Efesios 2
2
Kuyamashpansi Tayta Dios salvamashqansi
1Nawpataqa qamkuna jusalikur wanush japuymi kayarqayki.#2.1 Juk ishkay castellänu traduccionkunachöqa versïculu 5-pita jorqur kayno nirmi yapan: Sayno kayaptikipis kananqa mushuq kawaytami qoyäshurqayki. 2Wakin runakunanölami Tayta Diosta mana cäsukur Satanáspa makincho kawayarqayki. 3Saynölami lapansipis shonqunsi munashqanta rurar y mana alikunata yarpar kawakurqansi. Sayno kawashqansipitami wakin runakunatano Tayta Dios castigamänansipaq kaykarqan.#Col. 3.6.
4Sayno kaykashqapis Tayta Dios kuyapäkuq karmi seqaypa kuyamashkansi. 5Saymi jusalikur wanush japuy kaykashqapis Jesucristuta wanushqanpita kawarisimur noqansitapis wanushno kashqansipita kawarisimashkansi.#Col. 2.13. Kuyapäkuq kayninpami salvamashkansi. 6Jesucristuwan kawarisimashqansinömi gloriacho paywan jamasimashkansi. 7Sayno jamasimashkansi Jesucristucho kash seqaypa kuyapämashqansita shamuq watakunacho pïmaypis tantiyakunanpaqmi.
8-9Tayta Dios kuyapäkuq karmi Jesucristuman yärakush salvacionta qaramashkansi. Manami kikinsipitasu ni alita rurashqansipitasu salvacionta tarishkansi, sinöqa Tayta Diospitami. Saymi pipis alabakur ninqasu: <<Alikunata rurashqäpitami Tayta Dios salvamash>>. 10Jesucristucho kashqami alikunata rurar kawanansipaq mushuq kawayta Tayta Dios qomashkansi. Sayno kawanansipaqqa unaypita pasami destinamarqansi.
Israel runakunatapis mana Israel runakunatapis Jesucristo amistasishqan
11Nawpata imano kayashqaykitapis ama qonqäyaysu. Israel runakunaqa señalakush karmi señalaküni kayashqaykipita manakaqman churayäshurqayki. 12Jesucristupa wilakuynintapis manami musyayarqaykisu. Israel runapitapis jäpami kayarqayki. Tayta Dios promitishqanta chaskiyänaykipaq rurashqan pactukunapis manami qamkunapaqsu karqan. Kay pasacho Diosniynaq y oqrakashqami kawayarqayki.
13Tayta Diospita karucho kash karpis Jesucristucho karnami yawarninta jichashqanpita Tayta Diospa nawpanchöna kaykäyanki. 14Jesucristo sayno salvayäshushkanki ali kawayta qomaqninsi karmi.#Juan 14.27. Mana rikanakunanpaq saparaq tapiata juchusiqnömi Israel runa karpis mana Israel runa karpis juk ayllunöla kanansipaq shuntamashkansi. 15Sayno shuntamashkansi Israel runakunapa leyninkunata, mandamientukunata y reglamentukunata anularmi.#Rom. 10.4; Heb. 8.13. Jesucristucho mushuq runa kanansipaqmi Israel runakunatapis y mana Israel runakunatapis shuntamashkansi. 16Cruzcho wanurmi Tayta Dioswan amistasimashkansi mana chikinakur alina kawanansipaq.#Col. 1.20.
17Kay pasaman Jesucristo shamurmi Tayta Diospa makincho ali kawanansipaq kaq wilakuyta wilakurqan. Say wilakuyqa Tayta Diospita karucho kaykaq mana Israel runakunapaq y paypa nawpancho kaykaq Israel runakunapaqmi.#Isa. 57.19. 18Saymi Israel runa kashqapis mana Israel runa kashqapis Tayta Diosta imay hörapis manakunansipaq Jesucristo kayninpa Espíritu Santu yanapaykämansi.
Tayta Dios täkunan templu kashqansi
19Sayno kaptinmi mana Israel runakuna karpis jäpanasu kaykäyanki, sinöqa Tayta Diospa wamrankuna karmi lapan salvash kaqkunawan say ayllulana kaykäyanki.
20Ali cimientuyuq wayinömi kaykäyanki. Say wayipa cimientunqa apostolkuna y profëtakuna yachasiyashqanmi kaykan. Jesucristunami wayipa esquïnancho mas alinnin kaq rumi kaykan.#Isa. 28.16; Mat. 21.42.
21Jesucristuman yärakushqami rumita shumaq perqaqno noqansitapis churaykämansi Tayta Diospa sagrädu templun kanansipaq. 22Qamkunapis Jesucristuman yärakurmi templu perqaraykaq rumino kaykäyanki.#1Cor. 3.16-17; 1Ped. 2.4-5. Say templuchömi Tayta Diospa Espïritun taykan.
Currently Selected:
Efesios 2: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.