Juan 8
8
Runan qanrataq warmita Jesús perdonashqan
1Jesúsnami Olivos lömaman aywakurqan. 2Saypita waraynin tuta templu patiuman kutiptinmi lapan runakuna juntapäyarqan. Saycho Jesús jamaykur yachaykäsiptinmi 3ley yachasiqkunawan fariseukuna juk warmita apayarqan. Say warmita tariyarqan runanta qanrataykaqtami. Runakunapa nawpanman ichiykasirmi 4Jesústa tapur niyarqan: <<Rabí, kay warmita tariyashkä runanta qanratar juk runawan kaykaqtami. 5Moisés qelqashqancho nimansi kayno warmikunataqa samqaypa wanusinansipaqmi.#Lev. 20.10; Deut. 22.22-24. Qam ¿ima ninkitaq?>>
6Jesústa sayno tapuyarqan lutanta parlasir acusayänanpaqmi.#8.6 Roma autoridäkunaqa manami munayarqansu Israel runakuna pitapis wanusiyänanta. Saymi: <<Moisés qelqashqancho nishqanno samqashun>> niptinqa Jesústa prësu sariyanman karqan. <<Ama samqashunsu>> niptinpis ley yachasiqkunawan fariseukuna: <<¿Imanirtaq Moisés qelqashqanta cäsunkisu?>> niyanman karqan. Sayta musyarmi Jesús unchukuykur dëdunwan alpacho qelqarqan. 7Yaparir yaparir tapuyaptinnami ichirkur Jesús nirqan: <<Mayqaykipis jusaynaq karqa kay warmita samqar qalaykuy>>.
8Sayno nirkurmi yapay unchuykur alpacho qelqarqan.
9Sayno nishqanta wiyaykurmi#8.9 Wakin qepa kaq griego copiakunachöqa jusayuq kayashqanta tantiyakuyashpan nirmi yapayash. awkinkunapita qalaykur lapanpis juk jukla yarqur aywakuyarqan. Aywakuyaptinnami say warmilana Jesúspa nawpancho quëdaskirqan. 10Saymi ichirkur say warmita Jesús nirqan: <<¿Maytaq apamushuqnikikuna? ¿Manaku ni juklaylapis samqayäshushkanki?>>
11Warminami nirqan: <<Manami mayqanpis samqayämashsu, taytay>>.
Saymi Jesús nirqan: <<Noqapis manami munäsu samqash kanaykita. Kananqa wayikipana aywakuy. Isanqa amana jusalikunkinasu>>.]
Pïmaypaqpis Jesús aksi kashqan
12Saypitanami runakunata Jesús nirqan: <<Noqami kay pasacho aksi kaykä.#8.12 Aksi kashqanta nirqa runakunata salvaq kashqanta y Dios munashqanno kawananpaq tantiyasiq kashqantami Jesús nirqan.#Sal. 27.1; 119.105; Prov. 6.23; Isa. 49.6; Juan 9.5. Saymi nishqäta wiyakuqkuna sakaycho kawayänanpa trukanqa kawasikuq aksichöna kawayanqa>>.
13Sayno niptinmi fariseukuna niyarqan: <<Sayno kashqaykita kikikipa jamuylaykipitami nikanki. Saymi nishqaykita criyiyäsu>>.#Juan 5.31.
14Jesúsnami nirqan: <<Kikiläpita niptïpis nishqäkuna rasun kaqmi kaykan. Noqa musyämi maypita shamushqäta y mayman aywanäpaq kashqantapis. Qamkunaqa sayta manami musyayankisu. 15Qamkunaqa yarpaylaykikunapitami mana ali runa kashqäta nikäyanki. Noqa manami qamkunanösu pipaqpis parlä. 16Kachamaqnï Taytä noqawan imaypis kaptinmi pipis ali o mana ali kashqanta nirqa rasun kaqlata nikä. 17Leynikikunachöpis nikan: <Ishkay testïgukuna saylata niyaptinraqmi rasun kaq kashqanta musyansi>.#Deut. 19.15. 18Say nishqannölami kachamaqnï Taytä juk testïgu y jukaq testïgunami noqa kaykä>>.
19Sayno niptinmi tapuyarqan: <<¿Maychötaq taytayki kaykan?>>
Saymi Jesús nirqan: <<Qamkuna manami musyayankisu Taytä pï kashqantapis ni noqa pï kashqätapis. Pï kashqätapis musyarqa Taytä pï kashqantapis musyayankimanmi>>.
20Jesús sayno nirqan templu patiucho ofrendata shuntakuna kaqcho yachasirmi. Saycho yachasiptinpis höran manaraq kaptinmi pipis prësu sariyarqansu.
Jana pasapita kashqanta Jesús nishqan
21Saypitanami Jesús nirqan: <<Aywakushaqnami. Aywakuptï ashiyämashpaykipis manami tariyämankisu. Noqa aywashqä kaqmanqa manami aywayta kamäpakuyankipaqsu. Saypa trukanqa jusalaykikunachömi wanuyankipaq>>.
22Sayno niptinmi Israel runakuna niyarqan: <<¿Imanirtaq pay kashqan kaqman mana chänansipaq kashqanta nikämansi? ¿Wanusikuytasuraq yarpaykan?>>
23Saymi Jesús nirqan: <<Qamkunaqa kay pasacho yuriqlami kaykäyanki. Noqami isanqa jana pasapita shamushkä. 24<Noqami Kä>#8.24 Noqami Kä nirqa Jesucristo tantiyasirqan kikin Dios kashqantami. Saypita masta musyanaykipaq liyinki Éxo. 3.14; Juan 10.30-33. nikaptïpis mana criyimarqa jusaykikunachömi wanuyanki. Saymi nishkä jusaykikunalacho wanuyänaykipaq kashqanta>>.
25Sayno niptinmi tapuyarqan: <<¿Pitaq qam kanki?>>
Saymi Jesús nirqan: <<Nawpapita pasanami pï kashqätapis wilashkä. 26Jusaykikunata shimpinäpaq askaraqmi kaykan. Noqaqa kachamaqnï nimashlantami qamkunata wilapaykä. Pay nimashqankunaqa lapanpis rasun kaqlami kaykan>>.
27Jesús sayno parlaykaptinpis Tayta Diospita parlaykashqanta manami tantiyayarqansu. 28Saymi Jesús nirqan: <<Runapa Surinta joqarirraqmi#8.28 Runapa Surinta joqarinanpaq kashqanta nirqa kikinta cruzcho wanusinanpaq kashqantami nirqan. Saynöpis nirqan wanushqanpita kawarimuptin payta adorayänanpaq kashqantami. pï kashqätapis tantiyayanki. Sayraqmi tantiyayanki munashläta imatapis mana rurashqäta. Wilakurpis Taytä nimashqannölami wilakü. 29Kachamaqnï imaypis noqawanmi kaykan. Pay munashlanta imaypis ruraptï manami kikilätaqa kachaykamansu>>.
30Jesús sayno niptinmi payman askaq criyiyarqan.
Libri kanansipaq Jesús nishqan
31Saypitanami payman criyiq Israel runakunata Jesús nirqan: <<Yachasishqänöla kawarqa rasunpaypami discïpulükuna kayanki. 32Saymi rasunpaypa kaqta tantiyakuyashpayki librina kayanki>>.
33Sayno niptinmi niyarqan: <<¿Imanirtaq niyämanki librina kayänäpaq kashqanta? Noqakunaqa Abrahampita miraqkunami kaykäyä. Manami imaypis jukpa ashmayninsu kayashkä>>.#Mat. 3.9; Luc. 3.8.
34Saymi Jesús nirqan: <<Rasunpami nï: Pipis jusalikuylacho kawarqa jusalikuypa ashmayninmi kaykan. 35Ashmayqa manami patronpa surinsu, sinöqa ashmaylami. Patronpa surinmi isanqa papäninpa kaqta imatapis rurananpaq munayyuq kaykan. 36Saymi ashmay kayashqaykipita Tayta Diospa Surin jorquyäshuptiki rasunpaypa librina kayanki.#Gál. 5.1, 13.
37<<Musyämi Abrahampita miraq kayashqaykita. Abrahampita miraq kaykarpis nishqäkunata mana chaskikurmi wanusimayta munaykäyanki. 38Taytäpa nawpancho rikashqäkunatami wilapaykä. Qamkunapis taytayki yachasiyäshushqaykitami ruraykäyanki>>.
Diablupa wamran kayashqan
39Saymi niyarqan: <<Noqakunapa taytä Abrahammi kaykan>>.
Sayno niyaptinmi Jesús nirqan: <<Taytayki rasunpaypa Abraham kaptinqa pay kawashqannömi kawayankiman. 40Qamkunaqa Tayta Dios nimashqankunata wilapaptïmi wanusimayta munaykäyanki. Abraham manami imaypis yarparqansu Tayta Diospa wilakuqninta wanusiyta. 41Qamkunaqa taytayki rurashqannömi ruraykäyanki>>.
Sayno niptinmi niyarqan: <<Noqakunaqa manami wachapakuysu kaykäyä. Tayta Diosmi noqakunapa Taytäqa>>.
42Saymi Jesús nirqan: <<Tayta Dios rasunpaypa Taytayki kaptinqa noqata kuyayämankimanmi. Tayta Diospitami kay pasaman shamushkä. Manami kikïpa munayläpitasu shamushkä, sinöqa Taytämi kachamash. 43¿Imanirtaq nishqäkunata tantiyayämankisu? Nishqäkunata chaskikuyta mana munarmi sayno kaykäyanki.
44<<Qamkunapa taytaykiqa diablumi kaykan. Saymi pay munashlanta imatapis ruraykäyanki. Payqa unaypita pasa wanusikuqmi kaykan. Lula karmi imaypis rasun kaqta parlansu. Saymi pipis lulakurqa payno lulakuq kaykan. 45Rasun kaqta parlaptïpis manami criyiyämankisu.
46<<Jusalikush kaptïqa mä mayqaykipis jukla shimpiyämay. Rasun kaqta wilakuykaptïqa ¿imanirtaq criyiyämankisu? 47Tayta Diospa wamran karqa pay nishqanta wiyakuyankimanmi. Diospa wamran mana karmi wiyakuyankisu>>.
Abraham manaraq yuriptinpis Jesús kaykashqan
48Sayno niptinmi Israel runakuna niyarqan: <<¡Qamqa Samaria runakunanömi lutanta parlaykanki! ¡Qamcho supay imachir kaykan!>>
49Saymi Jesús nirqan: <<Noqachöqa manami ima supaypis kansu. Noqa manami Taytäta manakaqman churäsu. Qamkunami isanqa manakaqman churaykäyämanki. 50Noqaqa manami alabaküsu, saypa trukanqa lapan runakunata juzgaq Tayta Diosmi aliman churamanqa. 51Rasunpami nï: Nishqäkunata chaskikuqkunaqa manami imaypis wanuyanqasu>>.
52Saymi Israel runakuna niyarqan: <<Kananmi isanqa rasunpaypa musyayä qamcho supay kaykashqanta. Abrahampis y profëtakunapis lapanmi wanuyarqan. Sayno kaykaptinpis qam nikanki: <Nishqäkunata chaskikuqkunaqa manami imaypis wanuyanqasu>. 53¿Abrahampita mas munayyuqsuraq kaykanki? Abrahampis y profëtakunapis wanush kaykäyaptinqa ¿pï kashqaykitataq qamqa yarpanki?>>
54Saymi Jesús nirqan: <<Niyashqaykino alabakuptïqa parlashqäkunapis manakaqlapaqmi kanman. Taytämi noqataqa aliman churamanqa. Paytami qamkunapis <Diosnïmi> niyanki. 55Qamkuna manami payta reqiyankisu. Noqami isanqa reqï. <Manami reqïsu> nirqa qamkunanöpis lulami käman. Pay nishqankunata lapantami wiyakü. 56Unay aylluyki Abrahampis shamunäpaq kaqta musyarmi kushikurqan. Shamuqta rikamarmi fiyupa kushikurqan>>.
57Saymi Israel runakuna niyarqan: <<Qamqa manami pisqa chunka (50) watayuqlapis kankiraqsu. Sayno kaykarqa ¿imanöpataq Abrahamta reqinkiman karqan?>>
58Sayno niyaptinmi Jesús nirqan: <<Rasunpami nï: Abraham manaraq yuriptin Noqami Kä>>.#8.58 Noqami Kä nirqa Jesucristo tantiyasirqan kikin Dios kashqantami. Saypita masta musyanaykipaq liyinki Éxo. 3.14; Juan 10.30-33.
59Sayno niptinmi samqayänanpaq rumita aptakuyaptin Jesús pakakurqan. Saypitanami [runakunapa chawpinpa päsar] templupita aywakurqan.
Currently Selected:
Juan 8: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.