Joel 2
2
Jaton rawíbaon israelitabo chanpobaon akai keskáakin jato ramia
1Jerusalén mananmanxon trompeta xoon akanwe;
Ibon jakon manmanxon ja onsá yoii ikai onankanwe.
Judáin jaa jonibo jatikaxbi saki ikanwe,
Ibon jaton akábo yoixonti netera ochóma iki:
2ja netera kikin yamé, itan yamémataniribi iti iki,
ja netera nai koin jaax ota yamé iti iki.
Koshi itan ichabires sontarobora
nete xabáxon tenai keskati,
mananbotiibi jatíbiain janbiskana iti iki.
Neskara jawéki ikaira jawetianbi non oinnama iki,
jaskáribiakinra jawetianbi non ointima iki.
3Chiikan jatíbi keyoai keskáakinbora akanai;
winotamatianbi axon,
itan moa winota pekáobi axon akinra menoai.
Ja nokotamatianra, mai kikínbires jakon jain iká iki,
ja moa bokanketianra, jain jawebi xoxoyamai manan keská iti iki. ¡Jawebira jainoax kenekaayamai!
4Jawen jisára kabayobo keská iki,
kabáyonin boaibo ikai keskatira ishtokanai,
5mananbotiibi choronaitianra jawen riri ika,
janmeax reteananti carrobo ikai keskati riri ikai,
pei chosi menoa ikai keskatira tashki tashki ikai.
Koshi sontárobo reteananox joyota keskára ikanai.
6Jato oinnaxa jonibo saki ikai,
itan jatíbi jaton bemananra pasnákanai.
7Reteananai koshi shinanya jonibo keskara ishtokanai,
makan chikébaonra néekanai
jainoaxa pontébainkanai,
tsoabira wetsaori kayamai pontéres bain bokanai.
8Wetsabo betan tsakaananyamaira;
westíorabo jaton bainbiribi bokanai,
pia meranbires ikaxbira,
ja joyotax janbísyamakanai.
9Jaton jema bichinaxa
makan chiké maxkaten ishtokanai,
xobo pekatenbora nékanai,
ja yometso ikai keskatira xobo ventananbaonbi weíkanai.
10Jato bebonmeaxa mai ninwanai,
naira shakotai, bari betan oxera yametai
itan wishtinbora moa penéyamai.
11Jawen sontárobo bebon kakinra,
Ibon jawen tirin ikai joi jato ninkámai.
Jawen sontárobora kikínbires icha iki;
ja yoia senenhaibora tson topontimati iki.
¡Jonibo Ibon jato yoixonai netera, kikin jakonma itan onsá iti iki!
Tsonbira teneti atipanyamake.
Israelitabaon jaton shinan wetsaati Joelnin yoia
12Ibonra neskara yoia iki: “Jaskara ikenra rama Ibo Diossen onantiakin yoiai,
jatíbi maton shinanyaxonbi eabicho rabikanwe.
¡Ayunankanwe, saí ikanwe itan winikanwe!”
13¡Non Ibo Dioski yoiti ikanwe,
maton chopa waxatitianbi,
jatíbi maton shinanyanixbi jaki yoiti ikanwe!
Ibora, akonkin noimis itan onísamis iki,
jato jaweatima shinanyaresiki, ikira ikai.
14Jawe keska ixonra moa mato masá tenemayamakin,
icha jawéki mato meniti iki:
Icha berobo itan icha uva xeati
ja non Ibo Dios menitibo.
15¡Sión mananmanxon westíoratonin trompeta xoon awe!
Judá jonibo kenakanwe tsinkíxon ayunankanon;
16mato sacerdotebaon Diossen jonibo tsinkikanwe,
Dios bebon kerásma inox kikinni chokíkanon jato yoikanwe;
yosibo, bakebo itan xoma
akai bakeboribi jato tsínkikanwe.
¡Ja wanoa benábobira
ja wanoax jain ikainoax bokanti iki!
17Sacerdotebo, ja Ibon tee akaibo winikanwe,
xepóti itan jainxon yoina menoti jemaorixon yokákanwe:
“Min jonibaon ocha shinanxonyamawe Ibó;
min joniboki tsoabi shiromayamawe;
wetsa mainmeabaon jatoaresnaketian jato amayamawe.
‘¿Maton Dioski jawerano iki?’ ” Ikira, ja ikon Dios onananma jonibo inake.
Ibon jawen jonibo jakiribi jakonhati yoia
18Jatianra Ibon ja mainmea jawen jonibo noia jato onanmaa iki; jawen jonibo noibaxa,
19neskata iki:
Enbira mato yoiai; “Enra mato meniai trigo, uva xeati itan olivo xeni,
jatianra ja jawékiati jaketian mato raroshaman iti iki;
jaskáxonra ikon Dios onanma
jonibo en matoki shiromatima iki.
20Norteorikeax beai chanpobora
matoki nokómatima iki,
jain jawebi xoxoyamai mananmanra en potati iki.
Jatopari beaibora, jaweona aniparo ikainko
en jato jene retemati iki,
ja jato pekáo beaibora, Mediterraneoain en jene retemaa,
jaton yora payotax pisi poati iki.
¡Ani jawékibora en ati iki!” iki.
21Matobo, kikinbiresi rarokanwe itan rakéyamakanwe,
Ibonra ani jawékibo ati iki.
22Nii meranoa yoinabó, rakéyamakanwe,
xobi xoxoabora pei paxashamanbo iti iki,
jiwibora bimiti iki,
jatianra higo betan uva ichabires jati iki.
23¡Mato Jerusalénhain jaabo rarokanwe,
non Ibo Dioski rarokanwe!
Janra maxkáketian mato oi bemaxona iki,
moa akátiai keskáribiakinra
jénetia, itan nii peibo pechokoaitian
mato oi bemaxona iki.
24Icha trigora tsekakanti iki,
jatianra ichabires uva xeati itan olivo xeni jati iki.
25Ibonra yoia iki: “Ja kikin jakonmabires keyomis ichabires chanpo,
en matoki raanaton
baritiabo mato manómaara,
en mato banexonti iki.
26Potónon kaman jawékiaxonra,
ea Ibo Dios maton rabiti iki,
ani rateti jawékira en mato kopí aká iki.
Jawetianbira nokon jonibo moa rabinkantima iki,
27jatian mato israelitabaonra akonkin onanti iki,
ea Ibora mato betan iki,
itan ea riki maton Dios ixon, jaskara ikaxa wetsabo yamake.
¡Jawetianbira mato nokon jonibo, moa rabintima iki!
Diossen Shinan joai yoia
28Jaskara jawékibo winota pekáora,
jatíbi jonibo nokon Shinan en jato meniti iki:
maton benbo bakebo itan maton ainbo bakebora,
nokon janenko yoyo ikanti iki,
yosibaonra namáti iki,
bakeranonbaonra namá meran
akai keskáakin nekebi jawékibo oinkanti iki.
29Yonokaatai jonibo, itan yonokaatai ainbobokiribira,
nokon Shinan en manhati iki;
30ani rateti jawékibo naikan ikaibora en jato oinmati iki,
itan jimi, chii tiritai, chii koin kextóra nato main iti iki.
31Bari yaméketianra,
oxe jimi keská iti iki,
Ibon nete nokotamatianra jaskara iti iki,
ani nete itan onsára iti iki”.
32Ikaxbi jatíbi ja Ibo rabiaibora,
mawáinoax xabakaati iki,
jaskara ikaxa Sión mananman, Jerusalénhain jakanti iki,
jaskara ati Ibon yoia keskára iti iki.
Jan katotabora mawayamai jati iki.
Currently Selected:
Joel 2: shp
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.