Gálatas 2
2
Jerusaléncho apostolkuna Pabluta chaskikuyashqan
1Saypita chunka chusku watataraqmi Tituta pushakurkur Bernabéwan#Hech. 11.29-30; 15.2. Jerusalénman yapay kutirqä. 2Sayman kutirqä Tayta Dios revelacioncho aywanäpaq tantiyasimash kaptinmi. Jerusaléncho kaq apostolkunawan kikiläkuna shuntakarmi mana Israel runakunata imata yachasishqätapis wilarqä. Lutanta yachasishqäta yarpäyaptinqa sayjinanpa nakar wilakushqäpis manakaqlapaqmi kanman karqan. 3Wilakushqäta tantiyasiptïmi ali kashqanta niyämarqan. Saynöpami mana Israel runa kashqanta musyarpis <<Tito señalakusun>> niyarqansu.
4Wilakushqä ali kashqanta niyaptinpis juk ishkay runakuna criyenti tukur Moisés qelqashqan leykunata cumpliyänanpaqmi wawqi panikunata yachasiyarqan. Sayno yachasiyaptinpis Jesucristuta chaskikushna kaykar manami say leykunata cumplinansipaqnasu kaykansi. Paykuna niyashqanta chaskikurqa manami libriraqsu kaykansi, sinöqa say leykunapa munaynincho kar ashmaynölami kaykansi. 5Saymi say lutan yachasikuyta chaskipäyarqäsu. Chaskipäyaptïqa Jesucristupa ali wilakuyninpita witikuyankimanmi karqan.
6Jerusaléncho kaq apostolkunaqa wilakuptï manami michäyämarqansu (Jesucristuwan juntu purish kayaptinpis Tayta Diospaqqa lapansipis iwalmi kansi),#Deut. 10.17. 7saypa trukanqa tantiyakuyarqan Israel runakunata wilapänanpaq Pedruta churashqanno mana Israel runakunata wilapänäpaq noqatapis Tayta Dios churamashqantami. 8Israel runakunapa apostolnin kananpaq Pedruta Tayta Dios churashqannömi mana Israel runakunapa apostolnin kanäpaq noqatapis churamash.
9Saymi Santiago, Pedro y Juanpis tantiyayarqan wilakuyninta wilakur purinäpaq Tayta Dios churamashqanta. (Paykunapaqqa iglesiacho columna kayashqantami niyan.) Saypitanami paykuna niyämarqan: <<Bernabéwan qam aywayay mana Israel runakunaman y noqakunana Israel runakunaman aywayäshaq>>.
Sayno nirkurmi makinta qoyämarqan. 10Saynöpis niyämarqan muchuq wawqi panikunata mana qonqaypa yanapäyänäpaqmi. Sayta imaypis ruraykämi.#Hech. 11.29-30; 24.17.
Pedruta Pablo olqutupashqan
11Saypita Antioquíaman Pedro chaykamur mana alita ruraptinmi olqutuparqä. 12Puntataqa mana Israel wawqi panikunawan shuntakaykurmi mikuq.#Hech. 11.2. Santiaguwan puriq runakuna chäyämuptinmi isanqa jamuräyänanta mansakushpan mana Israel wawqi panikunawan shuntakarqannasu. 13Pedruta rikakurmi wakin wawqi panikunapis y Bernabépis mana Israel wawqi panikunawan mikuyänanpaq shuntakäyarqannasu.
14Sayno rurashqan mana ali kaptinmi wawqi panikunapa nawpancho Pedruta olqutupar nirqä: <<Kikikipis mana Israel runano Moisés qelqashqan leykunata mana cumpliykarqa ¿imanirtaq munaykanki mana Israel runakuna say leykunataraq cumpliyänanta? 15Noqansi manami mana Israel runasu kansi, saypa trukanqa yurishqansipita pasa Israel runami. 16Musyansimi Tayta Dios imano perdonamashqansita. Manami Moisés qelqashqan leykunata cumplishsu perdonamansi,#Sal. 143.2; Rom. 3.20. saypa trukanqa Jesucristuman yärakushqami. Saymi Jesucristuman yärakuykansi Tayta Dios perdonamänansipaq.#Rom. 3.22. Say leykunaman yärakushqanpitaqa manami pitapis Tayta Dios salvansu>>.
17Moisés qelqashqan leykunaman yärakunansipa trukan Jesucristuman yärakushqami wakin runakuna yarpäyan jusalikushqansita. ¿Paykuna yarpäyashqannösuraq Jesucristo jusalikasimansi? ¡Manami! 18Saypa trukanqa jusayuq rikakunsi Moisés qelqashqan leykunaman yapay yärakurmi. 19Moisés qelqashqan leykunapa munaynincho karmi say leykunapaq wanush japuyna rikakurqä.#Rom. 7.4. Kananqa librinami kaykä#Gál. 3.19, 24. Tayta Dios munashqanno kawanäpaq. 20Noqaqa Jesucristuwan cruzcho wanushnömi kaykä.#Rom. 6.6-8; Gál. 5.24; 6.14; Col. 2.20. Manami noqanasu kawä, saypa trukanqa Jesucristumi noqacho kawan. Saymi Tayta Diospa Surinman yärakur kawaykä.#Fil. 1.21. Paymi kuyamashpansi noqansi rayku wanurqan.
21Manami manakaqmansu Tayta Dios kuyapämashqansita churaykä. Wakin runakuna niyashqanno leyninkunata cäsukushqaraq Tayta Dios salvamaptinsiqa Jesucristo wanushqanpis manakaqlapaqmi kanman karqan.
Currently Selected:
Gálatas 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.