2 Timoteo 1
1
Carta qalaykunan
1Noqa Pablutami Jesucristupa apostolnin kanäpaq Tayta Dios churamash. Jesucristuta chaskikurmi Tayta Dios promitishqanno mana ushakaq kawayta tarishkä. 2Timoteo,#Hech. 16.1-3. kuyay surïno kaptikimi kay cartata cartakaykämü. Papäninsi Tayta Dios y Señorninsi Jesucristo kuyapäshushpayki ali kawanaykipaq yanapaykuläshunki.
Mana penqakuypa wilakunanpaq yäsishqan
3Unay ayllükuna sirviyashqan y noqapis sirvishqä Tayta Diosta manakurmi sakaypapis junaqpapis qampaq agradëcikü. 4Waqaykar quëdamushqaykita yarparmi kushikunansipaq kutimuyta munaykä.
5Noqa musyämi Tayta Diosman yärakur pay munashqanno kawashqaykita. Sayno kawaykanki awilayki Loida y mamayki Eunicipis Tayta Diosman yärakur kawayashqannömi. 6Sayno kawaykarqa mana mansariypa Tayta Diosta imaypis sirviy. Makïta umaykiman churaykur qampaq manakushqä hörami payta sirvinaykipaq Tayta Dios churashushkanki. 7Manami jaka shonqu kanansipaqsu Tayta Dios churamashkansi, saypa trukanqa mana mansariypa wilakunansipaq, pïmaytapis kuyanansipaq y shumaq tantiyakuykur imatapis ruranansipaqmi.
8Sayno kaykaptinqa mana penqakuypa Jesucristupa wilakuyninta wilakuy. Saynöpis ama penqakuysu ali wilakuyninta wilakushqäpita prësu wichqaräsiyämaptinpis. Imano nakarpis ali wilakuyninta wilakuy. Sayno wilakunaykipaqmi Tayta Dios yanapaykäshunki.
Tayta Dios salvamashqansita Pablo wilakushqan
9Tayta Diosmi salvamashpansi qayamashkansi pay munashqanno santu kanansipaq. Manami imatapis alita rurashqansipitasu salvamashkansi, saypa trukanqa jusayuq kashqapis kuyapämashpansimi salvamashkansi. Sayno kuyapämashkansi kay pasata manaraq kamar Jesucristuman churamashpansimi. 10Kuyapämashqansita musyasimashkansi salvamaqninsi Jesucristuta kay pasaman kachamurmi. Paymi wilakuynincho nishqanno wanuyta vinciskir mana ushakaq kawayta qomashkansi.
11Ali wilakuyninta [mana Israel runakunata] wilapänäpaq Tayta Dios churamaptinmi apostolnin kar yachaykäsï. 12Sayno wilakushqäpita carcilcho nakarpis Jesucristumanmi yärakuykä. Paymi shuntakamänan junaqyaq munayninwan yanapämanqa. Saymi carcilcho wichqararpis penqaküsu.
13Timoteo, Jesucristupa wilakuyninta yachasishqänöla qampis yachasiy. Jesucristo kuyashushqaykinöla payman yärakur pïmaywanpis kuyanakur kaway. 14Jesucristupa wilakuyninta pipis lutanta yachasiptinqa wawqi panikunata tantiyasiy mana chaskipäyänanpaq. Tantiyasinaykipaq Espíritu Santumi yanapäshunki. Paymi noqansiwan imaypis kaykan yanapämänansipaq.
Pabluta Onesíforo ali yanapashqan
15Musyashqaykinöpis Asia provinciacho taq wawqi panikuna lapanmi kachariykamar aywakuyash. Saynölami Figeluwan Hermógenespis aywakuyash.
16Onesíforuta y ayllunkunatapis Señor Jesucristo yanapaykuläsun. Carcilcho prësu kaykaptïpis mana penqakuypami imaypis yanapämash. 17Saynöpis Romaman chaykamur tarimashqanyaqmi ashimash. 18Musyashqaykinöpis Éfeso markacho shumaqmi yanapämashkansi. Runakunata juzganan junaq Señor Jesucristo payta kuyapaykuläsun.
Currently Selected:
2 Timoteo 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.