Hebreos 8
8
Jesús ñande Pa'i Guasu
1Pe mba'e guasuvéva opa ja'éva apytépe niko, jarekoha peteĩ Pa'i Guasu ijojaha'ỹva, oĩva yvágape Tupã guapyha akatúape.#Sal 110.1. 2Ha omba'apo pa'i ramo Tupã rekohaitépe, omopu'ã vaekue Tupã Ñandejára, ha ndaha'éi yvypóra.
3Pa'i Guasu kuéra oñemoĩ ogueraha haguã kuave'ẽmby ha mymbajuka, ha upévare tekotevẽ Jesucristo oguereko avei oikuave'ẽ vaerã. 4Ha'e oĩ rire ramo ko yvy ári, ndaha'éi vaerã mo'ã pa'i. Ko'ápe niko oĩma voi pa'i ogueraháva kuave'ẽmby Moisés rembiapoukapy he'iháicha. 5Umíva umi pa'i ojapóva niko ta'ãngánte umi mba'e yvága pegua rovái. Ha jaikuaa umíva ta'ãnganteha, ñane mandu'águi Moisés ojapóta ramo guare Jotopa Róga, Tupã he'i hague chupe: “Ema'ẽ porã, ha ejapo opa mba'e ahechauka haguéicha ndéve yvytýpe.”#Ex 25.40. 6Pe ñande Pa'i Guasu katu, oñeme'ẽ hague peteĩ pa'i reko iporãvéva, oñe'ẽ ñande rehehápe oiko haguã peteĩ ñe'ẽ ñome'ẽ iporãvéva, oikuave'ẽva hetave mba'e porã.
Ñe'ẽ me'ẽ tenonde guare naiporãmbái vaekue
7Ñe'ẽ me'ẽ tenonde guare iporãmbaite rire, natekotevẽi vaerã mo'ã peteĩ ipyahúva. 8Tupã katu ojuhu yvypórape ndaheko porãmbaiha, ha he'i:
“Ñandejára he'i: ‘Oúne ára
ajapotaha ñe'ẽ ñome'ẽ ipyahúva
Israel ha Judá ndive.
9Ko ñe'ẽ ñome'ẽ ndaha'e mo'ãi
pe túva kuéra ypy kuerakue ndive
ajapo vaekueichagua,
ipógui aipyhy ramo guare
anohẽ haguã Egíptogui.
Ha ha'e kuéra ndojapóigui
ame'ẽ haguéicha chupe kuéra che ñe'ẽ,
aheja rei chupe kuéra,’
péicha he'i Ñandejára.
10Ñe'ẽ me'ẽ ajapótava Israel ndive
umíva umi ára ohasa rire,
kóvata, he'i Ñandejára:
Che rembiapoukapy amoĩta
iñapytu'ũme kuéra,
ha ahaíta ipy'áre.
Che ha'éta Tupã chupe guarã,
ha ha'e kuéra che retãguáta.
11Natekotevẽ mo'ã véima
oñombo'e oñohetãguáva
téra ojohogaguáva
Ñandejárape oikuaa haguã.
Opavave che kuaáta,
michĩvéva guive
tuichavéva peve.
12Che aheja reíta chupe kuéra
heko añangueta,
ha na che mandu'a mo'ã véima
iñangaipakuetáre.”#Jer 31.31-34.
13Tupã oñe'ẽ ramo peteĩ ñe'ẽ me'ẽ ipyahúvare, he'ise oguerekomaha itujáva ramo pe tenonde guare. Ha pe itujávape, sa'íma hembyve opaite haguã.
Currently Selected:
Hebreos 8: GPC2006
Highlight
Share
Copy
Want to have your highlights saved across all your devices? Sign up or sign in
Guarani DC Bible © Sociedad Bíblica Paraguaya, 1996.