1 Aj Tesalónica 5
5
1Atzin jaꞌlin erman, nya il tiꞌj tuꞌn t-xi nqꞌmaꞌn tijjo tqꞌijil mo tiꞌjjo jtoj tuꞌn tul Jesús juntl majl tzaluꞌn twutz txꞌotxꞌ, 2quꞌn bꞌin kyuꞌn qa il tiꞌj tuꞌn tul qAjaw, me mix aꞌl bꞌilte jtoj bꞌaꞌn tul, qalaꞌ ikytziꞌn tzeꞌnku jun ileqꞌ n-ul qnikyꞌin.#Mt. 24:43; Lc. 12:39; 2Pe. 3:10. 3Quꞌn toj kywutzxjal tkyaqil bꞌaꞌn taꞌ, ex ntiꞌ jun xobꞌajil. Me ntiꞌkux toj kynabꞌl, aj tuljo xitbꞌil kyibꞌaj tuꞌn qAjaw, quꞌn ikyxjo tzeꞌnku njaw qꞌiꞌn jun qya tuꞌn tchyoꞌn tal, ex mix aꞌl jun ktzꞌaqpajil.#Is. 13:8.
4Me ayetzin kyeꞌ, erman, nlay chi jaw kaꞌylaja, aj tul qAjaw, quꞌn mi nchi bꞌeta toj qxopin toj kyanmiꞌn, quꞌn bꞌiꞌn kyuꞌn qa il tiꞌj tuꞌn tul, a ntiꞌkux toj qnabꞌl, tzeꞌnku tulil jun ileqꞌ. 5Quꞌn qkyaqil ma qo ok te spikyꞌin, ex te qꞌijl toj qanmin, quꞌn qojtzqiꞌn qMan Dios, ex nya te qnikyꞌinqo, ex ntiꞌ nqo bꞌet toj qxopin. 6Tuꞌnpetziꞌn, mi qo ktan toj qnimbꞌil tzeꞌnqekuꞌ xjal nchi ktan, aj tul ileqꞌ. Qalaꞌ qkꞌasim qibꞌ toj qnimbꞌil, ex tenxit qnabꞌl, tuꞌntzintla noq bꞌinchil qten, aj tul. 7Quꞌn ayetzin kyeꞌ, a nchi bꞌet toj qxopin, ex nya tok tilil kyuꞌn tiꞌj qMan Dios, ikyx tzele tzeꞌnku jun xjal nktan qnikyꞌin. Ntiꞌ bꞌin kyuꞌn tiꞌ kbꞌajil. Ex ikyx tzeꞌnku aye nchi txꞌujte, toj qnikyꞌin nchi txꞌujte. 8Me metzin qeꞌ, a awo nimil, te qꞌijlqo. Tuꞌnpetziꞌn, qtzyuꞌmtzin qibꞌ, ex qklomtzin qibꞌ noq tuꞌn qnimbꞌil tiꞌj qMan Dios, ex tuꞌn qkꞌuꞌjbꞌil qibꞌ qxol, ikyx tzeꞌnku jun xoꞌl qꞌaqꞌ ntkloꞌn tibꞌ tukꞌa jun kxbꞌil te kolbꞌil tkꞌuꞌj.#Is. 59:17; Ro. 13:12; Ef. 6:13-17. Ex qꞌuqlek qkꞌuꞌj tiꞌjjo kolbꞌilqe, ikyxjo tzeꞌnku kolbꞌil twiꞌ jun xoꞌl qꞌaqꞌ. 9Quꞌn nya ma qo tzaj tqꞌoꞌn te Dios tuꞌn tikyꞌx jun kawbꞌil quꞌn, kujxix te jun majx, qalaꞌ noq oꞌkx tuꞌn qklet tuꞌn qAjaw Jesucrist, 10a o kyim te qxel, tuꞌn qanqꞌin junx tukꞌa, qa itzꞌqoxtaq, ex qa otaq qo kyim. 11Tuꞌnpetziꞌn, kynimsinx kykꞌuꞌja kyxolilixa, ex kykujsinx kyibꞌa, tzeꞌnkuxjo ntena kyuꞌn.
Tej t-xi tqꞌoꞌn Pabl kynabꞌl nimil
12Atzin jaꞌlin erman, nqo kubꞌsin qwutza kyeꞌy, tuꞌn kykubꞌ kyniminjiꞌy ayeꞌ nchi aqꞌnin kuj kyxola, a ayeꞌ nejinel kyxola toj tbꞌi qAjaw, ayeꞌ nchi jikysin kyeꞌy toj kynimbꞌila. 13Chebꞌe chi kykaꞌyinqeka, ex chi kykꞌuꞌjlinqeka, quꞌn tuꞌn aqꞌuntl nbꞌant kyuꞌn kyxola, ex tenxit kymujbꞌil kyibꞌa kyxolilixa, tuꞌntzin kyteꞌn toj tbꞌanil. 14Ex ikyxjo erman, nqo kubꞌsin qwutza kyeꞌy, tuꞌn kyxi kykawinjiꞌy ayeꞌ kykyꞌeꞌ tuꞌn kyaqꞌnin, ex tuꞌn kynimsin kykꞌuꞌjjo ayeꞌ kyjaꞌ kykubꞌ numj, ex tuꞌn kymojiꞌn kyukꞌa a ntiꞌxixl kyipin. Chebꞌe chi ayoꞌn tajbꞌil qMan Dios kyukꞌa kykyaqil.
15Kykaꞌyink kyibꞌa, quꞌn qa at jun xkubꞌ bꞌinchinte jun nya bꞌaꞌn kyiꞌja, mi xelin kyuꞌn ikyxjo, noqpe kyjaꞌ kxela kychjoꞌn tukꞌa jun bꞌaꞌn. Kybꞌinchima ikyjo kyxola ex tukꞌa kykyaqil xjal. 16Kukxit chi tzalajiꞌy.#Fil. 4:4. 17Mi txi kytzaqpiꞌn tuꞌn kynaꞌn Dios.#Fil. 4:6; Col. 4:2. 18Kyqꞌonxa chjonte te qMan Dios tojjo bꞌaꞌn ex qa tojjo nya bꞌaꞌn, quꞌn ikytzin taj Diosjo qukꞌa, awo nimilqo tiꞌj tbꞌi Crist, a Jesús. 19Mi tzꞌok kymiyonjiꞌy a tajbꞌil Xewbꞌaj Xjan toj kyanmiꞌn. 20Mi tzꞌel kyiꞌjlinjiꞌy Tyol Dios nyolajtz kyxola. 21Kyxpichꞌinkujiꞌy tkyaqil kyxnaqꞌtzbꞌilxjal, ex kyniminkujiꞌy a wen. 22Ex kypaꞌmil kyibꞌa tiꞌj tkyaqiljo nya wen.
23Axit Dios, a Tajaw tkyaqil nukꞌbꞌil, kubꞌ qꞌon kyeꞌy saqxix, ex tzꞌok kaꞌyin teꞌ kyanmiꞌn, kynabꞌla, ex kyxmilila, tuꞌntzintla ntiꞌx jun tiꞌ atx taj kyeꞌy, aj tul qAjaw Jesucrist. 24Quꞌn tzꞌaqlexix teꞌ, a ma txkon kyeꞌy, tuꞌn tjapin bꞌaj Tyol, tzeꞌnkuxjo ma tzaj tqꞌmaꞌn kyeꞌy.
Jun qꞌolbꞌil tuꞌn Pabl, tuꞌn tjapin bꞌajjo uꞌj luꞌn
25Atzin jaꞌlin erman, chi naꞌn Diosa qiꞌja.#Col. 4:3-4. 26Kyqꞌonxa jun qꞌolbꞌil twutzxix kye kykyaqil erman. 27Ex kxel woqxeniꞌn kyeꞌy toj tbꞌi qAjaw, tuꞌn tkubꞌ kyuꞌjinjiꞌy uꞌj lo kyxol kykyaqil erman. 28Noqit kukx tten t-xtalbꞌil qAjaw Jesucrist kyukꞌiy. Ikyxitjo.
Currently Selected:
1 Aj Tesalónica 5: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.