1
Tokanchi
1Yinuwakikolu wane rawa Tokanchi. Ga wa Tokanchi Goyakaluymananru. Ga wa Tokanchinwa Goyakalu. 2Yinuwakikolu Tyenwa Goyakaluyma.
3Ptowrunanuka kamrutka Waleya. Wale mwaknu gikenna kamrutka wa gwachritka. 4Wale rawa giweklu. Ga wa giweklunwa yine pokamlatyegitachri. 5Pokamlalu mapshagawaka pokamlatachri. Wa mapshagawaka gi gakagloklu.
Gwa gipgujtatlu pokamlalu
6Waneru satu jeji Goyakalu yokanatanru. Gwa giwakatletachri. 7Wale gina rupgujtalewatinripa, rupgujtatyaplu pokamlalu, ralixinripna pejnuruneko wale chinanu. 8Gi wa pokamlalni wale, seyni runa rupgujtatyaplu pokamlalu.
Pokamlalu galikakpotunanu
9Tokanchinwa pokamlalu galikakpotunanu. Wa pejnuruko yineru pokamlatachri tye psolchijneko gapokachri. 10Tyechijne rawanata. Tye psolchijneko kamrutka Waleya. Tyechijne gajene gi gimatlu. 11Walenu runyegita Wale. Ga wa Walenune gi wa yoptotluna. 12Seyni pejnuruneko yoptotjene Wale gitakna Goyakalu wgenene rixinripna, wa ralixgiwakatjene. 13Wanna gi wa granchiko wugenetikna, gi wa manchi galukyawaka, gi wa jeji galukyawakako, seyni Goyakaluya wugenetikna.
Tokanchiko manewata
14Tokanchiko manewata. Wixatskala rawanatapa. Wetlu royaknu. Girchi satupjerutu Gituru goyaknu waneylu. Kgimutlewaklerpotni. Galikakpotni.
15Gwa gipgujtatlu. Wane china sapleta, “Tyenwa nchinjenatanru, ‘Najxigi ginachripa, muchichachri gitaya, gi rixanu muchinanu gwachrini gitaya.’ ” 16Gi rixanu wane rixle gixoluruya wyoptojeta pejnurunekwu. Ga wa rumutlewle wanepnute rumutlewle potu wyoptota. 17Gi rixanu Moysisiya reneeka Tokanchi Yokanatkaluru. Wa Geso Kristo chinanu rawa gimutlewlu ga wa galikakpotunanu tokanchi. 18Gikena getlu Goyakalu gi pagogneko. Girchistsi gwachri, satupjerutu Gituru, Wale ginkakletlu.
Gwa Katlewakleru gipgujtale
19Tyenwa Gwa gipgujtale, wa Goteyone yokanatinitkana Gerosaleya sasertotene ga wa Rewinane repomgiyapluna, “¿Giryi pixa?”
20Rupgujetnawa Gwa. Gi wa nutatnawa. Rupgujetnawa, “Gi wa Kristono gita.”
21Repomgaluna, “¿Klunerkoxni? ¿Giliyaklayge pixa?”
Wane china, “Gi waleno.”
“¿Wa tokanchi geneklewatachrirayge?”
Rugita, “Gike. Gi waleno.”
22Giyagni wane chinruna, “¿Gi gixachriyi? wunkakyapna wyokanatjene. ¿Gi pchinnawa pixnanuko?”
23Wane china:
“Gitni giplaji yineru mwiyawakanu saplewatyachrino,
wane chinachrino:
Mpotukatanru Gitsrukaachigapo,
wa Gisayiya tokanchi geneklewatachri chinyawaka.”
24Wa yokanatkalune, Gwariseyonenu. 25Repomgaluna. Wane chinruna, “¿Klu koxa pkatlewatya, wa Kristomigjekyi, gi wa Giliyyi, gi wa tokanchi geneklewatachrikoxyi?”
26Gwa gigitna. Wane chinna, “Gita katlewata gonuya. Seyni gixatskala rawa wa gixa mumatanutu. 27Walenwa gita gajxigi ginachri. Gi wa gita gimukluni wa nkoshpirokyaplu yoshmaklejixitsa.”
28Tyekaka wane gixkaluru Wetawara Pokchi, Gorta wakanute, wa Gwa katlewjetyawaka.
Getanru Gowega Wgene Goyakalunu
29Waleprikgogne Gwa getlu Geso wale yegi yachri. Wane china, “Getanru Gowega Wgene Goyakalunu, tye psolchijneko gajene konmukochiretachri. 30Tyenwa nchinjenatanru, satu jeji najxigi ginachripa, Walenwa muchichachri gitaya, gi rixanu muchinanu gwachrini gitaya. 31Gi numatanatlu. Seyni wa rumatikolupa Gisrayiline yegi, giyagni nuna gita nkatlewatinripa gonuya.”
32Wa Gwa gipgujtalewata. Wane china, “Netlu Giwekikaluru tengogne gijrukyachri. Motkoko pixka rixa Geso gogo gwachri. 33Gi numatanatlu, seyni wa nyokanatjeru gonu nkatlewatinripa, Wale wane chinno, ‘Wa Giwekikaluru peta gijruklegogwakatanru, Wale gogwaka gwachri, Walenwa Giwekikaluru Kpashiri katlewatyachri.’ 34Gita getlu. Nunkakletlu Tyenwa Goyakalu Wgene.”
Muchichachine Geso yimaklene
35Waleprikgogne rumepe tunwaleta Gwa, ga wa gepi yimaklene. 36Rushinga yaletinri Geso, wane china, “Getanru gowega Wgene Goyakalunu.”
37Gepi yimaklene yijnako yanumsaletlu. Romkagitatkaluna Geso. 38Ruprotaka Geso. Retna rawgajxigitjene. Wane chinna, “¿Klu gijga?”
Wa wanna wane chinru, “Rawi (walenwa yokaakaluru, Yimaklewatachri), ¿ginaka pwa?”
39Wane chinna Wale, “Ginanu. Getapanru.”
Wane yana. Retluna ginakakta rawa. Walgogne rutukna Wale yegi. Kayinwakpapkotkani.
40Wa gepi Gwa yijnakotachine, romkagitjene, satni Gantirishi Simo Petro gepuru. 41Gantirishi gikshikgapkatlu waleko yegwaklu Simo. Wane chinru, “Wukshikatkalu Mesiya.” Walenwa yokaakaluru Kristo.
42Geso yegi raniklu. Geso getlu. Wane china, “Pixni wa Simo, Gona wgene. Pixa giwakatko Sega. (Walenwa yokaakaluru Sotlu.)”
Geso tomgana Wilipi, Natanayli
43Waleprikgogne Kalile raluka yaleta Geso. Rukshiklu Wilipi. Wane chinru, “Pomkagitanno.”
44Wetsayta Pokchi gajerni Wilipi. Walenwa Gantirishi ga wa Petro pokchi. 45Wilipi gikshiklu Natanayli. Wane chinru, “Wukshikatkalu Moysisi yonyegitanru Tokanchi Yokanatkaluruya, ga wa tokanchi geneklewatachine koxa yonyegitanru. Gesni, wa Gosi wgene, Nasare Gajeru.”
46Natanayli wane chinru, “¿Nasarege rumkata giyakletya pagixanu kigleru?”
Wilipi wane chinru, “Punanu. Petapanru.”
47Geso getanataplu Natanayli. Wane chinyegitlu, “Getanru satu galikakotunanu Gisrayili. Walenwa mayrokletu.”
48Natanayli wane chinru, “¿Ginaka pumatyano?”
Geso gigita. Wane chinru, “Wilipi ma tomgakanuwayi, wa gikera rapukote pwanatini, netyi.”
49Rugita Natanayli. Wane chinru, “Rawi, Pixni Goyakalu Wgenyi. Pixni wa Gisrayiline Pogiryi.”
50Geso gigitlu. Wane chinru, “Gi rixanu wane nchinyi, ‘Netyi wa gikerampukoya,’ ¿palixge? Tyekaka pnute tsru petanu.” 51Wane chinru, “Galikakni, galikakni wane nchingi, xanikakayakawa getanru tengogne gitpukinri, ga wa Goyakalutowrene gatskomtachine, gijrukamtachine Gita Yineru Wgenno yegi.”
Loading reference in secondary version...