Uan 12
12
Chidon bëdambo nuadquidën Esus tanoshcaid
(Mat. 26.6-13; Madc. 14.3-9)
1Aden abi nibënnubien Edusaden anoentsëqui ambi Dasado uincuenmiondacno Betania caid yacno Esus chopondash. Cuëdënquin bedantequid tsusedpabon: Ma cun mado uënësmenquio icnu, queshun obeca caniactsëc cuessunniampid tantiec cuëdënquin bedante 5tedec ushabicnuc nepondash. 2Ambo choacsho issun: Pemenu, queshun ambocquidon: Esusbëtan pec cho, cac puduedash Esus Dasadobëd tabadsho Dasadon chuchu Madtan pete menebampondash. 3Adnubien aton chibi Madian: Esus bëdamboshëcquid neque. Ismenu, quequin tantiaquin ambi piucquid dadpenquio menequin bedaid sedunten cushtoaid naddo caid danoshquete bëdambo nuadquidën Esus tanoshcapondash. Adotanquin aton manëdaidëmbi Madian taucpondash. Aden tanoshcaid shubu anuesquiec natiambo nuadpondash. 4Adosho issumbien abëd icquid abentsëcshun Udas Iscadioten Esus bedmetequidën naden Madia chushcapondash: 5¿Atotsi queshun aden nai? Aid danoshquete menequin piucquid dadpenquio seta abentsëc matanmec chonoadshun bedaidtedquiobi mimbi bedtsenoc. Adoshombic piucquid nibëdquido aid piucquid menebantiadquidi mimbi naic, capondash Udasën. 6Aden chuisho tantiashun aton piucquid nibëdquido tantiaquidquio dampondambi. Ubitedishun piucquid dayun uaquid iquequi abibi ampeshumënquid icquimbi aden Udasën muaquin Madia chushcapondash. 7Adshobien Esusën: Padi. Chushcainda. Ma nuquin matsesën uënësaid bëdambo nuadnuc danoshquete danoshcapaid yoc. Adombuembidi ubi uënësacsho chococate tantiaquin Madian ubi tanoshcaquin naic. 8Piucquid nibëdquido mibëd tabadquid nibëdenquio iquendac. Ubien mibëd icbuedi nibëdquio yanendac, quepondash Esus Udas chiec.
Dasadotsen cuessunnete bunaid
9Adnubien: Betania yacno Esus choaccosh, quequin chuisho tantiash Edusaden yacnouësh cun matses isadaidbon chuiquido dadpen Esus isec chochopondash. Ambobidi Dasado Esusën uincuenmiondaid icsho aidtsen isnuec chochopondash. 10-11Chochoshon Dasado issumbien utsin utsinquien: Nadatiambocquin nabanquidquio yec Nuquin Papan Chomiaidquio nec, quequin Esus tantiabempondash. Aden Esus tantiabenshun aton chuiquidon chiaid tantienquio yanec cuëshëdpanëdash. Adsho isash nëishtanequien Nuquin Papa ismequin nëish iua cuessunneshun pichicaquidon chuiquid tapabo: Ambi uincuenmiaid Dasado issun Esus tantiabenosh, quioshe. Dasadotsembien cuessunnemetiad, quecuededpanëdash.
Edusaden yacno Esus nidaid
(Mat. 21.1-11; Madc. 11.1-11; Duc. 19.28-40)
12Aden Madian tanoshcaboc ushanec puduanec Edusaden yacno Esus nidpondash. Adnubien tsusedpabon: Ma cun mado uënësmenquio icnu, queshun obeca caniactsëc cuessunniampid tantiec Edusaden yacnouësh cuëdënnuec chochobuedon: Esus choec, quesho tantiatanquin 13niste podobiecquid tebëtsennec Esus bëquedec chochopondash. Adec chochoquin: Chuiquid tapa nec, quequin ismequin ambi tebëtsennebued uic uiccabededec:
Osana.#12.13 Icbo, mibi bëdamboshë iquec, quequin Osana capanëdash.
Nuquin Papan Chomiaid yec mibi bëdamboshëcquid nec.
Cun matses isadaidbon chuiquid tapambo mibi nendac,
cabededpondash Esus cain.#12.13 Chotaquën onqueten Cuëd. 118.25-26 isbanta. 14Ambi podquiedën choquin istuidbued cabachubiecquid catsadtoanec Esus chosho isash adcuededpondash. Adec aid catsadtequid chuiquin Nuquin Papan cun tsusedpa dada uamiampid nad iquec:
15Dacuëdenda, Edusaden yacnocquido.
Cabachubiecquid caniactsëc catsadtoanec min chuiquid tapambo choeque. Is,
quequin chuipampic.#12.15 Isa. 40.1bëta Sac. 9.9 tantiaquin nëid dada uapanëdash. 16Adec Esus catsadtoanec chosho issun aden chiampid abëd icquidobëtan tantienquio iccondambi. Esus abuc nidambi ubitedishun: Esus chuiquinshenda nuquin tsusedpan dada uapampic. Aidën chiampicpadenshenda cun matsesën niste podobiecquid uic uiccabededquin Esus ismebededpondash, quequin tantiabededpondambi.
17Ënden uënësaidi Esusën Dasado uincuenmesho isbuedon: Uënësaidi uincuenmesho isombi, quequin matses dadpen chuibennepanëdash. 18Adsho tantiash: Uënësaidi nadatiambocquin uincuenmequid Nuquin Papan Chomiaidien niashe. Istannu, quianec chochoshon aden niste podobiecquid uicuiccaquin Esus ismebededpondash. 19Aden ismebededsho isashien padiseobo chuinanec tabadec: ¿Mitsipadoendac nuqui? Ma nuquitedi tantianubi: Nuquin chuiquid tapambo nec, cabededpayoc. ¿Mitsi paden Esus uënës uametiad? quecuededpanëdash.
Matses utsibo Esus iste bunaid
20Edusaden yacnouësh cuëdënec chochobuedobëd matses utsibo Quedesia yacnocquido icpanëdash. 21Adshumbien aidon Esus iste bunquin nidaid cuëshë Cadidea yacnocquid yec shubu daëdpactsëcquid Betsaida yacnouësh caniquid Esusbëd icquid Uedipe chuiquin: Esus iste bunebi, quequin chuituidpanëdash. 22Adoaquien Esusbëd icquid utsi Andedes chuibëtsenec aidbëd choshon Esus chuiquin Uedipen: Matses utsibo mibi iste bunec, capondash. 23Adoaquien: Matsesën Tishaid icquin nëbimbobimbi Nuquin Papan Chiaidtedi nainendac, quepondash Esus abi uënës uate chiec. 24Adshumbic utsi chiacbimbuen naden chuipondash: Tantia. Mibi abimbo chuinu. Tidico caid ëshë chococac caniash bacuëec bëdambocquid. Chococabi icac bëdambo ictiapimbo iquec.#12.24 Adoacbimbuen uënësacsho chococabi icac matses bëdambo icmetiapimbo iquendambi. Uënësacsho chococac uincuemshumbimbi matses bëdambo icmendac, quequin tantiec adpanëdash Esus. 25Adashic padpidec: Ambi tantiaiduidi naic tabadquid uënësash Nuquin Papa yacno puduedtiapimbo iquendac. Padnuen ambi tantiaiduidi nainquio icquin umbi chiacpadombuen naquido ubëdi ënëdenquio yec tabadtequido iquendac. 26Ubi nashunte bunquidën umbi chiacpadombuen natsiash. Adquid ubi tantiaquid icsho Cun Pan utsibo dadpen chuiquin: Nëid bëdambocquid nec, caindac, quepondash Esus.
Esusën abi uënës uate chiaid
27Adashic abi uënës uate tantiec natiaquiec uënësquimboshë Esus yampondash. Naden chuipanëdash: Mimbi tantiacpadombuen natiapimbo iquebi, Papa ¿quequindambi chuipe? Mabi Cun Pan chiacpadombuen nanuec chopondac, quepondash Esus. 28Adtanequien aton Papa chiec: Papa, mimbi tantiacpadombuen nëbi nainembi. Umbi aden nainacsho: Nuquin Papa bëdambo iquec, matses cameta, Papa, quenubien abucuësh cumapenec onquec: Nëbi adomeshumbic padpiden: Nuquin Papa bëdamboshëcquid nec, matses cameuaindambi, quepondash.
29Abucuësh onquesho bëdambuen tantiabi yec utsibo: Abu cuëdtoec nec, quenubien utsibo: Nuquin Papabëd icquidën Esus chiosh, quecuededpanëdash. 30Adsho tantiashun Esusën: ¿Ubi tantiamenuecta onquediosh? Padenquio. Ma mibitedi tantiamenuec Nuquin Papa onquec nepaboc.
31Nëbi abi tantiesabo Nuquin Papan cuidtequido yanendac. Adembidi matses dadpenquio icsambuen namequid Mayan Icsa Satanas chedo Nuquin Papan cuenmetequid yanendac. 32Umbien abuc dectanaid icquin matses dadpen ubi tantiaquido icmendac, quepondash Esus. 33Ubi cueste napotiaidën dectanquin uënës uaindac, quequin tantiec: Ubi abuc dectanendac, quepondash Esus.
34Adsho tantiashumbien abi datsidadquidon: Nuquin Papan Chomiaid Quidistu Mesias caid uënësesambo nendac, quequin Nuquin Papan Chiaid Moisesën chiampid nuquin matsesën chuinubi: Abuc dectanac uënësebi ¿quequinda mimbi chuipo? Aden chiec Matsesën Tishaid Nuquin Papan Chomiaid ictiapimbo mibi iquec. Matsesën Tishaid ¿tsutsi nepec? quepondash Esus datsidadquido.#12.34 Isa. 9.7 tantiaquin aden matsesën chuipanëdash. Aid ista. 35Adoaquien Esusën: Nadquid nebi, quenquio icquin utsi chiacbimbuen naden chuipondash: Mibi bëdambuen tantiamequid nëbi abi mibëd iqueque. Aid tantiata. Adbuedi uëshë budacbimbuec isadenquio yanendac. Aid nibëdnuc inchëshën tantienquio yec capuacbimbuen mimbi bëdambuen tantienquio iquendac. 36Uëshën chëncacbimbuen Nuquin Papan bëdambuen iste tantiamequid tantiata. Adsho bëdambo icmequin Nuquin Papan ambi cuidenquio ictequid mibi icmendac, quepondash Esus. Adtanec aidon istuidtiapimbo icnuc nidpondash.
Isadaidbon utsin utsinquien Esus tantienquio yaid
37Aden Esusën nadatiambocquin dadpen nabansho issumbi cun matses isadaidbon Esus tantiatiadquidëmbi Esus tantienquio icpondash. 38Aden Esus tantienquio icte chuiquin Nuquin Papan oncamiaid Isayasën naden dada uapampic:
Mimbi chiaidquio chuibansho tantiashun: ¿Tsuntsin: Abimbo chiec, quequin tantiosh? Papa.
Mimbi namiacpadombuen nadatiambocquin nabansho isash ¿tsuda: Nuquin Papan namiaidquio nuqui isoc, quepatsiash, Papa? quendac,
quequin Isayasën chuipampic.#12.38 Isa. 53.1 tantiaquin nëid dada uapanëdash.
39Tantienquiocquido icsho Nuquin Papan pamumëdacbimbuecnuc icmiac cun matsesën Esus tantienquio icpanëdash. Nadembidi chuiquin Isayasën dada uapampic:
40Nuquin Papan namiac min matses pamumëdacbimbuen tantiate bunenquio iquendac.
Bëchicqueshun isenquio yacbimbuen isquimbi tantiatiapimbo iquendac.
Umbi chiaid tantiaquin umbi nabansho issumbi ubi padpiden tantiauatiapimbo iquendac.
Aden ambi icsambuen naid ënsho bëdambuen ismane,
quiash Nuquin Papa chushquiaid Isayasën chuipampic.#12.40 Isa. 6.10 tantiaquin nëid dada uapanëdash.
41Nuquin Papabëd Esus bëchamauanquiec tabadsho isnëdaid icquin Isayasën aden aton matsesën Esus tantienquio icte chuipampic.#12.41 Isa. 6.1-5 tantiaquin Uanën aden chuipanëdash.
42Cun matses dadpenshun Esus tantiabennubi adembidi cun matses isadaidbon chuiquido utsin utsinquien Esus tantiabempanëdash. Adbuedi: Nuquin Papan Chiaid chuibante shubun puduedacsho padiseobon cuenmenushe, quiash dacuëdquin: Esus tantiaquid nebi, quequin chuitiadquidi utsibo chienquio icpanëdash. 43Mabi cun matsesën bëdambuen isnu, quequinuidtsëqui tantiaquin aden chuitiapimbo icpanëdash. Ma Nuquin Papan ubi bëdambuen isnu, quetiadquidi adenquio icpanëdash.
Cuidenquio icte chiec nebi, quiaid
44Adshumbic matses dadpen tantiamenuen naden Esusën cumapenec cuëdquin chuipondash: Ubi tantiaquidën ubiuidtsëqui tantienquio icquin ubi chomiondaidtsen Cun Pa tantiendac. 45Adembidi ubi isquin: Adquiobidien abi chomequid Aton Papa iquec, quequin ubi tantiaquidën tantiendac. 46Uëshë chënquequid isquin tantiacbimbuen Nuquin Papan matses bëdambuen iste tantiamequidquio nebi. Ubi tantiaquid yanash bëdambuec tabadec inchëshquio icnuc istiapimbo yacbimbuec icsambuec tabadenquio iquendac. 47Umbi aden chuisho tantienquio icquido nëbi cuidnu ¿quectabi icti? Padenquio. Nëbi Cun Pan bëdambuen isquin matses cuidenquio abëd tabadmete chuinu, quequini chondac. 48Ubi tantiate bunenquio icquin Umbi Chiaid niac niacsho ambi abitedimbo cuidte uëshëmbi umbi chuibocpadombuen ubi tantiesabo Cun Pan cuidendac. 49¿Umbibi tantiacpaden chuibanquindambi nadi? Padenquio. Ubi chomiondaid Cun Pan: Naden chuibanta, quequin chiaidquio chuibanequini nec. 50Ubi tantiaquido ubëdi tabadec padpidec uënëstiapimbo iquendac, quequin Cun Pan chiaiduidtsëqui chuibanequini nec, quepondash Esus.
Currently Selected:
Uan 12: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.