, era sa vakamatei na yalewa era lewa mera cilivi na luvedra, 61kei ira na wekadra kei ira era veicilivi; era vakaliligi na gone e domo i tinadra.
62la e levu na kai Isireli, era yalodei, ra lewa e lomadra mera kua ni kania na kakana tawasavasava. 63Era bolea na mate, mera kua ga ni vakadukadukalitaki e na kakana, se mera beca na veiyalayalati tabu; era mani mate dina kina. 64Sa qai cudruvi vakalevu o Isireli.
Currently Selected:
1 Makabe 1: FNVDC12
Highlight
Share
Copy
Want to have your highlights saved across all your devices? Sign up or sign in
Fijian New Version including Deuterocanonical Books © Bible Society of the South Pacific, 2012.