Filipenses 2
2
Wakin kaqkunata ali rikanansipaq yäsishqan
1Jesucristupa makincho kar alimi kawaykansi. Pay kuyamashqami kushish kawaykansi. Espíritu Santupis noqansiwanmi imaypis kaykan. Tayta Diosmi tantiyaykäsimansi wamayänakur#2.1 Wakin runakunaqa ali rikanakur niyan. y kuyanakur kawanansipaq. 2Sayno kaykaptinqa say yarpayla kayashpayki juk shonqula imaypis kuyanakur kawayay. Sayno kuyanakuyashqaykita musyarmi kushikushaq.
3Runa mayikiwan ama chikinakuyaysu ni yachaq tukuyaysu, sinöqa pïmaytapis aliman churar respëtuwan rikayay. 4Kikilaykikuna ali kawayänaykipaq yarpachakuyänaykipa trukanqa wakinkunapis ali kawayänanpaq yarpachakuyay. 5Jesucristo kawashqanno qamkunapis kawayay.
6Payqa Dios kaykarpis#Juan 1.1-3; Col. 1.15. manami jana pasalachösu täkurqan.
7Munayyuq kayninta kacharirmi ashmaynöla kananpaq noqansino yurirqan.
8Runa karnami Tayta Dios munashqanta rurashpan cruzcho wanurqan.#Mat. 26.39; Juan 10.18; Heb. 5.8.
9Saymi Tayta Dios payta churash lapanpitapis mas munayyuq kananpaq.
Paytami jutita churaparqan lapanpitapis mas munayyuq kaqta.#Heb. 2.9; 12.2.
10Saymi jana pasacho kaqkuna, kay pasacho kaqkuna y infiernucho kaqkunapis Jesucristuman qonqurpakuyanqa.
11Saychömi pïmaypis niyanqa Jesucristo Señorninsi kashqanta.
Sayno nirmi Tayta Diosta lapanpis alabayanqa.#Isa. 45.23.
Tayta Dios munashqanno kawanansipaq nishqan
12Kuyay wawqi panikuna, sayno kaykaptinqa qamkunawan kaykaptï cäsukayämashqaykinöla karucho kaptïpis cäsukayämay. Salvashna kayashqayki musyakänanpaqqa Tayta Diosta mansapakur lapan shonquykikunawan pay munashqanno kawayay. 13Pay munashqanno kawayänaykipaq kikinmi shakyäsiyäshunki y poderta qoyäshunki.
14Mana jamuränakuypa y mana rimanakuylapa imaypis kawayay. 15Sayno kawayaptikiqa Diospa wamran kayashqaykita tantiyakur manami pipis washaykita rimanqasu. Saymi mana cäsukuqkunapa markancho tarpis#Deut. 32.5. sakaypa aksi asikyashqanno kayanki.
16Salvakunansipaq kaq wilakuyta imaypis cäsukuyay. Saynöpami Jesucristo kutimuptin wilakuyninta alipaq wilapashqäpita seqaypa kushikushaq.
17Sayno kaptinmi wanusiyämänan kaptinpis kushikü. Wanusiyämaptinqa sacrificiu jananman vïnuta winayashqannömi kashaq. Tayta Diosta mana ajayaypa sirviyashqaykipis sacrificiuno kaptin qamkunapis kushikuyay. 18Noqa kushikushqänöla qamkunapis kushikuyay.
Timoteuta Filipusman Pablo kachananpaq nishqan
19Señor Jesucristo kamakäsiptinqa Timoteutami#Hech. 16.1-3. kachamushaq. Kutimur imano kaykäyashqaykitapis wilapämaptin kushikushaqmi. 20Manami pipis kansu Timoteunöqa. Paylami qamkunapaq noqano yarpachakun. 21Wakinkunaqa Jesucristo munashqanta rurayänanpa trukan kikinkuna yarpäyashlantami rurayan.
22Qamkuna musyayankimi Tayta Dios munashqanno Timoteo kawashqanta. Payqa imayka surïnömi Jesucristupa ali wilakuyninta wilakunäpaq yanapaykäman. 23Saymi prësu kashqäpita yarqamunäpaq o mana yarqamunäpaq kashqantapis musyaykurna payta kachamushaq. 24Yarqamunäpaq Tayta Dios kamakäsiptinqa noqapis watukakuq shamushaqmi.
Filipusman Epafrodituta kachananpaq kashqanta wilashqan
25Wawqinsi Epafroditutapis qamkuna kaqman kachamushaqmi. Alipaqmi payta kachaykayälämushkanki. Tayta Diospa soldädunno kashpanmi imano nakarpis yanapämash. 26Qeshyaptin lakikuyashqaykita musyarmi qamkuna kaqman kutimuyta munaykan. 27Rasunpaypapis pasaypa ansami qeshyash. Wanukunanpaqna kaykaptinmi Tayta Dios kuyapashpan aliyäsish. Saynöpami aläpa mana lakikunäpaq noqatapis Tayta Dios kuyapämash.
28Saymi paywan tinkur kushikuyänaykipaq jukla kachamushaq. Payta rikar kushikuyaptiki noqapis mananami lakikushaqnasu. 29Pay chämuptin Señor Jesucristupa jutincho kushish chaskikuykuyälay. Payno yanapäkuqkunataqa lapantapis ali chaskikuykuyälay. 30Jesucristuta sirvir qamkunapa trukayki yanapaykämashqanchömi cäsi vïdanta oqrash.
Currently Selected:
Filipenses 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.