Tesadonica 2 1
1
I. BEDANQUIN CHIAID
(1.1-12)
Mibi tantiembi, quequin chiaid
1Pabado nebi. Tesadonica yacnocquido Nuquin Papabëta Nuquin Icbo Esus tantiaquido icsho mibitedi tantiembi, quequin padpiden chuiuaquin dada uaimbi. Adembidi ubëd icquin Sidbanobëtan Timoteon mibitedi tantiauaic. 2Nuquin Papabëtan Esuquidistun mibi bëdambuen isquin ma mibitedi bëdambuec tabadmepanuna, caimbi.
Pabadon Nuquin Papa chianniaid
3Tantia. Cun utsibo, Nuquin Papa bëdamboshë iquec, quequin chiannequid icquin mibitedi tantiaquin Nuquin Papa chiannembi naden. Esus bëdiactsëc tantiactsëcbuedombi Tesadonica yacnocquidon nëbi Esus tantiabededquiosh, quequin chioshi, Papa. Adecbidi bëdiactsëc tantianambuedi nëbi cumapenec utsibobëd tantiananquiosh, quequin chioshi. Aden aido bëdambo icmec mibi bëdamboshë iquec, Papa, quequin mibitedi tantiaquin chiannembi. 4Mibi adec bëdambuec tabadaid tantiaquin Esus tantiaquido utsibo chuibenniombi. Dadpenshun chieshënaqui chieshtoenquio icquin aidon abi Esus tantiec, quequin utsi utsiec yacno mibi Esus tantiec tabadaid chuibenniombi.
Nuquin Papan matses cuidte chiaid
5Adec chieshtoenquiocquid icquin nuquitedi naden tantiec. Ubi chieshtomenquio icquid abitedishun naid tantiaquidquio nec. Adquid icquin icsambo icquido cuidquimbi bëdambocquido Nuquin Papan bëdambuen isec, quequin nuqui tantiec. Adec chieshtoenquio icquin Esus tantiasho utsibon chieshënquin natiamiaid icsho Nuquin Papan: Aido umbi namiacnombo chomeshun ubëdi tabadmendambi, caindac.
6Nëbi mibitedi natiamequin chieshënquidon naidtsen tantiaquid icquin Nuquin Papan: Icsambuen naquido nec, queshun aido cuidendac. 7Aden nuqui natiamequin chieshënquido Nuquin Papan cuidendac. Adoac nuqui natiametiapimbo iquendac. Abëd icquido ambi nadatiambocquin namiaidobëd cute nëdënquequidbimbuec isadec abucuësh choshon Nuquin Icbo Esusën adoendac. 8Icsambuen naisambo yec matses cuidquidquio nebi, quec choshon Nuquin Papa tantiesabo cuidendac. Nuquin Icbo Esus tantiasho Nuquin Papan mibi bëdambuen istsiash, quequin chuibanac aid tantiesabotsen Esusën cuidendac. 9Abi yacno puduedmenquio icquin icsambuen naquido ënëdenquio yec mëyadnuc cuidacno nidmendac cuentiapimbo icnuc. Adoac Esus abitedishun Icbombo yec bëchamauanquiec bëdamboshë isadsho isequi aidbëd tabadtiapimbo iquendac. 10Aden ambi icsambuen naquido cuidte uëshëmbi Esus chosho isash abi tantiaquido: Ubi cuidmenquio icnuec abided cuidadaid Nuquin Icbo bëdamboshë iquec, quequin aton Icbo isec tabadendac. Umbi Esus chuibanac aid tantiabenondaido icquin mimbitsen Esus chosho isendac.
11Aidobëtambi Esus isembi, quequin mibitedi tantiaquin Nuquin Papa ënenquio icquin naden chiannembi: Mimbi Esus tantiamiaido neque. Bëdambuec tabadmeta, Papa. Aido: Esus tantiec mimbi chiacpadombuen natiadquio iquebi, quequin mibi chuisho ambi chiacpadombuen nameta. Nadatiambocquin naquidquio mibi neque. Adota, Papa. 12Aden mimbi Cun Icbo Esuquidistubëtan bëdambo icmiac Esus tantiec bëdambuec tabadtsiash. Adec bëdambuec tabadsho isash utsibo mibi caic: Abi tantiaquid icsho Esusbëtan Nuquin Papan aden bëdambuen tabadmec. Aton Icbo Esuquidistubëd Nuquin Papa bëdamboshë iquec, quendac utsibo, quequin Nuquin Papa chiannembi mibitedi tantiaquin.
Currently Selected:
Tesadonica 2 1: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.