Epeso 3
3
Esuquidistu tantiaquido Pabadon chuibenniaid
1Pabado nebi. Isadaidpembo icsho mibitedi nashunquin Esuquidistun naid chuibennesho bedshun quënën tsadunac tsadebi. 2Mibitedi tantiaquioquin Nuquin Papan: Aido yacno nidshun Esuquidistu chuibenneta, caidquio nec, quequin mimbi ubi tantiec. 3Nuquin Papan ënden ambi matses tantiamenquio icpampidi tantiamiac daëdpactsëc dada uaquin mibitedi chiondambi. 4Aden umbi dada uaondaid isec onquequin: Esuquidistu chuiquin Nuquin Papan matses tantiamenquio icpampidi tantiamiac nëbi Pabadon tantiec, quequin mimbi tantiec. 5Ëndenquio Nuquin Papan ambi utsibo tantiamenquio icpampidi nëbi aton Mayanën tantiamiacpaden Esus chuibennequidobëta ambi oncamiaido tantiamiac. 6Ambi matses tantiamenquio icpampid nad iquec: Esusën naid ambi Chiaid Bëda chuibansho Nuquin Papan matses utsi utsien Esus tantiaquido icmec. Adoac aidobëd isadaidbo dada abentsëc yacbimbuec tabadsho issun ambi chiampicpadombuen bëdambuen isquin uënësacsho abëdi tabadmendac. 7Aden Nuquin Papa nadatiambocquid icquin ambi cuidenquio yaid icshobi ubi tantiaquin bëdambuen isquin Esusën naid chuibanmequin Nuquin Papan nadatiambocquin namiaid nebi.
8Nuquin Papa tantiaquido utsibo bëdambocquid icnubi aidopadquidpenquio nebi. Adquid icshobini Nuquin Papan isadaidpembo Esus chuibennequid icmepondash. Esusën matses bëdamboshë icmete matsesën: Nadquio iquec, catiapimbo ictequidbidi chuibennequid icmiondashi. 9Ëndenquimboshë abitedi uaquidquio icquin Nuquin Papan ambi matses tantiamenquio icpampidi chuiquin: Aid tantiamequin chuibanta, caidquio nebi. 10Adembidi nëbi chuibenniac matses dadpen Esuquidistu tantiaquido yanacsho issun Nuquin Papabëd icquidobëtan abuc icquid Mayan Icsa Satanasën iuabo abitedishun naden tantiendac: Nuquin Papan abitedi tantiaquidquio icquin Esuquidistu tantiaquid dadpen yanmiac, quequin tantiendac. 11Aden ambi Esus tantiamete iquendac, quequin ambi ëndenquimbo tantiampicpadombuen Nuquin Papan Esuquidistu Nuquin Icbo icmepanëdash. 12Esuquidistunuidtsëqui abi tantiasho Nuquin Papa nuquitedi bëdambuen ismec, quequin tantiec dacuëdenquio yec Nuquin Papa dayunquio tsadacbimbuec nuquitedi iquec. 13Mibi tantiaquin chuibanquid icsho ubi chieshënquin natiamiaid icnuc chieshtoenquio icquin tantiata, mibitedi caimbi. Aden natiamiac ubi mëyadaid umbi chuisho tantiash: Ubi tantiaquin chiec nec, quec mibitedi bëdambo iquendac.
Nuquin Papa chianniaid
14-15Nuquin Papa abuc icquidobëta nidaidën icquidotedi uaquidquio nec, quequin aid tantiaquin danëshën sebudshun 16Nuquin Papa nadatiambocquin naquidquio icsho naden mibitedi tantiaquin chiannembi: Min Mayan Esus tantiaquidobëd icmequin chieshtoenquio icquido icme. 17Adembidi Esuquidistu tantiaquidombo icmequin ënëdenquio yec utsibobëd tantiananec tabadquid icmeta, Papa, quequin mibitedi tantiaquin Nuquin Papa chiannembi. 18Mibi tantiaquido utsibobëd tantiananmeta. Adoac Esusën abi tantiaquidotedi ënenquio icquin tantiaquiec, quequin ma tantianu. Tantiananquidombo icmeta, quequin Nuquin Papa chiannembi. 19Adembidi ënenquio icquin matses tantiaquidquio Esus nec, quequin matsesën tantiatiapimbo iquec. Adquid icnuc ubi Esus tantiamequin mimbi nacpadombuen utsibo Esus tantiaquidquio icmeta, quequin Nuquin Papa chiannembi.
20Nuquin Papa bëdamboshë iquec. Adquid yec nadatiambocquid icquin nuqui chianniaid tantiaquid icquin nuqui: Aden ubi nashunendac, quequin tantiacmaidi nuqui nashunquid nec. 21Nuquitedi Esuquidistu tantiaquido iccuededquin: Nuquin Papa bëdamboshë iquec, canuna ënenquio icquin. Amen.
Currently Selected:
Epeso 3: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.