1 Pedro 1
1
Carta qalaykunan
1Ponto, Galacia, Capadocia, Asia y Bitinia provinciakunacho kaykaq wawqi panikuna:
Noqa Pedro, Jesucristupa apostolnin karmi, kay pasacho qorpanöla kayaptiki kay cartata apaykäsimü. 2Tayta Dios unaypita pasa reqiyäshushpaykimi Espíritu Santuwan akrayäshushkanki Jesucristuta cäsukuyänaykipaq y yawarninta jichashqanpita perdonash kayänaykipaq. Tayta Dios kuyapäyäshushpayki ali kawayänaykipaq yanapaykuyäläshunki.
Tayta Diosman yärakur kushish kawanansipaq nishqan
3¡Señor Jesucristupa Papänin Tayta Diosta alabaykuläshun! Kuyapämashpansimi mushuq kawayta qomashkansi yapay yurishnöna kanansipaq.#Juan 3.3-7; 1Ped. 1.23. Jesucristo kawarimush kaptinmi musyansi noqansipis kawarirkamur gloriaman chänansipaq kashqanta. 4Gloriaman charnami Tayta Dios shuyaraykäsimashqansi herenciata chaskishun. Say herencia manami imaypis ushakanqasu, ismunqasu ni elaqanqasu. 5Tayta Diosman yärakuyaptikimi munayninwan yanapaykäyäshunki Jesucristo kutimuptin kamarishqan salvacionta chaskiyänaykipaq.
6Sayta musyarmi kay pasacho kayashqaykiyaq ima nakaycho karpis kushish kawaykäyanki. 7Qorita sulusirraq püru kashqanta musyashqansinömi qamkunapis nakaykunawanraq musyayanki Tayta Diosman rasunpaypa yärakuyashqaykita. Qoripitapis masmi yärakuynikikuna välin. Saymi imano nakarpis Tayta Diosman yärakuyaptikiqa Jesucristo kay pasaman kutimur alabayäshunki, ali rikayäshunki y aliman churayäshunki.
8Mana rikash karpis Jesucristuta kuyaykäyankimi.#Juan 20.29. Saymi payman yärakur seqaypa kushish kawaykäyanki. Sayno kushikuyashqaykita manami imanöpa tantiyasiytapis kamäpakuyankisu. 9Sayno kushikuykäyanki Jesucristuman yärakur salvacionta tariyashqaykipitami.
10Tayta Dios kuyakuq kayninwan salvamänansipaq kashqanta profëtankunapis shumaq tapukuykurmi wilakuyarqan. 11Sayno wilakuyänanpaqmi Jesucristupa Espïritun paykunata tantiyasirqan Cristo nakar wanunanpaq kashqanta y kawarirkamur lapanpaq munayyuq kananpaq kashqanta. Sayno tantiyasiptinmi profëtakuna musyayta munayarqan Cristo pï kashqanta y imay shamunanpaq kashqantapis. 12Profëtakunatami Espíritu Santu tantiyasirqan paykuna kawayashqan wisan shamunanpa trukanqa shamuq watakunachöraq shamunanpaq kashqanta.
Jesucristo shamushna kaptinmi kananqa jana pasapita shamuq Espíritu Santupa munayninwan Jesucristupa ali wilakuyninta wilakuykäyan. Jesucristo noqansi rayku wanur salvamashqansitami angilkunapis imanöpapis tantiyayta munaykäyan.
Mana jusalikuypa kawanansipaq tantiyasishqan
13Sayno kaykaptinqa shumaq tantiyakuyashpayki Tayta Dios munashqanno kawayay. Ama qonqäyaysu Jesucristo kutimur Tayta Diospa nawpanman shuntamänansipaq kashqanta.
14Tayta Diospa wamran kaykarqa payta cäsukur munashqanno kawayay. Jesucristuta manaraq chaskikur kawayashqaykinöqa ama kawayaysu. 15Saypa trukanqa akramaqninsi Tayta Dios santu kashqanno qamkunapis santu kayay. 16Tayta Diospa palabranchöpis kaynömi qelqaraykan: <<Noqa santumi kä. Qamkunapis santu kayay>>.#Lev. 11.44-45; 19.2.
17Pitapis mana jananpaypa juzgaq Tayta Diosta <<Papä>> nikarqa kay pasacho qorpanöla kawayashqaykiyaq payta mansapakur kawayay. 18Unay aylluykikuna kawayashqannömi qamkunapis jusalikur kawayarqayki. Sayno kaykäyaptiki manami qellaywansu ni qoriwansu Tayta Dios rantiyäshushkanki, 19sinöqa Jesucristupa seqaypa väliq yawarninwanmi. Sänu carnita sacrificiupaq pishtayaptin yawarninta jichashqannömi Jesucristupis noqansi rayku yawarninta jichash.
20Kay pasatapis manaraq kamar Tayta Dios destinash kaptinmi noqansi kawashqansi wisanraq Jesucristo kuyamashpansi shamush. 21Pay kayninpami Tayta Diosman yärakuykäyanki. Wanushqanpita kawarirkasimurmi gloriacho munayyuq kananpaq Tayta Dios shuntakush.
22Wilakuyninta#1.22 Wakin qepa kaq griego copiakunaqa Espïritupa yanapayninwan nirmi yapayan. cäsukuyaptikimi Tayta Dios purificayäshushkanki kuyanakur kawayänaykipaq. Sayno kaykaptinqa lapan shonquykikunawan jukniki juknikipis kuyanakur kawayay. 23Sayno kawayänaykipaqmi yapay yurishno kaykäyanki.#Juan 3.3-7; 1Ped. 1.3. Manami mamaykikunapitasu ni taytaykikunapitasu say kawayta chaskikuyashkanki, sinöqa Diospa palabranta chaskikuyashqaykipitami. Paypa palabranqa kawaq karmi imaypis ushakanqasu.
24<<Lapan runakunapis qewano ushakaqlami.
Munayyuq kayninpis waytano päsaqlami.
Qewapis sakinmi y waytapis shushunmi.
25Tayta Diospa palabranmi isanqa imayyaqpis kaykanqa>>.#Isa. 40.6-8.
Say palabratami Jesucristupa wilakuqninkuna wilapäyäshushkanki.
Currently Selected:
1 Pedro 1: qvhB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.