Ducas 2
2
Esus tishaid
(Mat. 1.18-25)
1Adnubien shubu dadpen icquid Doma yacnocquidon chuiquid tapa empedadod Aucusto cuëmëdquid icpanëdash. Aidëmbi: ¿Tedtsimbo umbi namiaido matses iqueque? Isquin tantianun dada uabanta, quequin ambi namiaido chuipanëdash. 2Adquid icnuc tauambuen naquid nidaid Sidia caid yacnocquidon chuiquid tapa cobednadod Quidinio cuëmëdquid icpanëdash.
3Aden chuiquid tapan: Min tsusedpa tishampicnoshon mibi cuëmëdquid dada uamec nidtan, cac isadaidbotedi nidannepanëdash.
4Adec utsibo nidnubien Ose nidaid Cadidea caidën shubu dadpen icquid Nasaded yacnouësh puduanec nidequi aton tsusedpa Dabid tishampicnombobi nidaid Udea caid yacno shubu daëdpactsëcquid Beden yacno chopanëdash. 5Aton chido Madia nua bacuë usunquidbëdi Ose abi cuëmëdquid dada uamec Beden yacno chopanëdash. 6Ambo choash icnubi Madia bacuë nëncuempanëdash. 7Ambobidi matses dadpen chochoash ushte shubun puduedash tsucus tsucustsëcquio iquec tabadsho issun nëish iua tabadacno puduedshun Madian dada bacuë tishpanëdash. Tishshun dashcute cuësh cuëshshun dapucshun nëish iuan pete sandote nacnenaidën ambi bëyuc tishaid aton mado Madian nampanëdash.
Obeca pemequido Nuquin Papabëd icquidon chiaid
8Aden Beden yacnoshon Esus tishnubien aid anoentsëqui tied icquidën nëish iua obeca dadpen dayun uaquin pemequido inchëshën tabadpanëdash. 9Adec tabadnubien Nuquin Papan budmiac abëd icquid abucuësh budec isadcuennubi Nuquin Papan icmiac abu bëchamauanquiec choquidën abitedi dachëncapanëdash. Adoac obeca pemequido dacuëdcuededquiopanëdash. 10Adsho issumbien Nuquin Papabëd icquid chobuedën: Dacuëdenda. Chiaid Bëda matses abitedi cuishoncametequid chuinuec chobique. Dacuëdenquio icquin tantiata. Chuinu. 11Nëbimbobi tsusedpa Dabid tishampicnoshon Beden yacnoshon Nuquin Papa yacno iuedanquid Quidistu Nuquin Papan Chomiaid abitedishun Icbombo ictequid tishosh. 12Aid tishacno nidshun nadquio icsho mibitedishun istuidendac. Dashcute cuëshcuëshshun dapucaid nëish iuan pete sandoten uesho mimbi istuidendac. Adec bacuëmpi uesho istuidshun: Nuquin Papan Chomiaid Quidistu nec, quequin mimbi tantiendac.
13Aden chiec Nuquin Papabëd icquid onquenubien abipadquid utsibo dadpen isadcuenec chochoash Nuquin Papan naid chiec nadec cuëdëncuededpanëdash:
14Nuquin Papa abucquio tabadquid yec bëdamboshë iquec.
Nuquin Papan bëdambuen isaido matses ma bëdambuec tabadpanuna,
quec cuëdëmpanëdash. 15Adec cuëdënash Nuquin Papabëd icquido abuc niduapanëdash. Adec nidan obeca pemequidotedi: Nuquin Papan nuqui tantiamebuedquio bacuëmpi isec Beden yacno nidnu nid, quianec badedquio nidannepanëdash.
16Adec badedquio nidanneshun Madiabëta Ose istuidquimbi nëish iuan pete sandoten bacuë nanac uesho istuidpanëdash. 17Aden bacuë isquin Madiabëta Ose ambi isbuedbëta ambi tantiabued chianec puduenanec nidshun chuibanac 18tantiaquidtedi: ¿Midapadquidien capec? quec tantiadempambo yec tabadcuededpanëdash. 19Aden obeca pemequidon chuibued tantiashun Madian: ¿Mitsipadquid cun bacuë nepeba? quequin bëshunenquio icquin tantiadednepanëdash.
20Adquid icnuc Nuquin Papabëd icquidën chuibocpadquiocsho isash aucbidi choash obeca pemequido: Nuquin Papabëd icquidën chuibocpadombuen istuidombi. Aden bacuëbëta abëd icquid ismequid Nuquin Papa bëdamboshë iquec, quequin chiec onquecuededpanëdash.
Nuquin Papa tabadte shubu dapa yacno Esus buanaid
21Adnubien 7tedec ushtanquin aton madon shui dëbid dëtemeshun Nuquin Papabëd icquidënquio abi bacuë usundoabicsho chuibocpadombuen Madian aton mado Esus cuëmpanëdash.#2.21 Shui dëbid dëtemiaid Moisesën chiampid istiadquio icquin D.N.Ch. 12.3 isbanta.
22Adshumbic Moisesën chiampicpadec dada bacuë tishash badedi Nuquin Papa tabadte shubu dapa yacno nidtiapimbo icquin uëshë abentsëc nidmiash Nuquin Papan Chiaid utsi nanuen Madiabëtan Osen Edusaden yacno Esus buampanëdash. Ambo buanash Nuquin Papa tabadte shubu dapa yacno choshon: Cun bacuë Nuquin Papan namiaidquio nec, quequin ismepanëdash.#2.22 D.N.Ch. 12.2-4 tantiaquin chido tishbued chiaid iquec. Aid isbanta. 23Nuquin Papan: Dada bacuë bëyuc tishaid cuna nec, quequin Moises chiampid tantiaquin aden napanëdash.#2.23 Buanaid nëidtedi tantiaquin nëid dada uapanëdash. Nëidic Buan. 13.2, 12. Aidtedi tantiaquin dada uapanëdash. 24Adembidi bëyuc tishquid icsho bëdambo icmete bunquin ubi tabadte shubu dapa yacno nidshun mimbi buanaid dëbimbiecquid daëd cuessunneshun pichicameta. Dëbimbiecquid nibëdnuc oshpodco bëdambocquid daëd cuessunneshun pichicameta, quequin Nuquin Papan Moises chiampid tantiaquin nanuec Edusaden yacno choash Madiabëd Ose Nuquin Papan chiacpadombuen nanuec puduedpanëdash.#2.24 D.N.Ch. 12.6-8 tantiaquin nëid dada uapanëdash.
25Adnubien Edusaden yacnocquid Simeon cuëmëdquid Nuquin Papan: Naden nata, quequin Moises chiampid tantiaquin naquidquio icpanëdash. Aidi isadaidbon chuiquid tapa abentsëcquiobi Nuquin Papan Chomiaidquio cainquidquio icpanëdash. Aidi Nuquin Papan aton Mayan Bëda meniaidquio nepanëdash.#2.25 Isa. 40.1-2bëta 49.13 isbanquin Isa. 61.2 isbanta. Adembidi Chotaquën onqueten dada uaid Isa. 57.18 ista. 26Aidëmbi Nuquin Papan Mayanën tantiamiac: Nuquin Papan Chomiaid Quidistu Mesias caid choacsho uënësabicquin isembi, quequin tantiapanëdash. 27Adembidi Nuquin Papan Mayan Bëdan nidmiac Nuquin Papa tabadte shubu dapa yacno nidequi tsicatequin daquënë uaidën Simeon puduedpanëdash. Ambo puduedash capunubi Nuquin Papan: Naden nata, quequin Moises chiampid tantiaquin nanuen aton bënëbëtambi Madian aton bacuë bëpanëdash. 28Aden bësho issun Simeonën bedshun icucquin: Mibi bëdambo iquec, Papa, quequin Nuquin Papa naden chuipanëdash:
29-30Abitedishun Icbombo icquin mimbi ëndenquio chiampid nëbi nëid bacuë mimbi Chomiaidquio Quidistu cashumbic Mesias caid mibi matses cuidmenquiocquid isembi.
Nëid isambobi uënësebi, quebuedi: Nëbi nëid isash bëdamboshë iquec cuishonquebi. Adash mimbi tantiacpadënquio bëdambo yec uënësendabi, Papa.
31Mibi yacno iuedanquid nëbi mimbi Chomiaid isembi.
Adquid icsho ma abitedishunquio ispanuna.#2.30-31 Isa. 40.5bëta 52.10 isbanta.
32Nëidëmbi mimbi tantiacpaden matses utsibotsen mibi tantiamebenendac.
Adoac: Isadaidbon tishaid bëdambocquid icnuc aton matses isadaidbo bëdambo icmequid nec, cabededendac, quepanëdash Simeon.#2.32 Nëidted tantiaquin nëid dada uapanëdash. Isa. 42.6bëta 49.6 isquin Isa. 52.10 ista. Chotaquën onqueten Isa. 46.13 ista.
33Aden chuisho tantiash: ¿Midapadquidien cun mado capec? quequin tantiec tantiadempambo Madia aton bënëbëd icpanëdash. 34Aden chuishumbic Madia chiec Simeon: Tantia. Chuinu. Nuquin Papan bëdambo icmiaid mibi nec. Min mado tantiesa isadaidbo utsi utsiec icsho Nuquin Papan cuidendac. Min mado tantiaquid utsi utsiec icsho Nuquin Papan abi yacno iuedendac. Min mado Nuquin Papa yacno puduedmianquid nec, quesho tantiashun matses dadpenshun icsambuen chuishunquin chieshënendac. 35Adoac ambi ompodshon icsambuen naidbëta ambi tantiaid icsa tantiamequid min mado iquendac. Adobanquin tantiamesho uënës uasho isash aton tita iquec mibibi uënësquio iquec: Chështen siac natiambo yacbimbuec: Cun mado siaid tantiec natiamboshë iquebi, mibi quendac, quepanëdash Simeon Madia chiec.
36Aden Simeonën chuinubien Nuquin Papan oncamiaid chido Ana cuëmëdquid machombo yec ambobidi icpanëdash. Aidën papa Penued icnuc aton tsusedpa Ased icpampic. Aidi buntac icsho aton bënën bedac aidbëdi seta 7ted matanmec icnubi 37aton bënë uënëspanëdash. Adec uënësan aton seta 84ted iquequi abi niante icpanëdash. Aidëmbi Nuquin Papa tabadte shubu dapa yacno nidtednequin Nuquin Papauidi tantiaquin buna mëmundednequin Nuquin Papa chiannequidquio Ana nepanëdash. 38Ambo icnubi Esus bësho issun: Nuquin Papa bëdambo iquec, quequin Anan Nuquin Papan oncamiaid icquin naden chuipanëdash: Isadaidbo Edusaden yacnocquido utsibon iuabo icsho nëidën iuapenquio icmendac, quepanëdash Ana Esus caic.
Nasaded yacno chouaid
39Adashic Nuquin Papan: Naden nata, quequin Moises chiampicpaden nainash aucbidi nidec Osebëd Madia nidaid cuëshë Cadidea caid yacno niduash shubu dadpen icquid Nasaded yacno abi tabadbocno chopanëdash. 40Ambo tabadnubi aton mado Esus dada bëdambo yec canicuempanëdash. Aidi bëdambuen tantiaquidquio icsho Nuquin Papan bëdambuen isaidquio icpanëdash.
Nuquin Papa tabadte shubu dapan Esus tabadaid
41Adashic isadaidbo tsusedpabon: Ma cun mado uënës uamenquio icnu, queshun obeca caniactsëc cuessunniampid uëshë yannuc abi setan setanquiec nidtedniacpadec Madiabëd Ose Edusaden yacno niduapanëdash. 42Adec nidnuc Esus abi tishaid seta 12ted icnuc aton titabëd aton papa Edusaden yacno nidsho isash abëdi Esus nidpanëdash. Nuquin Papan chiampicpadequi setan setanquiec nidtednepanëdash.#2.41-42 Aden ëndenquimbo chiampid iste bunquin Buan. 12.1-27bëta M.I.Ch. 16.1-8 isbanta. 43Adec ambo nidashic bidiscamiabi pan shëampid 6tedec ushquin tantiec tabadtedniacpadec tabadpanëdash. Adec ambo tabadec ënëdash Esus ambobi icnubi tantienquio iquec Madiabëd Ose auëshquiobi puduanec nidpanëdash. 44Utsibobëd choadanec tantienquio yec nidshumbi inchëshbudtsëqui abëd nidannequido ambi tantiaido yacno capuquin Esus nibëmbampanëdash. 45Aden nibënquin istuidambo iquec Edusaden yacno padpidec chouapanëdash. 46Adec choshon daëdec ushquin nibënshun Nuquin Papa tabadte shubu dapa daquënë uaidën puduedshun Esus tsadsho istuidpanëdash. Ambo tsadquin Moisesën chiampid tantiamequidon chuisho tantiashun bëdambuen chuimesho Esus istuidpanëdash. 47Aden chuibansho tantiaquidtedishun: Bëdambuen tantiaquin chuibanquidquio nëid nec, quequin tantiabededpanëdash. 48Ambo tsadsho istuidashien: ¿Mitsipadquid cun mado nepec? quequin otacquio Madian tantiapanëdash. Aden tantiequi: ¿Atotsi quiash ubi daëdi tantienquio yec nëmbo choash tsadec ne, mado? Uënësquiocquin papabëtambi mibi nibëmbenniombi, capanëdash aton titan.
49Adoaquien Esusën: ¿Atotsi queshun ubi nibëno? ¿Tantienquioda ique? Cun Pan shubu dapan iquec nebi, capanëdash. 50Aden Esusën chuisho tantiashun aton titabëtan Osen tantienquio icpanëdash.
51Adshun: Nidnu nid, mado, cac cacuidenquio yec Nasaded yacno chouapanëdash. Ambo icquin aton titabëtan Osen chiacpaden Esusën nadednepanëdash. Aden nasho issun aton titan ambi isbuedbëta ambi tantiabued bëshunenquio icquin tantiadednepanëdash.
52Adnubi bëdambuen tantiaquiec Esus canidopanëdash. Adquid icsho Nuquin Papan bëdambuen isacpadombuembidi matsesëntsen bëdambuen isbededuapanëdash.
Currently Selected:
Ducas 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.