Uan 8
8
Aton bënëpenquio chudmequid cuënoten sesetsenaid
1Adnubi Esus macuësh tapa Odibos caid yacno nidpondash. 2Adashic ushash badiadnubi choec Nuquin Papa tabadte shubu dapa daquënë uaidën puduedpondash. Puduedsho isash matses dadpen chochoec abi datsidadsho issun tsadquin Esusën chuibampondash.
3Aden chuibannubien Moisesën chiampid tantiamequidobëtan padiseobon aton bënëpenquio chudmesho istuidshun Esus yacno chido bëshun nënantanquio nitsimpondash. 4Adshumbic Esus naden chuipondash: Nëid chidon aton bënëpenquio chudmesho istuidshun bëombi. 5Nuquin Papan Chiaid Moisesën naden chuiquin dada uapampic: Aton bënëpenquio chudmequid cuënoten sesequin cuessunnequid, quepampic. ¿Adembidida mimbi tantie? quepondash chido bëquido Esus caic.#8.5 M.I.Ch. 22.22-24 tantiaquin padiseobo chedon aden chuipanëdash. 6¿Atotsi Esusën chieque? Nuquin Papan chiampidquio chienquio icsho: Mimbi icsambuen chiec, catiad, queshun: ¿Adembidida mimbi tantie? capondash. Adoaquien Esusën ëcbedenquio icquin shuebudshun mëdante dëshbin nidaidën dada uapondash. 7Adshobien padpidembuen: ¿Adembidida mimbi tantie? cadoniac nidtotanec: Nuquin Papan Chiaid niaquesambo icquin en mimbia cuënoten sese, quetanec#8.7 M.I.Ch. 17.7 tantiashun Esusën aden chuipanëdash. 8padpidembuec shuebudshun mëdante dëshbin nidaidën dada uapondash.
9Aden Esusën chuisho tantiatanequien: Nuquin Papan Chiaid niaquesambuen nibëdchitec. Sesetiapimbo iquebi, quetanec nidannepondash. Tsësioboba nidannebon caniabotsen tsiuec nidannepondash Esusbëd chidouidtsëqui icnuc. 10Adec chido bëbuedo nidannian nidtoquin chido isquin: ¿Mitsimbo nidanniosh, champi? ¿Mibi cuënoten sesequidta nibëdosh? Esusën cac: 11Ai, nibëdosh, quesho tantiashumbien: Umbimbo mibi cuënoten sesenquio iquembique. Mimbi icsambuen naid ënash min shubuno tabadec nid, champi, capondash Esusën.
Matses Nuquin Papa tantiamequidquio nebi, quiaid
12Adshumbic padpidembuen matses tantiamequin Esusën naden chuiuapondash: Nuquin Papan bëdambuen iste matses tantiamequidquio nebi. Umbi tantiamiac ubi tantiabenquido icsambuen nate bunenquio yanendac. Adash ubëd tabadtequid iquendac, quepondash Esus.
13Adsho tantiashumbien padiseobon: Mimbentsëqui: Adquid nebi, quequin chuisho: Abimbo caic, catiapimbo iquebi. Muequien mibi nechitec. Matses daëdshun chiac bëdambo ictsiash, quepondash. 14Adsho tantiashun Esusën: Umbimbo chuibued abimbo iquec, quequin tantiembi. Cun Pan chomiondaid yec anobidi nidendabi, quec muainquio iquebi. Padnuen mibitedishun aden tantienquio iquec. 15Matsesën tantiacpaden mibitedishun: Icsambocquid nec, quequin chuipec. Umbien: Aid icsambocquid nec, quequin chuitiapimbo iquec. 16Adec: Icsambocquid nec, quequin abimbo chuitsiambi. Umbentsëqui chienquio icquin ubi chomiondaid Cun Pabëtambi: Nëid icsambocquid nec, quequin cuidnumbi abimbo chiendambi. 17Nuquin Papan: Naden nata, quequin Moises chuiquin dada uamiampid mibitedishun tantiaid nad iquec: Icsambuen naosh, quequin daëdshun chuisho tantiashun: Abimbo caic, quequid yendac, quequin chuipampic.#8.17 M.I.Ch. 17.6bëta M.I.Ch. 19.15 tantiaquin Esusën aden chuipanëdash. 18Aden Moisesën chuiquin dada uampid icnuc: Adquid nebi, quequin abimbo chiec nebi, quequin umbiuidtsëqui tantiembi. Ubi chomiondaid Cun Pantsen adembidi: Abimbo caic, quequin ubi tantiec, quepondash Esus.
19Adsho tantiashumbien: ¿Mitsimbo papa icpec? capondash. Adoaquien: Ma mimbi ubi tantienquio icpayoc. Ubi tantiaquimbien mimbi Cun Patsen tantiatsiandac, quepondash Esus. 20Nuquin Papa tantiaquin piucquid menequin sandote tabëcaid dectanacnoshon Esusën aden chuibampondash. Aden chuibansho abi chieshënquidon abi uënës uate uëshë choabicnuc Esus bedenquio icpondash.
Ubi nidacno mibitedi nidtiapimbo iquendac, quiaid
21Adshumbic padpidembuen Esusën chuipondash: Nidendabi. Ubi nidacsho nibënquin mimbi ubi istuidenquio iquendac. Ambi chiaid niac niacquido icsho Nuquin Papan bëdambuen isambobi mibitedi uënësendac. Adash ubi nidacno mibitedi nidtiapimbo iquendac, quequin Esusën chuipondash. 22Adsho tantiashien isadaidbon chuiquido: Abibi ¿cuessunniadnuecta Esus nepec? Ubibi cuessunniadash ubi nidacno mibi nidtiapimbo iquendac, quequin ¿chiecta nepec? quepondash. 23Adsho tantiashien Esus: Mibitedi matses yec nidaidën tabadquido nec. Ubien abucuësh chondaidquio yec nidaidën tabadquidpenquio nec. 24Adquid icsho ubi tantienquio yec uënësacsho Nuquin Papan ambi icsambuen naquid cuidacno nidmendac, quequin tantiaquin: Icsambuen naquid icsho Nuquin Papan bëdambuen isambobi mibi uënësendac, quequin mibi chiombi, quepondash Esus.
25Adsho tantiashumbien cun matsesën chuiquidon: ¿Mitsipadquid icquin ubi aden chuiquin nai? caquien: Umbi chianniac mibitedishun tantienquio iccoc. Adquid icsho mibi chuiuate bunenquio iquebi, quepondash Esus. 26Adashic padpidec: Mimbi naid dadpen chuiquin mibitedi cuidte chiendambi. Ambembi chienquio icquin ubi chomiondaid muesanquio chiaidquio chiendambi. Aidën chiaiduidi matses abitedi tantiamequin chiendambi, quepondash Esus.
27Adsho cun matses chuiquidon: Abi chomequid Nuquin Papa chiec nec, quequin tantienquio icpondash.
28Aden tantienquio icsho issumbien Esusën padpiden naden chuiuapondash: Matsesën Tishaidquio icshobi ubi cueste napotiaidën dectanshumbi mimbi ubi tantiabenendac. Ambi chiacpadquidshenda nepadennec. Ambi tantiacpaden chienquio icquin Aton Papan chiaidquio chuiquinshenda napadennec, quequin mimbi ubi tantiendac. 29Nëbi ubi chomiondaid Cun Pa ubëd iquec. Abi bëdambo icmenuenuidi nasho issun Cun Pan ubi nianenquio iquec, quepondash Esus.
30Adsho tantiashun: Abimbuen Esusën caic, queshun dadpenshun Esus tantiabempondash.
Mayan Icsa Satanasën iuabo nec, quequin Esusën chiaid
31Adshumbic Esusën abi bëdiactsëc tantiabenquido cun matses isadaidbon chuiquido naden chuipondash: Umbi chiaid tantiaquin naquidquio yec ubi tantiaquidquio mibitedi iquendac. 32Nuquin Papabëta ubi tantiasho icsamianquidën iua icbuedi aidën iuapenquio mibi icmendambi, quepondash Esus abi tantiabentsëcquido chiec. 33Adsho tantiashumbien: Ubitedi Abadauanën tsiuecquido yec utsin iuacmaido nebi. Tantiadenquiocnoc mimbi chiec. ¿Atotsi quequin: Iuapenquio mibi icmendambi, quequin mimbi ubi chuipe? capondash abi tantiabentsëcquidon.#8.33 Aden aton matsesën chuinubi aton matses isadaidbo Doma yacnocquidon iuabo nepampic. Aton tsusedpabo equipito yacnocquidon iuabo icpampic. Babidonia yacnocquidon iuabotsen icpampic, quenquiocquin abimbo chienquio icpanëdash.
34Adoaquien Esusën: Tantia. Mibi abimbo chuinu. Abi iuaquidën uidënuac nidtiapimbo yacbimbuen icsambuen naquidën ambembi ambi icsambuen naid ëntiapimbo iquec. 35¿Mitsipadquio nuquin matsesën iuaid icpec? Aton madopenquio yec icsambo icsho abi iuaquidën cuenmequid. Aton madomboen cuemenquio icquin bëdambuen isquid. 36Aden matsesën aton mado bëdambuen isacbimbuen Nuquin Papan Madombo icquin icsambuen naquidën ubi tantiabensho cuidmenquiocnoen bëdambuen isendambi, quepondash Esus.
37Adshumbic Esusën naden chuiuapondash: Abadauanën tsiuecquido nec, quequin mibitedi tantiembi. Umbi abimbo chuisho tantiate bunenquio iquec ubi cuessunnete mibi bunec. 38Cun Pabëd tabadquin isondambi, quequin umbi bëdambuen chuisho tantienquio icquin min papabimbuecquidën chiacpadombuen mibitedishun nabanec, quepondash Esus. 39Adsho tantiash: Abadauan cun pabimbuecquid nec, quepondash. Adshobien Esusën: Aidën madobimbuecquido icquin Abadauanën nanëdacpadombuen naquin mimbi bëdambuen natsiac. 40Bëdambuen natiapimbo icquin Nuquin Papan Chiaidquio chuisho tantiashumbi mimbi ubi cuessunnete bumpec. Abadauanëmbien Nuquin Papan Chiaid tantiaquin aden nainquio icpanëdash. 41Min papabimbuecquidën nacpadombuembidi naquidien mibitedi nec, capondash Esusën. Adoaquien cun matses isadaidbon: Mambi ubitedishun Nuquin Papauidtsëqui tantieyoc. Utsi tantiatiapimbo icquin Nuquin Papa abentsëqui Papa caimbi, quepondash.
42Adsho tantiashumbien Esusën: Nuquin Papambo tantiaquimbien mimbi ubitsen tantiatsiac. Umbi tantiacpadec choenquio iccondabi. Nuquin Papan: Matsesbëd tabadec nid, caquini chondac. Adoaid icsho Cun Pa tantiaquin ubitsen mimbi tantiatsiac. 43¿Atotsi quiash umbi chuisho tantiash: Tantiadenquiocnoc chuipec, mibitedi quepe? Umbi abimbo chuisho tantiate bunenquio icquido yec pamumëdacbimbuecquido mibitedi nec. 44Min papabimbuecquid Mayan Icsa Satanas nec. Aid bunacpadenuidi nate bunquid yec aidën mado mibitedi nec. Ëndenquimboshë Nuquin Papan tauambuen matses uambi Mayan Icsa Satanas cuessunnianquidquio yampampic. Adquid iquec Nuquin Papan chiacpadombuen namenquio yec chieshëmënec cumapenec muaquidquio nec. Aton padibi icquid yec bëdambuen chuimenquio icquin matses muamequidquio nec. 45Adquid icnuc umbi Nuquin Papan Chiaid abimbo chiaqui tantiate bunenquio mibitedi iquec. 46¿Tsuntsimbini: Mimbi icsambuen naoc, quequin abimbo chuipatsiash? Mabi aden chuishuntiapimbo icpayoc. Umbi Nuquin Papan Chiaid abimbo chuisho tantiashumbi ¿atotsi queshun ubi tantiashunenquio ique? 47Nuquin Papa tantiaquidën Nuquin Papan Chiaidquio chuisho bëdambuen tantiendac. Padnuen mibitedi Nuquin Papa tantiesabo yec Nuquin Papan Chiaidquio chuisho tantiate bunenquio iquec, quepondash Esus.
Abadauan tishabi icnubi Esuquidistu icpampic, quequin chiaid
48Aden Esusën chuisho tantiashumbien cun matses isadaidbon chuiquidon naden chuipondash: Ma mibi Mayan Icsa Satanasën iua dapuduedash neyoc. Samadia yacnocquidobimbuec icsamboshë ma mibi iqueyoc, quequin ubitedishun abimbo caimbi, capondash. 49Adoaquien Esusën: Mabi Mayan Icsa Satanasën iua dapuduedambo iqueyoc. Ma matsesën Cun Pa tantianu, quequin mambi abimbo chuibaneyoc. Adshobi icsambuen chuishunquin: Muequi nec, mibitedishun ubi capec. 50Mabi: Bëdambocquid nec, canu, quenquio iquebi. Cun Pambien: Ma matsesën cun Mado: Bëdambo iquec, canu, ubi capec. Aidi abimbo chuiquin cuidquid nec. 51Tantia. Mibi abimbo chuinu. Umbi chiacpadombuen naic tabadquid uënësenquio yec Nuquin Papabëd tabadendac, quepondash Esus.#8.51 Ubi tantiaquido uënësacsho uincuenmeshun Nuquin Papa yacno ubëdi tabadmendambi padpidec uënëstiapimbo icnuc, quequin tantiec adondash Esus. Uan 11.25-26 ista.
52Adsho tantiashun isadaidbon chuiquidon naden chuiuapondash: Nëbi Mayan Icsa Satanasën iua dapuduedash mibi nec, quequin abimbobi tantiaquiembi. Umbi chiacpadombuen naquid uënësenquio ictsiash, quequimbien mimbi chuipec. Adquid icnubi Nuquin tsusedpa Abadauan yec Nuquin Papan oncamiaido yec quequidtedi uënësbudnepampic. 53¿Nuquin Papan tantiaidquio Abadauambëd Nuquin Papan oncamiaido abitedi uënësbudniampid icnuc Nuquin Papan udimbo tantiamiaidquioda mibi nedi? quepondash.
54Adoaquien Esusën: Mabi matsesën: Bëdambocquid nec, canu, quequin umbi tantiacpaden umbi naid icsambo ictsiash. Mibitedishun: Nuquin Papa abentsëqui tantiembi, mimbi cabued cun Panuidtsëquini: Mibi Bëdambocquid nec, caindac. 55Mimbi: Tantiembi, cabued Nuquin Papa ma mibitedishun tantienquio iqueyoc. Umbien Nuquin Papa tantiaquiec. Aid tantienquio iquembi, quec mibi yacpadecbidi muaquidquio ictsiabi. Mambi Cun Pa tantiaquin Aidën chiacpadombuen naiyoc. 56Mimbi: Cun tsusedpa Abadauan nec, cabued: Nuquin Papa yacnouësh choash bëdambo icmianquidquio matsesbëdi tabadec choec, quequin tantiec cuishonquepadennec. Nuquin Papan ismiac ubi aden tantiec cuishonquequiopadennec, quepondash Esus. 57Adsho tantiashun cun matses isadaidbon chuiquidon: Ma min seta 50ted matanmiabi yec mibi tsësiobudambo icpayoc. ¿Adquid iquequida: Abadauan isondambi, mibi quepe? quepondash. 58Adshobien Esusën: Abimbo chuinu. Tantiata. Abadauan tishabi icnubi ëndenquimboshë ictennedi nebi, capondash. 59Adsho tantiash nëishtanequien cun matses isadaidbo: ¿Icsambuenda chuipec? ¿Nuquin Papada Mua uapec? quetanquin cuënote bedtanquin: Sesenu, caqui matses dadpen icnuc aid natsusash ompodanec Nuquin Papa tabadte shubu yacnouësh Esus cuenec nidpondash.#8.59 D.N.Ch. 24.15-16 tantiaquin Esus chieshënquidon Esus sesetiadquio icpanëdash.
Currently Selected:
Uan 8: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.