Santiago 2
2
Si'a Yë'quë Maca Yo'oyere Ye'yaye
1Mësaru Maija'quë do'ijëpi mai de'o Ëjaëre pare Jesucristore sehuocohua'ipi pa̱ire sahuajë te'ohua'ise'ere de'oye yo'oma'pë pa'ijë̱'ë. 2-3Ja̱je pa'ina, yeque mësaru tsi'si sitona dati̱'ñe pa'i api, te'e jai do'i curi ju'i ca'huaro moñore ju'iquëpi, jai do'i ca̱ñare su̱ñasiquëpi daina, cui'ne yequëje̱ curi peoquë teaye pa'ije̱ ai ju'i ca̱re ju'i dati̱'ñe pa'i api. Daina, mësarupi cayë, du'ru daiquëre de'o ca̱ña ju'iquëre: “Da ja'rujë̱'ë, ico de'o ñu'i saihuëna.” Ja̱je cajëta'a yequëni co'amaña peoquëni teaye pa'ini cayë: “më'ë cato ja̱ macare nëcaquë ñajë'ë. Pa̱nita'a cayë peo yejana ja'runi ñu'i ñajë'ë.” 4Ja̱je yo'oni tsoe pa̱i yo'oyere ñaquë ca tëji ëjaëje̱ pa'i de'ohuë. De'oni co'aye cuasayepi sa̱'ñe mësaruja̱'a sahuajë yo'oyë.
5Yë'ë yëcohua'irepa Maija'quë do'ijë iyere asajë̱'ë: Maija'quëpi iye yeja co'amaña peocohua'ire sahuani i̱ tse̱cohua'ire nepi. Ja̱ohua'ipi jaiye co'amaña payeje̱ pa'ye Maija'quë pa'ire paji cuasayere pajë cui'ne i̱te oicohua'ire i̱sisi'i ca nëosi co'amañare paja̱jë caquë. 6Ja̱je pa'iquëta'are mësarupi co'amaña peocohua'ire teaye pa'iohua'ire co'aye yo'oyë. ¿Jaiye co'amaña pacohua'i pa'i ma'ñe mësaru ñato mësarute tea ju̱'iñeje yo'ojë pa̱i ëjaohua'i quë'rona quërë sacohua'i? 7Cui'ne ja̱ohua'ipi yëquë mësarute de'o hue'yosi mamirepa Jesure co'aye sa̱ñope cacohua'i a'ë.
8Mësarupi Maija'quë coca cua̱ñese'eje̱ pa'ye më'ë quë̱no maca pa'iquëre oijë̱'ë, më'ëja'a co'ye oiyeje̱ pa'ye case'ere si'a yë'quë maca yo'o ti̱'ani nuñerepa de'oye yo'oyë. 9Ja̱je pa'iquëta'are mësarupi pa̱ire sahuajë te'ohua'ise'ere de'oye yo'ocohua'i pani co'aye yo'oyë, Maija'quë cua̱ñese'eje̱ pa'ye yo'oma' do'ire. 10Ja̱je pa'ina, te'i pa̱ipi iye cua̱ñese'ere si'aye de'oye yo'oquëta'a te'o cua̱ñese'ere tayosiquë pani tsoe si'aye tayosiquë pa'iji. 11Ja̱je pa'ina, ja̱re i̱pi Maija'quëpi capi: “Yequë ë̱mëre, pa̱nita'a nomiore yo'oma'pë pa'ijë̱'ë, huejasicohua'i.” Cui'ne capi: “Pa̱ire huani je̱oma'pë pa'ijë̱'ë.” Ja̱je case'ere asani yequë nomiore, pa̱nita'a ë̱mëre yo'oma'cohua'ipi ja̱ yë'ta'a pa̱ire huani je̱ocohua'i pani tsoe cua̱ñese'ere sehuoma'quë po̱nëpi. 12Mësaru si'aye yo'ose'e i̱ñoñe pa'iji, Cristo yëyere yo'oye pa̱nita'a co'ayere. Ja̱je pa'ina, de'hua ñajë'ë, mësaru cuasaye cui'ne neñe. 13Ai yo'ocohua'ire oima'pë pa'isicohua'ire cato oiye peosipi yecohua'i oisicohua'ise'e de'oye ti̱'aja'cohua'i a'ë, i̱ Maija'quë pa̱i yo'ose'eje̱ pa'ye ñaquë de'huasipi.
Nema'pë Cocase'e Caye Co'aji
14Maija'quë do'ijë Maija'quëre pa'iji cuasaquë a'ë. ¿Caquëta'a ja̱ yë'ta'a nese'e ti peoquëre i̱quere co̱caiquë'ni, i̱ cuasaye? ¿Ja̱je pa'ire i̱ cuasase'epi i̱te huasoye pa'iquë? 15Cañu'u, Maija'quë do'iquëni, pa̱nita'a Maija'quë do'iconi ca̱ña cui'ne mu'se a̱i ja̱'ñe caraquëna. 16Mësaru aquëpi caji: “Se̱ñaquë de'oye pa'ijë̱'ë. Ca̱'nequë cui'ne si'aye më'ë yëye a̱i pa'ijë̱'ë.” Ja̱je caquëta'a ti i̱siye pa̱ji, i̱te carayere. ¿I̱quere ja̱je pa'ito coca co̱caiquë'ni? 17Ja̱je pa'ina, ju̱'isi co'amañaje pa'ye a'ë, Maija'quë pa'iji cuasayepi coa pa'ini, nese'epi peoto.
18Te'i pa̱ipi ca'ñe pa'i api, ñeje: “De'oji, më'ë cato Maija'quë pa'iji cuasayese'e payë, nese'e peoquëpi. Ja̱je pa'iquëta'are yë'ë cato nese'ere payë.” Ja̱je pa'ina, yure yë'ëre i̱ñojë'ë, më'ë Maija'quëre pa'iji cuasayere nese'e peoyepi. Yë'ëpi më'ëre i̱ñosi'i, Maija'quë pa'iji cuasayepi yë'ë nese'ere. 19Më'ë Maija'quëre te'i pa'iji cuasaquë pa'iye ai de'oji. Ja̱je cuasani më'ë tayoma'ë pa'iyë. Ja̱je pa'iquëta'are huatiohua'ije̱ cui'ne cuasayë. Cuasajë ca'rajë tsasijë pa'iyë. 20Ja̱je pa'ina, Maija'quëre pa'iji cuasajëta'a nema'pë pa'ito ju̱'isi co'amaña pa'iji, do'i peoye cuasayepi. Ja̱je pa'ina, ña sëtajë̱'ë, huesë pa'ima'ë pa'ija̱'quë. 21Ñajë'ë, mai aire Abrahamre Maija'quëpi nuñe pa'iquëre ca huesopi, i̱ mamaquë Isaacre huani je̱osi'i caquë yo'osi do'ire. 22Ja̱je pa'ina, më'ë ñañë, Abraham i̱ yo'ose'epi Maija'quë pa'iji cuasayere i̱ñose'e. Ja̱je yo'oquëna, Maija'quë pa'iji cuasayepi coa yo'o jujase'e peoye etapi. 23Ja̱je yo'oquëna, Maija'quë coca toyase'e cayepi ti̱'api: “Abrahampi Maija'quëre pa'ire paji cuasa do'ire Maija'quëpi i̱te nuñe pa'iquëre pare ca huesopi.” Ja̱je pa'ina, Maija'quë cajeire hue'yosiquë paji'i, Abraham.
24Ja̱je pa'ina, mësaru yure ñañë, Maija'quë pa'iji cuasaquë yo'oquëni nuñe pa'iquëre ca huesoye. Coa Maija'quë pa'iji cuasayese'epi nuñe pa'iquë ca hueso cua̱ñoñe peoji. 25Ja̱je pa'ina, Rahab co'a nomiore Maija'quëpi nuñe pa'icore ca huesopi, Josué jëjo saosicohua'ire pëaja̱'to i̱sico cui'ne yequë ma'aja'a yahue jëjo saosi do'ire. 26Ja̱je pa'ina, pa̱ipi joyore peoquë pani tsoe ju̱'isiquë pa'iji. Ja̱je pa'ye cui'ne Maija'quë pa'iji cuasayepi yo'oye peoto ju̱'ise'epi pa'iji.
Currently Selected:
Santiago 2: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.