Cadasia 5
5
Esus tantiaquido bëdambuen iste chiaid
1Esuquidistun nuquitedi bëdambuen isquin iuapenquio icmiac. Adquid icmiac chieshtoenquio icquin aid tantiec mibitedi bëdambuec tabadendac. Adoaido yequi: Moisesën chiampicpadenuidi nasho Nuquin Papan nuqui bëdambuen istsiash, quec padpidembuec adquidën iuaid yanuainda.
2Pabado nebi. Tantia. Chuinu. Moisesën chiactedi naquid Nuquin Papan bëdambuen istsiash, queshun shui dëbid dëtemenda. Aden naquid icsho Esuquidistun mibitedi bëdambuen istiapimbo iqueque. Aden nainda. 3Tantia. Padpiden chuiuanu. Aden Moisesën chiampid naquin shui dëbid dëtemequidën Nuquin Papa bëdambuen ismenuen ambi Moises chuiquin dada uamiampidtedi naquido nendac. 4Mibitedi Nuquin Papan: Naden nata, quequin Moises chiampid tantiaquin nasho Nuquin Papan ubitedi bëdambuen isec, quebuedi Esuquidistubëd cuëshëdsho Nuquin Papan mibi bëdambuen istiapimbo iquendac. 5Padnuen nuquitedi Nuquin Papan Mayanën tantiamiac naden nuqui tantiec: Esuquidistu uidtsëqui tantiasho Nuquin Papan icsaisabimbuecnuc nuqui bëdambuen isec, quequin nuqui tantiec. 6Esuquidistunuidtsëqui shui dëbid dëtemiaidobëtambi dëtemiacmaidontsen abi tantiasho bëdambuen isec. Adoac aid tantiaquido yec utsibobëd tantiananquid nuquitedi nendac.
7Mibitedi: Aid bedembi, quiash aiduidtsëqui tantiec titinquiacbimbuen mimbi Esusquio tantiondac. Adquid icsho ¿tsuntsin: Aid tantienda, cac Esus tantienquio yano? 8¿Nuquin Papan nacta Esus tantienquio yano? Ma Aidi mibitedi Esus tantiamequidquio neyoc. 9Nadquio muaquin chuibanquido iquec. Pan bidiscamete aniactsëc cabiunac pan abichobi bidisquec. Adacbimbuec muaquid abentsëcshun chiac matses dadpenshun abimbo tantienquio yantsiashe. Muaquin chiaid tantienda. 10Nuquin Icbo Esusën tantiamiac umbi chuibanondaid tantiaquin: Esus bëdambuen tantiatsiash, quequin mibitedi chiec nebi. Mibitedi mua uaquin chuiquid Nuquin Papan cuidendac. Nëid chuiquid tapa neque cuidtiapimbo iquebi, quenquio icquin cuidendac.
11Cun utsibo, umbi aidon chiacpaden: Shui dëbid dëtemiaiduidtsëqui Nuquin Papan bëdambuen istsiashe. Dëtemeta, quequin chuiquin Esus chuibanenquio icsho isadaidbon chieshënenquio ictsenoshi. Abi tantiaquid cuidmenquio icnuec cueste napotiaidën diadec Esuquidistu uënëspanëdash, quequin chuibansho mabi chieshëmpaboc. 12Mibitedi icsambuen mua uaquin chuiquid shui dëbid dëtemequido cain: Shui abichobi abibi intiadcuededpashun, caimbi.
IV. ESUS TANTIAQUIDO YEC BËDAMBUEC TABADAID
(5.13—6.10)
Esus tantiaquido tantiananec tabadte chiaid
13Cun utsibo, mibitedi Nuquin Papan Esus tantiamiaido nec. Adquido yanash: Ubi icsate bunaid nanu, quenda. Adec tabadenquio yec utsibobëd tantiananec nashunnanta. 14Aden naquin Nuquin Papan naden Moises chiampidtedi mimbi natsiac: Mibibi min dada datantiadacbimbuen utsibotsen tantiaquiota, quequin chuipampic.#5.14 Min onqueten dada uabi chotaquën onqueten dada uaid D.N.Ch. 19.18 isbanta. 15Naden chuinu. Tantia. Tantiananenquio yec utsibobëd nëishnanash chushcananec mibitedi icsauadcuededtsiaque. Bëdambuec tabadta.
Nuquin Papan Mayanën tantiamiacpadec tabadte chiaid
16Nuquin Papan Mayanën tantiamiacpadombuen naic bëdambuec tabadta. Adec tabadquin mibi icsate bunaid mimbi nainquio ictsiac. 17Mibi icsate bunaid naic Nuquin Papan Mayanën tantiamiacpadec bëdambuec tabadtiapimbo mibi ictsiac. Nuquin Papan Mayanën tantiamiacpadombuen naic tabadquin mibi icsate bunaid mimbi nainquio ictsiac. Adquid icquin mibi bunacpadombuen nabantiapimbo mibitedi iquendac. 18Nuquin Papan Mayanën tantiamiacpadombuen nabanquid yec: Moisesën chiactedimbo naquin umbimbo Nuquin Papa bëdambuen ismembi, quenquio mibitedi iquendac.
19Nadquio icsateuidi bunquid matses iqueque. Tantia. Chuinu. Nëidic aton chidopenquio chudquido. Nëidic aton bënëpenquio chudmequido. Nëidic ambi natemaidi naic chudnanquido. Nëidic abi bunaiduidi naquin mëmunesabo. Nëidic chuitemaid chuiquin icsamete bunquido. 20Nëidic ambibi nacnenshun papa caquido. Nëidic nënëchoquido. Nëidic chieshëmënquido. Nëidic chieshëmënec chushcananquido. Nëidic utsina isash cumapenec bunquido. Nëidic badedquio chieshtoquido. Nëidic ambi naiduidi naquido. Nëidic cuësh cuëshëdmianquido. Nëidic: Utsin chiaid tantiatiapimbo iquebi. Umbentsëqui bëdambuen chiembi, quequido. 21Nëidic utsina isash natiambo bunec chieshëmënquido. Nëidic badedbadedquien tantiadennuen acte paë uaid acquido. Nëidic badedbadedquien nua pequido. Nëidic inchëshën ushenquio yec iccuededec mamënec icsambuec tabadquido. Nëidic aidpadquid utsi naic tabadquido. Adquidtedishun ambi icsambuen naid ëntiapimbo yec uënësash Nuquin Papan namiacno tabadtiapimbo iquendac, quequin ënden mibitedi chuibanondambi.
22Padnuen Nuquin Papan Mayanën tantiamiaid nadec tabadquid. Nuquin Papa tantiec utsibobëd tantiananec bëdambuec tabadquid. Esus tantiec cuishonquec tabadquid. Nuquin Papan ubi bëdambuen isec, quec bëdambuec tabadquid. Utsibon chieshënaqui badedquio chieshtoenquio yec tabadquid. Utsibo tantiaquin nashunec tabadquid. Bëdambuen tantiaquin nabanec tabadquid. Chieshtoenquio icquin Nuquin Papa tantiec tabadquid. 23Ubiuidtsëqui bëdambocquid nebi, quenquio yec tabadquid. Abi icsate bunaid nainquio icquin mëmunec tabadquid. Adec tabadquin Nuquin Papan Chiampid niaquenquiocquid iquendac. 24Esuquidistun iuabo icquin nuqui icsambuen naidbëta nuqui icsate bunaidtedi bedshun cueste napotiaidën dectanquin cuessunniacbimbuen nuquitedi ënondac. 25Aden Nuquin Papan Mayanën bëdambuen tabadmiaid icquin nëbi aidën tantiamiacpadombuen nabannuna.
26Ubiuidtsëqui bëdambocquid nebi, quenda. Chuiquid dëniacte bunec chieshëmënec tabadenda. Utsina isash aid bunquiec nëishnanenquio yec bëdambuec tabadnuna.
Currently Selected:
Cadasia 5: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.