Marcos 1
1
Juan Oco Doquë Ayere Quëaye
(Mt 3.1-12; Lc 3.1-9, 15-17; Jn 1.19-28)
1De'o coca ñeje huëopi. Ñeje yo'opi, Ëjaë Jesucristo Maija'quë mamaquë. 2Maija'quëre quëacaiquë Isaíaspi Maija'quë quëaquëna, toyapi, ñeje:
“Yë'ëre quëacaiquëre du'ru jëjo saosi'i,
saija̱'a ma'a ne de'huacaija̱'quëre.
3Airopi i̱ yë'ose'e jutaja̱'coa.
Ne de'huajë̱'ë,
Mai Ëjaë daija̱'a ma'a, nui ma'a hui'yocaijë̱'ë.”
4Ja̱je pa'ina, Juan cue̱ne yejaja̱'a dai pa̱ire doquë daji'i. Ja̱je dai capi: Mësaru ja̱'rë cuasase'ere je̱oni po̱nëto oco doye pa'iji, mësaru co'aye yo'ose'e sa̱i de'huacaise'e pa'ija̱'core. 5Judea quë'ro pa̱i cui'ne Jerusalén daripë pa̱i si'aohua'i i̱ pa'i hue̱'ñana sani i̱ohua'i co'aye yo'ose'e oijë quëajëna, Juanpi Jordán tsiayana dopi.
6Juan ca̱ña cato camello nañapi nese'e paji'i. Cui'ne i̱ të̱i ca̱ cato ca̱'nipi nesico paji'i. I̱ a̱iñe cato pu̱'su cui'ne mejaë paya paji'i. 7Ñeje caquë pa̱ire quëaëña:
“Yë'ë jeteyo'je jerepa pa'ipi daiji. I̱ jo'yaë në meni zapato joyecaiquëje̱ pa'i yë'ë peoyë, ai teaye pa'i a'ë. 8Ocopi dohuë, mësarute. Jesuta'a Maija'quë joyore i̱sija̱'quë api.”
Jesure Doye
(Mt 3.13-17; Lc 3.21-22)
9Ja̱ mu'seña Jesupi Nazaret daripëpi de daquëña. Nazaret daripë cato Galilea quë'ro paji'i. Daquëna, Juanpi Jordán ñana dopi, Jesure. 10Do tëjina, Jesús tsiayapi tu̱maquëna, ma'tëmo ja̱ca sacona, ñaëña. Ñaquëna, Maija'quë joyo i̱re pana nëca mequëña, su'teje̱ pa'ipi. 11Nëca meina, ma'tëmopi yë'ose'e jutaëña:
“Më'ë yë'ë mamaquë a'ë. Më'ëre ai yëyë. Ai sihuaquë pa'iyë, më'ëre.”
Jesure Neñañe
(Mt 4.1-11; Lc 4.1-13)
12Ja̱ maca je̱'nërepa Maija'quë joyopi saëña, Jesure, yequë hue̱'ñana, pa̱i peo hue̱'ñana. 13Saëna, airo acohua'i quë'rona cuarenta mu'seña pa'ina, mënapi co'aye yo'oja̱quë caquë dani neñaëña. Mënapi ja̱je yo'o tëji maca hui̱ñaohua'ipi dani Jesure necateña.
Jesús Yo'o Huëoye, Galileana
(Mt 4.12-17; Lc 4.14-15)
14Juanre tsoe tse̱ani cosi maca Jesús jeteyo'je saji'i, Galileana, de'o cocare quëaquë Diusu te̱'te ayere. 15Ñeje caquë quëapi:
“Tsoe ti̱'api, Maija'quë cua̱ñe te̱'te. Ja'yere pa'iji. Mësaru ja̱'rë cuasase'e je̱oni yeque cuasayena po̱nëjë'ë. Huaso cocare asajë̱'ë.”
Hua'ire Yo'ecohua'ire Soiye
(Mt 4.18-22; Lc 5.1-11)
16Jesupi Galilea jaira të̱'tëpaja̱'a saina, Simón i̱ yo'jei Andrés co̱ni hua'i hua̱terë je̱o dëojëna, ñaëña, i̱ti hua'i yo'ecohua'i sëte. 17Ñani ja̱ohua'ire capi:
“Yë'ë ja̱'re daijë̱'ë. Yureta'a pa̱ire yo'ecohua'i pa'ija̱'cohua'ire nesi'i, yë'ëpi.”
18Ca tëjina, hua̱terë je̱oni sateña, i̱ ja̱'re.
19Satena, se̱ña maca saina, Zebedeo mamajëpi Jacobopi i̱ yo'jei Juanpi co̱ni yohuëre ñu'ijë hua̱terëre que̱'que do'sejëna, ñaëña. 20Ñani i̱ohua'ire soiña. Soina, ja̱ohua'ije̱ pëca ja'quëre je̱oni Jesús ja̱'re sateña, i̱ saina co̱caicohua'i ja̱'re co̱ni yohuëre pa'ina.
Co'a Joyore Hue'equë
(Lc 4.31-37)
21Je̱o saisicohua'ipi capernaum daripëna sa ti̱'ani, du'ru huajë mu'se Judea pa̱i tsi'si huë'ena cacarena, ye'yaëña, Jesupi. 22Ye'yaquëna, me nesiquëpi de'oyerepa ta̱'ñerepa ye'yaquë'ni, ja̱ë, cua̱ñequëje̱ pa'irepa ye'yaquë'ni. Maire ye'yacohua'i yo'oyeje̱ yo'oye pa̱ji, cuasareña. 23Cui'ne pa̱i tsi'si huë'ere huati quë'i paquëña.
24Pa'ipi caëña:
“¿Jesús Nazaret daripëpi daiquë me nesi'quë yëquëre yo'oquë'ni? ¿Yëquëre huasi'quë daiquë? Ti cua̱ñequërepa de'oquëni ñahuë, më'ëre.”
25Caquëna, Jesupi huatire caëña:
“Cama'ë pa'ijë̱'ë. Ja̱ëte je̱oni etajë̱'ë.”
26Caquëna, asani hue'hue dahuëje̱ pa'ye ju̱'iquëte yo'oni cuini etaëña, huati. 27Ja̱je yo'ouna, ñani si'aohua'i quëquë huesëni sa̱'ñe se̱teña:
“¿I̱que a'ni, iye? ¿I̱querepa huajë ye'yaye a'ni, iye? ¿Huatiohua'ire eto sao tuture paque paji. Ja̱je paquëni i̱ cua̱ñeñe sehuojë etayë?”
28Ja̱je Jesús yo'oyese'e esa Galilea yeja pa'icohua'i asa ti̱'areña.
Simón Pedro Huaore Jujuye
(Mt 8.14-15; Lc 4.38-39)
29Ye'ya tëjini pa̱i tsi'si huë'epi etani Simón cui'ne Andrés huë'ena cacaëña. Jacobo cui'ne Juan co̱ni cacareña, Jesús ja̱'re. 30Cacarena, Simón huao su̱ña dahuëre ju̱'io u̱ico pacoña. Pa'iona, i̱o ju̱'iñe quëareña, Jesure. 31Quëarena, asani dani i̱o jë̱tëna tse̱ani naë huëouña. Naë huëouna, su̱ña dahuë je̱ouña. Je̱ouna, huëni si'aohua'ire a̱oña.
Jai Pa̱ire Ne Co'yaye, Jesús Yo'oquëna
(Mt 8.16-17; Lc 4.40-41)
32Na'iquëna, ë̱së caje huesëquëna, ja̱ daripë si'a ju̱'icohua'ire cui'ne huati quë'iohua'ire Jesús quë'rona dareña. 33Si'a pa̱i ja̱ daripë acohua'i tsi'sireña, eta sa'ro quë'rona. 34Tsi'sirena, jai pa̱ire jujuquëna, co'yareña, si'aohua'i. Si'aye ju̱'iñe pa'itoje̱ de'oye jujuña. Cui'ne huati quë'iohua'i pa'ijëna, eto saouña, huatiohua'ire. Huatiohua'ipi tsoe Jesure ñareña. Jesupi huatiohua'i cayete ë̱sequë, cama'pë pa'ijë̱'ë, cani eto saouña.
Jesús Yëhuoye, Galilea Quë'rore
(Lc 4.42-44)
35Ja̱ yo'o tëjini pëani ca̱ni nea hue̱'ñarepa huëni saquëña, pa̱i peo hue̱'ñana Maija'quëni casi'i caquë. 36Ja̱ caquëna, Simón cui'ne yecohua'i co̱ni tuteña. 37Tuni ti̱'ani i̱te careña:
“Si'aohua'i më'ëni co'eyë.”
38Cajëna, Jesupi i̱ohua'ire caëña:
“Je darina sañu'u. Je darije̱ cui'ne Maija'quë coca quëasi'quë daë'ë.”
39Cani saquëña. Si'a hue̱'ña Galilea quë'roja̱'a sai si'a Judea tsi'si huë'ena cacani Maija'quë coca quëaroja̱quëña. Cui'ne huatiohua'ire eta saouña.
Jesús Jujucaiye, Ja̱'ju Dahuë Ju̱'iquëre
(Mt 8.1-4; Lc 5.12-16)
40Jesús pa'i hue̱'ñana te'i ju̱'iquëpi daquëña. Ja̱'ju dahuë ju̱'iñe hue'equëpi dani do're ja'runi oi se̱quëña:
“Më'ëpi yëni ne co'yajë̱'ë, yë'ëre.”
41Ju̱'iquëte oi ñaquë jë̱tëpi se patoquë caëña:
“Yëyë. Më'ëre jujusi'i.”
42Cani patoquëna, ti ju̱'iñe peoquëre pare ne co'yaëña, i̱te. 43Ne co'yani Jesupi yëhuouña, yë'ë ne co'yase'e quëama'ë pa'ijë:
44“Yecohua'ire quëama'ë pa'ijë̱'ë, coa Maija'quë huë'e ñacaicohua'i ëjaëse'ere i̱ñojë'ë, Moisés cua̱ñequë pa'ise'ere i̱siquë më'ë si'sire tsoa to̱siquë pa'iyere i̱ñoquë. Ja̱je yo'oquëna, yecohua'i ñajajë caëña. Cani jëjo saouña.”
45Ti jujusiquëpi etani sani Jesús yo'ose'ere si'a hue̱'ña quëaëña. Quëaëna, Jesupi pa̱i daripë̱a ti̱ñarepa cacaye peouña. Peoquëna, hue'sere pa̱i peo hue̱'ñare paquëña. Pa'iquëta'are pa̱ipi i̱ quë'rona si'a hue̱'ña acohua'ipi dateña.
Currently Selected:
Marcos 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.