3 Juan 1
1
Gayore Pëpaye
1Aipi yë'ë toyayë, iye toya ja'hua yë'ë cajeirepa Gayona caquë, yë'ë nuñerepa oiquëna.
2Më'ëre Maija'quë do'iquëre se̱cacaiyë, ju̱'ima'quë caquë, si'aye më'ë yë yo'oye de'oyerepa etaja̱'quë caquë, më joyo de'oye pa'iyeje̱ pa'ye. 3Yë'ë ai sihuahuë, Maija'quë do'ijëpi dani më'ë o̱cue pa'i macarepa nuñere pare pa'i yo'oyere quëajëna, asani. 4Peoji, yeque yë'ë sihuaye iyeje̱ pa'ye. Ja̱je pa'ina, yë'ë mamajëpi nuñere pare pa'ijëna, asani ai sihuayë.
5Maija'quë do'iquë më'ë nuñerepa yo'oyë, Maija'quë do'ijëre yequë hue̱'ñapi daicohua'ire më'ë ñama'cohua'ireje̱ co̱cai yo'oni. 6Si'aohua'i Maija'quë do'ijë tsi'si sitona më'ë aiohua'ire oi yo'oyere quëajëna, asahuë. Ja̱je pa'ina, se̱ñë, më'ëre. Ja̱ohua'ire saijëna, co'amaña caraye pa ja̱'ñere co̱caijë̱'ë caquë, Maija'quë sihuaquë ñañere yo'ojë̱'ë caquë. 7Ja̱ohua'i cato Jesucristore necaiyere cajë sai huëohuë. Ja̱je pa'ina, Maija'quë do'ijë peocohua'ipi co̱cañu'u cato coeyë, i̱ohua'i co̱caiyere i̱mañe. 8Ja̱je pa'ina, maipi ja̱ohua'ire ñacaiye pa'iji, nuñerepa cocare quëaja̱'cohua'ire mai co̱cai do'ipi.
Diótrefes Co'aye Yo'ose'e Cui'ne Demetrio De'oye Yo'o I̱ñose'e
9Maija'quë do'ijë, më'ë quë'ro pa'icohua'ina caquë yë'ëpi toyahuë. Ja̱je pa'iquëta'are Diótrefespi yëquë case'ere asacaiye coepi, i̱pi i̱ohua'i ëjaë pasi'i caquë yo'o do'ire. 10Ja̱je pa'ina, yë'ëpi ja̱rona saisiquë pani sa̱ñope yo'oyere caja̱'quë a'ë, yëquë yo'o ma'ñere coa cosoquë co'aye sa̱ñope caquëre. Ja̱se'e cama'ë cui'ne Maija'quë do'ijëpi ti̱'acohua'ireje̱ daijë̱'ë cama'ë yo'oji. Cui'ne yecohua'ipi i̱ohua'i huë'ena saye yëcohua'ireje̱ sama'pë pa'ijë̱'ë caquë ë̱sequë yo'oji. Cui'ne tsi'sisi hue̱'ñana eto saoquë yo'oji, i̱ohua'i huë'ena saye yëcohua'ire.
11Maija'quë do'iquë, co'aye yo'o i̱ñoñere tuima'ë pa'ijë̱'ë. Coa ai jerepa de'oye yo'oquë pa'ijë̱'ë. De'oye yo'oquëpi Maija'quë tse̱quë pa'iji. Co'aye yo'oquë cato Maija'quëre ñama'quë api.
Demetrio De'oyerepa Yo'ose'e
12Si'aohua'i Demetriore de'oquë api cayë. Nuñerepa coca cayeje̱ pa'ye pa'iquë api. Yë'ë i̱ pa'iye ñaquëje̱ de'oquë api cacaiyë. Ja̱je cajëna, më'ëpi nuñerepa cayë caquë asayë.
Ca Tëjiyerepa
13Jaiye më'ëre caye pa̱huë. Ja̱je pa'iquëta'are coeyë, coa toya ja'huana tintapi toyani jëjo saoye. 14Më'ëre pani ñaquë cayere yëyë. Ja̱je pa'ina, esa ña huajë'ñe nëiji.
15Ai cuasama'ë de'oye pa'ijë̱'ë. I̱ño pa'icohua'i më'ë cajeohua'ipi më'ëre pëpa saoyë. Ja̱je cui'ne yë'ëje̱ më'ëre se̱ñë, pa̱i ñapere yëquë cajeohua'ire yëquë cajeohua'ire ja̱ro pa'icohua'ire pëpacaijë̱'ë caquë.
Currently Selected:
3 Juan 1: sey
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.