1 Timoteo 1
1
Carta qalaykunan
1Noqa Pablumi Jesucristupa apostolnin kaykä. Apostolnin kanäpaqmi salvakuq Tayta Dios y yärakushqansi Señor Jesucristo churamash. 2Timoteo,#Hech. 16.1-3. Jesucristuman yärakushpayki kuyay surïno kaptikimi kay cartata cartakaykämü. Papäninsi Tayta Dios y Señor Jesucristupis kuyapäshushpayki ali kawanaykipaq yanapaykuläshunki.
Lutan yachasikuqkunata michänanpaq yäsishqan
3Macedonia provinciaman aywarmi Éfeso markacho qamta kachaykamurqä lutan yachasikuqkunata michänaykipaq. 4Say lutan yachasikuqkunaqa yarpaylankunapita yachasirmi unay tiempu imanöpis kashqanta y unay ayllunkuna pï kayashqanta yachasiyan. Saykunata yachasiyaptinmi Tayta Diosman yärakuyänanpa trukan manakaqkunapita rimanakular kawaykäyan.
5Say lutan yachasikuqkunata michänaykipaq nikä wawqi panikuna rimanakuyänanpa trukan kuyanakuyänanpaqmi. Sayno kuyanakuyänanpaqqa mana jusalikuypa alilata rurar kawayäsun y lapan shonqunwan Tayta Diosman yärakuyäsun.
6Say lutan yachasikuqkunaqa kuyanakuyänanpa trukan manakaqkunapita rimanakularmi kawayan. 7Tayta Diospa leyninkunata selläma yachaq kayashqanta nirpis senqan maycho kashqantapis manami musyayansu.
8Musyansimi Tayta Dios munashqanno kawayänanpaq yachasishqaqa leyninkuna ali kashqanta. 9Manami jusaynaq runakunapaqsu leyninkunata Tayta Dios kamariparqan, sinöqa jusalikuqkunapaqmi. Saymi leyninkuna kaykan mana cäsukuqkunapaq, fiyu runakunapaq, jusasapakunapaq, Tayta Diosta manakaqman churaqkunapaq, mamanta y taytanta maqaqkunapaq y runa mayinta wanusiqkunapaq. 10Saynöpis kaykan majanta qanrataqkunapaq, olqupura kakuqkunapaq, warmipura kakuqkunapaq, runa mayinta rantikuqkunapaq, lulakuqkunapaq, manakaqta jitapar runa mayinpa contran sharkuqkunapaq y ali yachasikuyta mana cäsukur ima jusatapis jusalikuqkunapaqmi. 11Sayta nikan alabash Tayta Diospa ali wilakuyninchömi. Wilakuyninta wilakunäpaqmi Tayta Dios kachamash.
Pabluta Tayta Dios kuyapashqan
12Señorninsi Jesucristutami agradëcikü wilakuyninta wilakunäpaq yanapämashqanpita. Saynöpis agradëcikü yärakamashpan wilakuyninta wilakur purinäpaq churamashqanpitami. 13Nawpataqa Jesucristuta manakaqman churarmi payman yärakuqkunatapis ashi ashiykur carcilman wichqasirqä.#Hech. 8.3; 9.4-5. Mana musyaynïpa sayno rurash kaptïmi Tayta Dios kuyapämar perdonamash. 14Perdonamashpanmi tantiyasimash Jesucristuman yärakur pïmaytapis kuyapänäpaq.
15Jusasapa runakunata salvananpaqmi kay pasaman Jesucristo shamush. Rasun kaqta nikaptïqa pïmaypis criyiyäsun. Noqalätapis lapan runakunapita mas jusayuq kaykaptïmi 16kuyapämar salvamash. Sayno salvamarqan Jesucristo perdonakuq kashqanta wakin runakunapis tantiyakur payman yärakuyänanpaq y mana ushakaq kawayta tariyänanpaqmi. 17¡Tayta Diosmi imayyaqpis munayyuq rey, imayyaqpis kawaq y mana rikakaq kaykan! Pay japalanmi Dios kaykan. [Manami pipis payno yachaq kansu.] ¡Imayyaqpis alabash kaykuläsun! ¡Amén!
Jesucristupa wilakuyninta imaypis wilakunanpaq yäsishqan
18Kuyay Timoteo, Tayta Diospa jutincho wawqikuna niyäshushlaykitami noqapis qamta yäsï: Ali soldädu mana mansariypa pelyashqanno qampis mana mansariypa Jesucristupa wilakuyninta wilakuy. 19Sayno wilakushpayki Jesucristuman yärakur Tayta Dios munashqanno imaypis kaway.
Wakin runakunaqa Tayta Dios munashqanno manana kawarmi Jesucristuman yärakuyannasu. 20Saynölami Alejandruwan Himeneupis qepaman kutikuyash. Paykunatami Satanáspa makinman entregashkä. Saynöpa capazchir tantiyakur lutanta yachaykäsiyashqanta kacharir Jesucristuman yapay yärakuyanmanpis.
Currently Selected:
1 Timoteo 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.